দুৰ্গা পূজাৰ পূৰ্বে মুকলি হ'ব গুৱাহাটী - উত্তৰ গুৱাহাটী দলং

dainik janambhumi February 28, 2025

ডিজিটেল ডেস্ক: অসমবাসীৰ বাবে আশাৰ বতৰা। আগন্তুক দুর্গা পূজাৰ পূৰ্বে ব্ৰহ্মপুত্ৰৰ ওপৰত নিৰ্মাণ কৰি থকা গুৱাহাটী-উত্তৰ গুৱাহাটী সংযোগী দলংখন ৰাইজৰ বাবে মুকলি হ'ব। আনহাতে, ২০২৮ চনৰ জুনৰ ভিতৰত পলাশবাৰী-শুৱালকুছি সংযোগী দলংখনৰ নির্মাণো সম্পূর্ণ হ'ব। ইতিমধ্যে গুৱাহাটী-উত্তৰ গুৱাহাটী দলংখনৰ নিৰ্মাণকাৰ্য ৮৫ শতাংশ সম্পূর্ণ হৈছে। আনহাতে, পলাশবাৰী-শুৱালকুছি সংযোগী দলংখনৰ কামো দহ শতাংশ সম্পূৰ্ণ হৈছে। 

ৰাজ্য চৰকাৰে প্ৰকাশ কৰা তথ্য অনুসৰি পলাশবাৰী-শুৱালকুছি সংযোগী দলংখনৰ নিৰ্মাণৰ দায়িত্ব লাভ কৰিছে এল এণ্ড টি কোম্পানীয়ে। ৩১৯৭.২০ কোটি টকা ব্যয় সাপেক্ষে নির্মাণ কৰিব লগীয়া এই দলংখনৰ ৮০ শতাংশ ধন নিউ ডেভেলপমেন্ট বেংকে প্রদান কৰাৰ বিপৰীতে বাকী ২০ শতাংশ ধন ৰাজ্য চৰকাৰে ব্যয় কৰিব। চাৰিলেনযুক্ত পথৰ সৈতে নিৰ্মাণ কৰিব লগীয়া দলংখনৰ দৈর্ঘ্য হৈছে ৩.৬ কিল' মিটাৰ। দলংখনক সংযোগ কৰি পলাশবাৰীৰ দিশে ৫.৬১ কিল' মিটাৰ পথ আৰু শুৱালকুছিৰ দিশে ৩ কিল' মিটাৰ পথ নিৰ্মাণ কৰা হ'ব। 

ইফালে মুখ্যমন্ত্রী ড° হিমন্ত বিশ্ব শর্মাই এই দুয়োখন দলঙৰে নিৰ্মাণ শেহতীয়াকৈ নিৰ্ধাৰণ কৰা সময়ৰ ভিতৰত সম্পূৰ্ণ কৰাৰ বাবে নির্দেশ দিছে। বিশেষকৈ গুৱাহাটী আৰু উত্তৰ গুৱাহাটী সংযোগী দলংখন পূজাত অসমৰ জনগণক উপহাৰ হিচাপে দিব খুজিছে মুখ্যমন্ত্রী শৰ্মাই। জানিব পৰা মতে, শেহতীয়াকৈ মুখ্যমন্ত্ৰীগৰাকীয়ে দলংখনৰ অগ্ৰগতিৰ পৰ্যালোচনা কৰি দুৰ্গাৰ পূজাৰ পূৰ্বেই দলংখনৰ নিৰ্মাণ যিকোনো প্ৰকাৰে হ'লেও সম্পূৰ্ণ কৰিবই লাগিব বুলি নির্মাণকাৰী প্ৰতিষ্ঠানটোক কঠোৰ নিৰ্দেশ দিছে।

Share This