ছিংগাপুৰৰ ৰাষ্ট্ৰপতি, বৈদেশিক মন্ত্রীক সাক্ষাৎ মুখ্যমন্ত্রী ড° শৰ্মাৰ

dainik janambhumi February 12, 2025

ডিজিটেল ডেস্ক: এডভান্টেজ আছাম-২.০ৰ প্ৰচাৰৰ বাবে ছিংগাপুৰত উপস্থিত হোৱা মুখ্যমন্ত্ৰী ড° হিমন্ত বিশ্ব শৰ্মাই ছিংগাপুৰৰ ৰাষ্ট্ৰপতি থাৰমান ছানমুগাৰাটনামক সাক্ষাৎ কৰে। এই সাক্ষাৎ কালত ছিংগাপুৰৰ ৰাষ্ট্ৰপতিগৰাকীৰ সৈতে এছিয়ান দেশৰ সৈতে ভাৰতৰ সম্পৰ্ক সুদৃঢ় কৰাৰ ক্ষেত্ৰত অসমৰ ভূমিকা সম্পর্কে মুখ্যমন্ত্রী ড° শর্মাই আলোচনা কৰে। এই আলোচনাত মুখ্যমন্ত্ৰীগৰাকীয়ে আগন্তুক এডভাণ্টেজ আছাম ২.০ বিনিয়োগ সন্মিলনৰ বিষয়ে অৱগত কৰি দুবছৰৰ পূৰ্বে ৰাষ্ট্ৰপতিগৰাকীৰ অসম ভ্ৰমণৰ কথাও ৰোমন্থন কৰে। 

উল্লেখযোগ্য যে ২০২২ চনত ছিংগাপুৰৰ ৰাষ্ট্ৰপতিগৰাকীয়ে অসম ভ্ৰমণ কৰিছিল। এই সাক্ষাতৰ পাছত মুখ্যমন্ত্ৰীগৰাকীয়ে ছ'চিয়েল মিডিয়াযোগে কয়- এডভাণ্টেজ আছামৰ দ্বিতীয় সংস্কৰণত ছিংগাপুৰৰ অংশীদাৰিত্বৰ বাবে আমি তেখেতসকলক গভীৰভাৱে শলাগ লৈছোঁ। ছেমি কণ্ডাক্টৰ, সেউজ শক্তি আৰু উন্নত প্ৰযুক্তিৰ দৰে আমাৰ উদীয়মান খণ্ডসমূহত তেখেতসকলৰ সৈতে সহযোগিতামূলক সম্পর্কক সবলীকৰণৰ আমি পোষকতা কৰিছোঁ।' আনহাতে ৰাষ্ট্ৰপতিগৰাকীক সাক্ষাতৰ পাছত মুখ্যমন্ত্ৰী ড° শৰ্মাই ছিংগাপুৰৰ বৈদেশিক পৰিক্ৰমা মন্ত্রী ভিভিয়ান বালাকৃষ্ণণক সাক্ষাৎ কৰে। তেওঁৰ সৈতে হোৱা আলোচনাত ভাৰতৰ এক্ট ইষ্ট পলিচিৰ অধীনত বিদেশী ৰাষ্ট্ৰৰ সৈতে অসমৰ বৰ্তমানৰ সম্পৰ্ক সুদৃঢ় কৰাৰ সন্দৰ্ভত মুখ্যমন্ত্ৰীগৰাকীয়ে গুৰুত্ব আৰোপ কৰে। এই সন্দর্ভত মুখ্যমন্ত্রী শর্মাই কয় যে ভাৰতৰ এক্ট ইষ্ট পলিচিৰ সামগ্রিক পৰিকাঠামোৰ অধীনত অসম আৰু ছিংগাপুৰ গণৰাজ্যৰ মাজত অংশীদাৰিত্ব সুদৃঢ় কৰাৰ দিশত আলোচনা কৰা হয়। ইয়াৰ পূৰ্বে ছিংগাপুৰৰ অৰ্ধপৰিবাহী খণ্ডৰ ঔদ্যোগিক নেতাসকলকো সাক্ষাৎ কৰে মুখ্যমন্ত্রী শৰ্মাই। এই সাক্ষাৎ কালত ভাৰত-ছিংগাপুৰৰ সম্পৰ্ক শক্তিশালী কৰাত গুৰুত্ব আৰোপ কৰাৰ লগতে জাগীৰোডৰ ইলেক্ট্রনিক চহৰত অংশীদাৰ হ'বলৈ ড° শৰ্মাই সকলোকে আমন্ত্রণ জনায়। 

