বাঘবৰৰ বালিচৰত সেউজ বিপ্লৱ, ৫ যুৱকে কৰিছে বিভিন্নধৰণৰ খেতি

dainik janambhumi December 28, 2025

ডিজিটেল ডেস্ক: ব্ৰহ্মপুত্ৰ আৰু বেঁকী নদীৰ প্ৰৱল খহনীয়াত সৰ্বস্বান্ত হৈছিল শশ পৰিয়াল। কিন্তু হেৰোৱা মাটিৰ দুখত ভাগি নপৰি বালিচৰত পৰিণত হোৱা ভূমিত পুনৰ সেউজীয়াৰ সপোন ৰচিছে বৰপেটাৰ একাংশ উদ্যমী কৃষকে। বৰপেটা জিলাৰ চেঙা আৰু মন্দিয়া সমষ্টিৰ খহনীয়াগ্রস্ত অঞ্চলত এতিয়া বালিৰ বুকু ফালি লহপহকৈ বাঢ়ি অহা শস্যই কঢ়িয়াই আনিছে আশাৰ বতৰা।

বাঘবৰ ৰাজহ চক্ৰৰ অন্তৰ্গত কৃষি প্রধান অঞ্চল গড়লা গাঁৱৰ প্ৰায় ৯০ শতাংশ কৃষিভূমি ইতিমধ্যে নদীৰ বুকুত জাহ গৈছে। এসময়ৰ উভৈনদী কৃষিভূমি আজি কেৱল বালিচৰ। এই বালিচৰতে জীৱন যুদ্ধত জিকি দেখুৱাবলৈ সাজু হৈছে আনোৱাৰ হুছেইন, সাধন আলী, নূৰ হুছেইন, ৰমজান আলী আৰু নজৰুল ইছলাম নামৰ পাঁচজন উদ্যমী যুৱক। পৰিত্যক্ত বালিচৰত এই পাঁচজন যুৱকে অদম্য সাহস আৰু একাগ্ৰতাৰে অঞ্চলটোৰ প্ৰায় ৫০০ বিঘা পৰিত্যক্ত বালিচৰ আৰু কঁহুৱা বন থকা ভূমি কৃষিভূমিলৈ ৰূপান্তৰিত কৰিছে। নিজৰ জেপৰ ধন ব্যয় কৰি বালি আৰু জংঘল চাফা কৰি তেওঁলোকে গঢ়ি তুলিছে এখন বিশাল কৃষি পথাৰ। বৰ্তমান এই পথাৰত জলকীয়া, তিয়হ, ধনিয়া, আলু, ৰঙালাও, মাকৈ আদিৰ খেতিয়ে নদন-বদন হৈ পৰিছে। তেওঁলোকৰ অনুপ্ৰেৰণাত অঞ্চলটোৰ আন বহু কৃষকে প্রায় দুহেজাৰ বিঘা ভূমিত কৃষিকার্য সম্পাদন কৰি আর্থিকভাৱে স্বাৱলম্বী হ'বলৈ সক্ষম হয়।

জলসিঞ্চনৰ অভাৱ উদ্যমী কৃষকসকলে বালিচৰত ফচল ফলাবলৈ সক্ষম হ'লেও তেওঁলোকৰ সন্মুখত দেখা দিছে এক বৃহৎ প্রত্যাহ্বান। খৰালিৰ এই সময়ছোৱাত পানীৰ অভাৱত শস্যৰ স্বাভাৱিক বৃদ্ধি ব্যাহত হৈছে। যিহেতু বালিচৰত চৰকাৰীভাৱে বৃহৎ জলসিঞ্চন আঁচনি ৰূপায়ণ কৰা সহজসাধ্য নহয়, সেয়েহে কৃষকসকলে বিকল্প ব্যৱস্থাৰ দাবী জনাইছে। চৰকাৰে যদি এই চৰাঞ্চলৰ ভূমিত জলসিঞ্চনৰ বাবে ছ'লাৰ ছেট প্রদানৰ ব্যৱস্থা কৰে, তেন্তে আমাৰ উৎপাদন দুগুণ বৃদ্ধি পাব আৰু বহুতো নিবনুৱা যুৱক কৃষিৰ প্ৰতি আকৰ্ষিত হ'ব। বজাৰ আৰু মধ্যভোগীৰ দপদপনি উৎপাদনত সফলতা অর্জন কৰিলেও বজাৰ ব্যৱস্থাত এতিয়াও সংগ্রাম কৰিবলগীয়া হৈছে কৃষকসকলে। বৰপেটাৰ এই বানখহনীয়া পীড়িত কৃষকসকলে ৰাজ্য চৰকাৰৰ কৃষি বিভাগলৈ কাতৰ আহ্বান জনাইছে। চৰকাৰে জলসিঞ্চনৰ বাবে ছ'লাৰ পাম্পৰ যোগান ধৰক আৰু উৎপাদিত সামগ্ৰীৰ উচিত মূল্য পাবলৈ এখন সুব্যৱস্থিত বজাৰৰ ব্যৱস্থা কৰাৰ দাবী জনাইছে। চৰকাৰী সহযোগিতা পালে বৰপেটাৰ এই বালিচৰতে অনাগত দিনত ৰাজ্যৰ কৃষি অর্থনীতিলৈ এক উল্লেখনীয় অৱদান আগবঢ়াব।