চেম্পিয়নছ ট্ৰফীত চেম্পিয়ন ভাৰত

dainik janambhumi March 10, 2025

ডিজিটেল ডেস্ক : সমগ্র প্রতিযোগিতাখনত অবিজিত থাকি চেম্পিয়নছ ট্ৰফীৰ খিতাপ জয় কৰিলে ভাৰতে। নিউজিলেণ্ডক প্রতিযোগিতাখনৰ ফাইনেলত ৪ উইকেটত হৰুৱাই তৃতীয়বাৰলৈ চেম্পিয়নছ ট্ৰফীৰ খিতাপ তুলি ধৰে ৰোহিত শর্মা বাহিনীয়ে। ৰোহিতৰ অধিনায়কোচিত ৮৩টা বলত ৭৬ আৰু শ্রেয়াষ আয়াৰৰ ৬২টা বলত ৪৮ ৰানৰ সহায়ত ভাৰতে ৪৯ অ'ভাৰত ছটা উইকেট হেৰুৱাই ২৫৪ ৰান কৰি জয় সাব্যস্ত কৰে। ৰবীন্দ্ৰ জাদেজাই ৪ কোবাই খেল সামৰাৰ বিপৰীতে লোকেশ ৰাহুলে দৃঢ়তাপূর্ণ বেটিঙেৰে ৩৪ ৰানৰ উপযোগী অবিজিত বৰঙনি যোগায়। বিৰাট কোহলী (১) ব্যর্থ হ'লেও শুভমন গীলে ৩১, অক্ষৰ পেটেলে ২৯, হার্দিক পাণ্ডিয়াই ১৮ ৰানৰ অৱদান যোগায়। 

ইফালে, নিউজিলেণ্ডে যুঁজ দিলেও ভাৰতক জয়ৰ পৰা বঞ্চিত কৰিব নোৱাৰিলে। ভাৰতে তেনেদৰেই ২৫ বছৰৰ আগেয়ে নিউজিলেণ্ডৰ হাতত চেম্পিয়নছ ট্ৰফীৰ ফাইনেলত পৰাজয়ৰ পোতক তোলে। ২০০০, চনত সেইবাৰ নিউজিলেণ্ডে সৌৰভ গাংগুলী নেতৃত্বাধীন ভাৰতক ফাইনেলত হৰুৱাইছিল। এইবাৰ ৰোহিত বাহিনীয়ে সেই পৰাজয়ৰ প্ৰতিশোধ পূৰণ কৰে। ভাৰতে ইয়াৰ আগেয়ে ২০০২ আৰু ২০১৩ চনত খিতাপ লাভ কৰিছিল। দেওবাৰৰ ফাইনেলত লক্ষ্য অনুসৰণৰ পথত কেই বাটাও অস্বস্তিকৰ মুহূৰ্ত একাষৰীয়া কৰি ভাৰতে ৯ মাহৰ ভিতৰত দ্বিতীয়টো আই চি চি ট্রফী জয় কৰে। যোৱা বছৰৰ জুন মাহত টি-২০ বিশ্ব কাপৰ খিতাপ লাভকৰিছিল ভাৰতে। ৯ মাহত অধিনায়ক হিচাপে আৰু ১টা আই চি চি খিতাপ জয় কৰে ৰোহিতে। ইয়াৰ আগেয়ে ডাৰিল মিচেল আৰু মাইকেল ব্ৰেচৱেলৰ সময়োপযোগী অর্ধ-শতৰানৰ সহায়ত নিউজিলেণ্ডে পোনতে বেট ধৰি ৭ উইকেটত ২৫১ ৰানৰ প্ৰত্যাহ্বানমূলক স্ক'ৰ থিয় কৰিছিল। ডাৰিল মিচেলে সর্বাধিক ৬৩ ৰান কৰাৰ বিপৰীতে শেষৰফালে ব্ৰেচৱেলে অবিজিত ৫৩ ৰানৰ অৱদান যোগায়। ভাৰতৰ ৪জনীয়া স্পীন আক্রমণ বিভাগে হিচাপী প্রদর্শন দাঙি ধৰিলেও ফিল্ডাৰৰ পৰা পৰ্যাপ্ত সহযোগিতা নাপালে। ভাৰতীয় ফিল্ডাৰে ৪টা কেচ নষ্ট কৰে। 

ভাৰতৰ বলিং প্ৰদৰ্শনৰ মূল স্থপতি আছিল বৰণ চক্ৰৱৰ্তী (২-৪৫) আৰু কুলদীপ যাদৱ (২-৪০)। আনহাতে, ৰবীন্দ্ৰ জাদেজা (১-৩০) আৰু অক্ষৰ পেটেলে (০-২৯) নিউজিলেণ্ডৰ বেটাৰক চাপত ৰাখিবলৈ সক্ষম হৈছিল। মহম্মদ ছামিয়ে ৭৪ ৰান খৰচ কৰি লাভ কৰে ১টা উইকেট। নিউজিলেণ্ডৰ ইনিংছত ৰাচিন ৰবীন্দ্ৰই ৩৭, গ্লেন ফিলিপছে ৩৪ আৰু উইল ইয়ভে ১৫ ৰানৰ উপযোগী বৰঙনি আগবঢ়ায়। ইফালে নতুন দিল্লীৰ পৰা পোৱা বাতৰি মতে প্ৰধানমন্ত্ৰী নৰেন্দ্ৰ মোদীয়ে ৰোহিত শৰ্মাৰ নেতৃত্বৰ টিম ইণ্ডিয়াক অভিনন্দন জনাইছে। প্রধানমন্ত্রীয়ে 'এক্স'ত কয় 'অসাধাৰণ খেল আৰু এক অসাধাৰণ ফল। আই চি চি চেম্পিয়নছ ট্ৰফীৰ ঘৰলৈ লৈ অনাৰ বাবে ভাৰতীয় দলক লৈ গৌৰৱ বোধ কৰিছো। তেওঁলোকে প্রতিযোগিতাত ভাল প্রদশন কৰিলে। সুন্দৰ প্ৰদৰ্শনৰ বাবে আমাৰ দলটোলৈ অভিনন্দন।'

Share This