গেৰিলা হিংসাত কলম্বিয়াত ৮০জন নিহত, সহস্ৰাধিক লোক স্থানচ্যুত

Dainik Janambhumi January 21, 2025

ডিজিটেল ডেস্কঃ কলম্বিয়াত শান্তি আলোচনাৰ প্ৰক্ৰিয়া ব্যৰ্থ হোৱাৰ পাছতেই দেশখনত পুনৰ গেৰিলা হিংসাৰ সূত্ৰপাত ঘটিছে৷ বিগত চাৰিদিনত অসামৰিক লোকসহ ৮০জন লোকৰ মৃত্যু হোৱাৰ লগতে হাজাৰ হাজাৰ লোক স্থানচ্যুত হৈছে৷

দ্ৰুতভাৱে বৃদ্ধি হোৱা আঞ্চলিক যুদ্ধখনৰ অভিকেন্দ্ৰ কাটাটুম্বু অঞ্চলত ৫০০০ সেনা বাহিনীক মোতায়েন কৰা হৈছে আৰু বাসিন্দাসকলে জীৱন ৰক্ষা কৰিবলৈ অঞ্চলটোৰ পৰা পলায়ন কৰিছে৷ সশস্ত্ৰ গোট নেশ্যনেল লিবাৰেশ্যন আৰ্মিয়ে [ই এল এন] বিগত বৃহস্পতিবাৰে কাটাটুম্বুত আক্ৰমণৰ সূচনা কৰিছিল৷ ২০১৭ চনত অস্ত্ৰ পৰিহাৰ কৰাৰ পাছত এতিয়া নিষ্ক্ৰিয় ফাৰ্ক গেৰিলা বাহিনীৰ প্ৰাক্তন সদস্যসকলক একগোট কৰি ই এল এনে এই আক্ৰমণৰ সূচনা কৰে৷ ইয়াৰ পাছতে কলম্বিয়াৰ উত্তৰ-পূব কাটাটুম্বু অঞ্চলৰ পৰা গেৰিলা লোকে পলায়ন কৰিছে৷ কলম্বিয়াৰ এজন চৰকাৰী বিষয়াই সদৰী কৰা অনুসৰি, দেশখনৰ চৰকাৰৰ নেশ্যনেল লিবাৰেশ্যন আৰ্মিৰ সৈতে শান্তি আলোচনাৰ প্ৰচেষ্টা ব্যৰ্থ হোৱাৰ পাছতেই এই হিংসাত্মক ঘটনা সংঘটিত কৰে গেৰিলা বাহিনীটোৱে৷

 এই হিংসাত্মক ঘটনাত ২০জনতকৈ অধিক লোক আহত হৈছে৷ দেওবাৰে কলম্বিয়াৰ সেনাই লোকসকলক ঠাইখন খালী কৰিবলৈ নিৰ্দেশ দিয়াৰ পাছতেই সহস্ৰাধিক লোক স্থানচ্যুত হয়৷ এই হিংসাত্মক ঘটনাত সাম্প্ৰদায়িক নেতা কাৰ্মেল’ গোৰেৰ’ৰ লগতে শান্তি চুক্তি স্বাক্ষৰ কৰিবলগীয়া আন সাতজন লোক নিহত হয়৷ আনহাতে, শান্তি আলোচনাত ভাগ ল’বলগীয়া কমেও তিনিজন লোকক অপহৰণ কৰা হৈছে৷

Share This