২৫ বছৰৰ মূৰত প্ৰতিশোধৰ সুযোগ 

dainik janambhumi March 09, 2025

ডিজিটেল ডেস্ক : আই চি চি চেম্পিয়ন্‌ছ ট্ৰফীৰ ফাইনেলখন কাইলৈ ডুবাইত অনুষ্ঠিত হ'ব। প্রতিযোগিতাৰ ফাইনেলত ভাৰতে নিউজিলেণ্ডৰ বিৰুদ্ধে প্রতিদ্বন্দ্বিতা কৰিব। মন কৰিবলগীয়া যে ভাৰতে আজিৰ ফাইনেলত নিউজিলেণ্ডক পৰাজিত কৰি ২৫ বছৰৰ মূৰত প্রতিশোধ লোৱাৰ সুন্দৰ সুযোগ লাভ কৰিছে। ২৫ বছৰৰ আগতে, অর্থাৎ ২০০০ চনত চেম্পিয়ন্‌ছ ট্ৰফীৰ ফাইনেলত নিউজিলেণ্ডে ভাৰতক পৰাজিত কৰি খিতাপ জয় কৰিছিল। আনহাতে, আজি ভাৰত জয়ী হ'ব পাৰিলে ১২ বছৰৰ পাছত পুনৰ খিতাপ জয় কৰাটো নিশ্চিত হ'ব। 

উল্লেখযোগ্য যে ভাৰত এইবাৰৰ প্রতিযোগিতাত এতিয়ালৈকে অপৰাজিত হৈ আছে। আনহাতে নিউজিলেণ্ড এইবাৰৰ প্রতিযোগিতাত এখন মেচত পৰাজিত হৈছে আৰু সেই মেচখন আছিল ভাৰতৰ বিৰুদ্ধে। আনহাতে, আই চি চিৰ এদিনীয়া প্রতিযোগিতাত এতিয়ালৈকে খেলা ১২খন মেচৰ ভিতৰত সমান সংখ্যক মেচত জয়ী হৈছে দুয়োটা দল। এদিনীয়া বিশ্ব কাপত ভাৰত আৰু নিউজিলেণ্ড এতিয়ালৈকে ১০বাৰ পৰস্পৰৰ মুখামুখি হৈছে আৰু ইয়াৰে পাঁচবাৰ ভাৰত আৰু সমসংখ্যক মেচত নিউজিলেণ্ড জয়ী হৈছে। ২০২৩ চনৰ এদিনীয়া বিশ্ব কাপত গ্রুপ পর্যায়ত আৰু ছেমি ফাইনেলত দুয়োটা দলে পৰস্পৰৰ বিৰুদ্ধে খেলিছিল আৰু দুয়োবাৰ ভাৰত জয়ী হৈছিল। আনহাতে, চেম্পিয়ন্‌ছ ট্ৰফীত দুয়োটা দলে পৰস্পৰৰ মুখামুখি হৈছে আৰু ইয়াৰে ২০০০ চনৰ ফাইনেলত নিউজিলেণ্ড জয়ী হয়। 

আনহাতে, এইবাৰৰ গ্ৰুপ পর্যায়ত নিউজিলেণ্ড জয়ী হৈছে। মন কৰিবলগীয়া যে এইবাৰৰ চেম্পিয়ন ট্রফীৰ আয়োজক পাকিস্তান, কিন্তু ভাৰতে দেশখনত খেলিবলৈ অমান্তি হয়। ইয়াৰ ফলত ভাৰতৰ খেলসমূহ ডুবাইত অনুষ্ঠিত হৈছে। মন কৰিবলগীয়া যে ডুবাইত প্রতিযোগিতাৰ সকলো মেচ খেলাৰ সুবিধা লাভ কৰিছে বুলি বিভিন্ন পক্ষই মত প্রকাশ কৰিছে। আনহাতে, ডুবাইত ভাৰত কেতিয়াও পৰাজিত হোৱা নাই। এতিয়ালৈকে ইয়াত খেলা ৯খন মেচৰ কেউখনতে ভাৰত জয়ী হৈছে। 

আনহাতে, ডুবাইৰ পিটচে ভাৰতীয় স্পীনাৰক সহায় কৰিছে। অৱশ্যে নিউডিজলেণ্ডৰ স্পীন আক্রমণ উল্লেখনীয়। মিচেল ছেণ্টনাৰ, মাইকেল ব্ৰেছৱেল আৰু গ্লেন ফিলিপৰ দৰে স্পীনাৰ দলটোৰ শক্তিশালী অস্ত্র। প্রতিযোগিতাত ভাৰতে প্রথমে বেটিং কৰিও জয়লাভ কৰিছে আৰু দ্বিতীয় ইনিংছত বেটিং কৰিও নিৰ্ধাৰিত লক্ষ্য সহজে অতিক্ৰম কৰিছে। আজিৰ মেচখনত ছেমি ফাইনেলৰ দলটোৱেই খেলাৰ সম্ভাৱনা আছে। আজিৰ মেচখন বিয়লি ২-৩০ বজাৰ পৰা আৰম্ভ হ'ব।

Share This