জি বি এছত গুৱাহাটীত ১৭ বছৰীয়া ছাত্ৰীৰ মৃত্যু

Dainik janambhumi February 02, 2025

ডিজিটেল ডেস্ক: গিলিয়ন বেৰে চিন্দ্ৰম (জি বি এছ)ত আক্রান্ত হৈ গুৱাহাটীত এগৰাকী ১৭ বছৰীয়া ছাত্ৰীৰ মৃত্যু ঘটিছে আৰু এই বছৰ জি বি এছত আক্ৰান্ত হৈ মৃত্যু হোৱা ৰাজ্যখনৰ প্ৰথমটো ঘটনা হিচাপে চিহ্নিত হৈছে। 

অৱশ্যে গুৱাহাটীৰ যিখন ব্যক্তিগত চিকিৎসালয়ত যুৱতীগৰাকীৰ মৃত্যু ঘটিছে সেই চিকিৎসালয়খনৰ কৰ্তৃপক্ষই বা ৰাজ্য চৰকাৰৰ স্বাস্থ্য বিভাগে এতিয়ালৈকে এই সম্পর্কত কোনো আনুষ্ঠানিক ঘোষণা কৰা নাই। বিহাৰৰ বাসিন্দা আৰু বৰ্তমান গুৱাহাটী নিৱাসী দ্বাদশ শ্ৰেণীৰ ছাত্ৰীগৰাকীক দহ দিনৰ পূৰ্বে চিকিৎসালয়ত ভর্তি কৰোৱা হৈছিল যদিও তেওঁৰ স্বাস্থ্যৰ দ্রুত অৱনতি ঘটিবলৈ আৰম্ভ কৰে আৰু কালি নিশা তেওঁৰ মৃত্যু হয়। 

উল্লেখযোগ্য যে যোৱা ছমাহত ৰাজ্যত কোনো জি বি এছ আক্ৰান্তৰ ঘটনা ধৰা পৰা নাছিল। সমগ্র দেশতে সম্প্রতি জি বি এছৰ এক ঢৌ আহিছে আৰু দেশৰ বহু প্ৰান্তত জি বি এছত বহুলোক আক্ৰান্ত হৈছে। যিগৰাকী ছাত্ৰীৰ গুৱাহাটীত মৃত্যু ঘটিছে সেইগৰাকীৰ দেহত মহাৰাষ্ট্ৰ, দক্ষিণ ভাৰত বা পশ্চিম বংগত আক্ৰান্তৰ দৰেই জি বি এছৰ লক্ষণসমূহ দেখিবলৈ পোৱা গৈছিল। ছাত্ৰীগৰাকীৰ পৰিয়ালৰ এটা সূত্রই জানিবলৈ দিয়া মতে, জি বি এছত আক্রান্ত ছাত্ৰীগৰাকী উন্নত চিকিৎসাৰ বাবে এয়াৰ এম্বুলেন্সেৰে দিল্লীলৈ লৈ যোৱাৰো প্রস্তুতি চলিছিল। কিন্তু নিয়তিৰ হাতত দিল্লীলৈ উন্নত চিকিৎসাৰ বাবে যোৱাৰ পূর্বেই ছাত্ৰীগৰাকীয়ে হাৰ মানিলে। মহানগৰীৰ এজন জ্যেষ্ঠ শিশুৰোগৰ ছাৰ্জনে জানিবলৈ দিয়া মতে, প্রতিবছৰেই ৰাজ্যখনত জি বি এছত আক্রান্ত বহু ঘটনা ধৰা পৰে আৰু এইবোৰ সাধাৰণতে ইমান গুৰুতৰ নহয়। গতিকে জি বি এছক লৈ অযথা ভীতিগ্রস্ত হোৱাৰ কাৰণ নাই বুলি চিকিৎসকজনে মন্তব্য কৰে ।

Share This