দিল্লীত ৰাজনাথ সিঙৰে বৈঠক মুখ্যমন্ত্রী ড° শৰ্মাৰ

dainik janambhumi June 01, 2025

ডিজিটেল ডেস্ক : নতুন দিল্লীত শনিবাৰে দেশৰ প্ৰতিৰক্ষা মন্ত্রী ৰাজনাথ সিঙৰ সৈতে এখন গুৰুত্বপূর্ণ বৈঠকত মিলিত হয় মুখ্যমন্ত্রী ড" হিমন্ত বিশ্ব শর্মা। উক্ত বৈঠকত অসমত প্রতিৰক্ষা কৰিড'ৰ স্থাপনৰ বিষয়ে আলোচনা কৰা হয়। এই পদক্ষেপে পূর্ব সীমান্তত দেশৰ সশস্ত্র বাহিনীৰ স্থিতি শক্তিশালী কৰাৰ প্ৰধানমন্ত্ৰীৰ 'মেক ইন ইণ্ডিয়া'ৰ দৃষ্টিভংগীক সহযোগিতা আগবঢ়োৱা তথা উত্তৰ-পূবত নতুন অর্থনৈতিক সম্ভাৱনা সৃষ্টিকে ধৰি বহুকেইটা উদ্দেশ্য সাধন কৰিব। অচিৰেই যোৰহাট আৰু দিল্লীৰ মাজত পোনপটীয়া বিমান সেৱা আৰম্ভ হ'ব। শনিবাৰে এই কথা প্রকাশ কৰিছে মুখ্যমন্ত্রী ড' হিমন্ত বিশ্ব শর্মাই। 

ছ'চিয়েল মিডিয়া যোগে মুখ্যমন্ত্রীয়ে কয় যে ইণ্ডিগ'ৰ জৰিয়তে অসমৰ আকাশী যাতায়াতৰ সম্প্ৰসাৰণ ঘটোৱা হ'ব। শেহতীয়াকৈ নতুন দিল্লীত ইণ্ডিগ'ৰ নেতৃত্বৰ সৈতে হোৱা বৈঠকত শিলচৰ, ডিব্ৰুগড় আৰু উত্তৰ লখিমপুৰলৈ বিমান সংযোগৰ সম্প্ৰসাৰণ কৰিবলৈ আহ্বান জনাইছিলোঁ বুলি অৱগত কৰি মুখ্যমন্ত্রীয়ে লগতে কয় যে ইণ্ডিগ'ই এই ক্ষেত্ৰত ইতিবাচক সঁহাৰি জনাইছে। সেই অনুসৰি দিল্লী-ডিব্ৰুগড় বিমানো গুৱাহাটী হৈ যাব যাতে অসমৰ দুয়োখন ৰাজধানীৰ মাজত পুৱাৰ ভাগতে সংযোগ স্থাপন হয়। আনহাতে, যাত্রীৰ দীর্ঘদিনীয়া দাবীৰ প্রতি লক্ষ্য ৰাখি ইণ্ডিগ'ই পুৱা গুৱাহাটী-শিলচৰ খণ্ডত নতুনকৈ বিমান সেৱা আৰম্ভ কৰিব বুলি জনাই মুখ্যমন্ত্ৰীগৰাকীয়ে লগতে কয়-২০২৫-২৬ৰ শীতকালীন সময়ৰ পৰা গুৱাহাটীৰ পৰা নৱী মুম্বাইলৈকো নতুন বিমান সেৱা আৰম্ভ হ'ব। 

শীঘ্ৰে উত্তৰ লখিমপুৰৰ লীলাবাৰী বিমান বন্দৰৰ পৰাও বিমান সেৱা আৰম্ভ কৰাৰ বাবে ইণ্ডিগ'ই চেষ্টা চলাব। মুখ্যমন্ত্ৰীগৰাকীৰ মতে, 'দিল্লী আৰু যোৰহাটৰ মাজত পোনপটীয়া বিমান সেৱা আৰম্ভ হোৱাটো এক উল্লেখযোগ্য পদক্ষেপ হিচাপে চিহ্নিত হৈছে। ইণ্ডিগ'ৰ তৎকালীন সঁহাৰিৰ বাবে আমি অসমৰ জনসাধাৰণৰ হৈ আন্তৰিকতাৰে শলাগ লৈছোঁ আৰু আমাৰ ৰাজ্যৰ জনসাধাৰণক মানসম্পন্ন সেৱা প্রদানৰ ক্ষেত্ৰত তেওঁলোকৰ অধিৰত প্রচেষ্টাৰ বাবে আগ্রহেৰে বাট চাইছোঁ।'

Share This