আজি ডুবাইত হাইভল্টেজ মেচ, ভাৰত-পাক মেচ অঘোষিত বৰ্জন বি চি চি আইৰ

dainik janambhumi September 14, 2025

ডিজিটেল ডেস্ক : এছিয়া আজি ইয়াৰ ডুবাই ইণ্টাৰনেশ্যনেল ষ্টেডিয়ামত ভাৰত আৰু পাকিস্তানৰ মাজত হাইভল্টেজ মেচখন অনুষ্ঠিত হ'ব। কিন্তু এই বাৰ পৰিৱেশ অলপ বেলেগ ধৰণৰ হোৱা দেখা পোৱা গৈছে। আগতে এই হাইভল্টেজ মেচখন চোৱাৰ বাবে বি চি চি আই আৰু ৰাজ্যিক ক্রিকেট সন্থাৰ বিষয়ববীয়াৰ মাজত ব্যাপক উৎসাহ দেখা পোৱা গৈছিল। এইবাৰ কিন্তু পৰিস্থিতি সম্পূর্ণরূপে সলনি হোৱা পৰিলক্ষিত হৈছে। ৰাষ্ট্ৰীয় পৰ্যায়ৰ সংবাদ মাধ্যমত প্রকাশ পোৱা অনুসৰি ভাৰতত এই মেচখন বৰ্জনৰ বাবে চলাই থকা অভিযানৰ প্রভাব আনকি বি চি চি আইতো পৰিছে। সেয়েহে ভাৰতীয় ক্রিকেট নিয়ন্ত্রণ ব'ৰ্ডৰ অধিকাংশ বিষয়ববীয়াই ভাৰত আৰু পাকিস্তানৰ মেচখনৰ পৰা দূৰত্ব বজাই ৰাখিছে। সংবাদ মাধ্যমসমূহে ইয়াক বি চি চি আইৰ 'অঘোষিত বর্জন' বুলি অভিহিত কৰিছে। 

উল্লেখযোগ্য যে এছিয়া কাপৰ আয়োজক হ'ল বি চি চি আই আৰু ভাৰত-পাকিস্তানৰ মেচখনলৈ মাত্ৰ কেই ঘণ্টামানহে বাকী আছে। তৎসত্ত্বেও এই বাতৰি লিখা পৰলৈকে বি চি চি আইৰ কোনো উচ্চপদস্থ বিষয়ববীয়া ডুবাইত উপস্থিত হোৱা নাই। ইয়াৰ বিপৰীতে কেইমাহমানৰ আগতে চেম্পিয়নছ টুফীৰ ভাৰত আৰু পাকিস্তানৰ মেচখন হোৱাৰ সময়ত বি চি চি আইৰ কেইবাগৰাকীও উচ্চ পদস্থ বিষয়ববীয়া তথা বিভিন্ন ৰাজ্যিক ক্রিকেট ব'ৰ্ডৰ প্রতিনিধি ডুবাইত উপস্থিত আছিল। ভাৰত আৰু পাকিস্তানৰ মেচখন বৰ্জনৰ বাবে সামাজিক মাধ্যমত চলি থকা অভিযানক বি চি চি আয়ে গুৰুত্বসহকাৰে লোৱা যেন পৰিলক্ষিত হৈছে। ৰাষ্ট্ৰীয় পৰ্যায়ৰ এখন বাতৰি কাকতে প্ৰকাশ কৰা অনুসৰি বি চি চি আইৰ অধিকাংশ বিষয়ববীয়াই এই মেচখনৰ দূৰত্ব বজাই ৰখাৰ সিদ্ধান্ত লৈছে আৰু সেয়েহে বিভিন্ন অজুহাতত ডুবাইত উপস্থিত হোৱা নাই। উল্লেখযোগ্য যে পহলগামত সন্ত্রাসবাদীয়ে ২৬জন নিৰীহ পর্যটকক হত্যা কৰাৰ ঘটনা আৰু অপাৰেশ্যন সেন্দূৰৰ পাছত ভাৰত আৰু পাকিস্তানৰ মেচখনত দেশত এক আৱেগিক পৰিৱেশৰ সৃষ্টি হৈছে। ইয়াৰ প্ৰতি লক্ষ্য ৰাখি এই মেচখনলৈ বি চি চি আইৰ বিষয়ববীয়াসকলে পিঠি দিয়া বুলি বাতৰি কাকতখনে উল্লেখ কৰে। 

ৰাষ্ট্ৰীয় পৰ্যায়ৰ সংবাদ মাধ্যমে প্রকাশ কৰা মতে, বয়স ৭০ বছৰ হোৱাৰ পাছত ৰ'জাৰ বিন্নীয়ে বি চি চি আইৰ সভাপতিৰ পদ ত্যাগ কৰে। সচিব দেৱজিৎ শইকীয়া মহিলা বিশ্ব কাপৰ আয়োজনত ব্যস্ত থকাৰ কাৰণে ইয়ালৈ নাহে বুলি কোৱা হৈছে। আই পি এলৰ অধ্যক্ষ অৰুণ সিং ধূমলে এই মেচখন নোচোৱাৰ সিদ্ধান্ত লৈছে। যুটীয়া সচিব ৰোহন দেশাই আৰু কোষাধ্যক্ষ প্রভজিৎ ভাটিয়াও ইয়ালৈ নাহে। বি চি চি আইৰ বৰ্তমানৰ ভাৰপ্ৰাপ্ত সভাপতি ৰাজীৱ শুল্কা এছিয়ান ক্রিকেট পৰিষদৰ কাৰ্যনিৰ্বাহক ব'ৰ্ডৰো সদস্য। সেয়েহে তেওঁক ভাৰত-পাকিস্তানৰ মেচ শেষ হোৱাৰ পাছত কেমেৰাত দেখা পোৱাৰ সম্ভাৱনা আছে বুলি কোৱা হৈছে। ইফালে বি চি চি আইৰ প্রাক্তন সচিব তথা এ চি চিৰ পূৰ্বৰ অধ্যক্ষ আৰু বৰ্তমানৰ আন্তঃৰাষ্ট্ৰীয় ক্রিকেট পৰিষদৰ সভাপতি জয় শ্বাহ বর্তমান আমেৰিকাত আছে। জয় শ্বাহৰ কাৰ্যালয় ডুবাইত। কিন্তু তেওঁ এখন বৈঠকত উপস্থিত থকাৰ কাৰণে বর্তমান ডুবাইত নাই।

Share This