ভঙাগড় , গড়চুকত পৌৰ নিগমৰ অভিযান অবৈধ হʼডিং, বেনাৰেৰে ভৰিছে পথ

Kakali Deka March 07, 2025

ডিজিটেল ডেস্কঃ গুৱাহাটী মহানগৰত বিভিন্ন ঠাইত বিশৃংখলভাৱে লগোৱা অবৈধ হ'ডিং আৰু বেনাৰৰ বিৰুদ্ধে গুৱাহাটী পৌৰ নিগমে অভিযান অব্যাহত ৰাখিছে। বৃহস্পতিবাৰে ভঙাগড় আৰু গড়চুকৰ বিভিন্ন ঠাইত পৌৰ নিগমৰ কৰ্মীয়ে অভিযান চলাই পথত থকা অবৈধ হ'র্ডিং আৰু বেনাৰ আঁতৰাই দিয়ে।

 উল্লেখযোগ্য যে বিভিন্ন ঠাইত বিশৃংখলভাৱে লগোৱা হ'র্ডিং আৰু বেনাৰে মহানগৰৰ সৌন্দর্যত আঘাত হানিছে। একাংশ অনুষ্ঠান-প্রতিষ্ঠানে অনুষ্ঠান আয়োজন কৰি সম্পূৰ্ণ হৈ যোৱাৰ পাছতো বেনাৰ আৰু হ'ডিংসমূহ আঁতৰাই দিয়াৰ ব্যৱস্থা নকৰে। 

মহানগৰৰ প্ৰতিটো পথৰ কাষত, বিদ্যুতৰ খুঁটা, ডাঙৰ গছ, উৰণ সেতু, পদপথৰ কাষত সকলোতে এতিয়া বৃহৎ-বৃহৎ হ'ডিং আৰু বেনাৰ ওলমাই ৰখা হৈছে। প্রতিটো বাছষ্টপ আৰু ট্রেফিক পইণ্টত এতিয়া অকল বিভিন্ন অনুষ্ঠান-প্রতিষ্ঠানৰ হ'র্ডিং আৰু বেনাৰ। পৌৰ নিগমৰ আইন অনুসৰি মহানগৰৰ য'তে-ত'তে বিশৃংখলভাৱে হ'র্ডিং লগোৱাত বাধা আছে। তথাপি আইন ভংগকাৰীৰ বিৰুদ্ধে প্রশাসন তথা দায়িত্বশীল বিভাগে কোনো ব্যৱস্থা গ্রহণ নকৰে। 

মহানগৰত বিভিন্ন সময়ত একাংশ অনুষ্ঠান-প্রতিষ্ঠানে অনুষ্ঠান আয়োজন কৰাৰ প্রাক্ মুহূৰ্তত লগোৱা বেনাৰসমূহ আয়োজন সম্পূৰ্ণ কৰাৰ পাছত আঁতৰোৱাৰ ব্যৱস্থা কৰিব লাগে। কিন্তু সেয়া সময়ত নকৰাত সম্ভ্রান্ত মহানগৰখনৰ স্বাভাৱিক পৰিৱেশত আউল লাগিছে। প্রধানকৈ গুৱাহাটী মহানগৰলৈ প্রতিদিনে দেশ-বিদেশৰ যথেষ্ট সংখ্যক পৰ্যটকৰ আগমন ঘটে। ফলত এনেধৰণৰ কাৰ্যই পৰ্যটকসকলৰ মনত বিৰূপ প্ৰভাৱ পেলোৱাৰ লগতে মহানগৰখনৰ উন্নয়নৰ দায়িত্বত থকা বিভাগ আৰু বিষয়াসকলৰ চূড়ান্ত গাফিলতি স্পষ্টকৈ প্ৰকাশ কৰিছে

Share This