এই বৈঠকত এ এছ এম পি টি, এ ই এম, বেছি, টামাছেক, ছিলিকন বক্স, নিট্টো ডেংকো কর্প, হেলাৰ ইণ্ডাষ্ট্ৰিজ আৰু মেইনধাৰ্ট গ্ৰুপৰ নেতাসকল উপস্থিত থাকে। মুখ্যমন্ত্রী ড° শর্মাই ছিংগাপুৰ আই টি ইৰ শিক্ষা সেৱাৰ মুখ্য কাৰ্যবাহী বিষয়া সুৰেশ নটৰাজন আৰু তেওঁৰ দলৰ সৈতেও এক বিশেষ বৈঠকত মিলিত হয়। কাৰিকৰী শিক্ষা, কৰ্মশক্তিৰ তৎপৰতা আৰু সামাজিক গতিশীলতা উন্নত কৰিবলৈ দক্ষ কৰ্মশক্তিৰ এক বৃহৎ গোট বিকশিত কৰাৰ দিশত তেওঁলোকৰ দৃষ্টিভংগী মুখ্যমন্ত্রীয়ে জানিব খোজে। এই বৈঠকৰ পাছত মুখ্যমন্ত্ৰীগৰাকীয়ে কয় যে আগন্তুক মাহত আমি অসম দক্ষতা বিশ্ববিদ্যালয় আৰু আই টি ই-ছিংগাপুৰৰ মাজত ঘনিষ্ঠ সহযোগিতামূলক কৰ্মৰাজি দেখিবলৈ পাম। আমি ব্যক্তিগত খণ্ডৰ লগতে অসমত বিশ্ব দক্ষতা কেন্দ্ৰ স্থাপনৰ ক্ষেত্ৰতো তেওঁলোকৰ সহযোগিতা বিচাৰিছোঁ। ইফালে ছিংগাপুৰত লো চেৰ এক আৰু তেওঁৰ দলৰ সৈতে অসমত চাৰ্বানা জুৰঙৰ বিদ্যমান প্রকল্পসমূহৰ পৰ্যালোচনা কৰে মুখ্যমন্ত্ৰী ড° শৰ্মাই। ছিংগাপুৰৰ নগৰ পৰিকল্পনাৰ বিশেষ দক্ষতাৰ জৰিয়তে অসমৰ ভৱিষ্যতৰ চহৰ আৰু ঔদ্যোগিক উদ্যান নিৰ্মাণ তথা আমাৰ লোকসকলৰ জীৱন ধাৰণৰ সহজতা বৃদ্ধিৰ দিশত কাম কৰাৰ পোষকতা কৰি মুখ্যমন্ত্ৰীয়ে সকলোকে এডভাণ‌টেজ আছামৰ দ্বিতীয় সংস্কৰণৰ বাবে নিমন্ত্রণ জনায়। উল্লেখযোগ্য, যে দক্ষিণ কোৰিয়া-জাপানৰ পাছত এডভাণ্টেজ আছাম ২.০ সন্মিলনৰ বাবে বিনিয়োগকাৰীৰ সন্ধান বিচাৰি ছিংগাপুৰ ভ্ৰমণ কৰিছে মুখ্যমন্ত্ৰী ড° শৰ্মাই।তেওঁ দেশখনৰ আন বহু কেইগৰাকী উদ্যোগীৰ সৈতে বৈঠকত মিলিত হ'ব।

Share This