ফিল্ডিঙত কোহলীৰ অভিলেখ

dainik janambhumi March 05, 2025

ডিজিটেল ডেস্কঃ অষ্ট্ৰেলিয়াৰ বিৰুদ্ধে আই চি চি চেম্পিয়নছ ট্ৰফীৰ মঙলবাৰৰ প্ৰথম ছেমি ফাইনেলৰ সময়ত ভাৰতৰ তাৰকা বেটাৰ বিৰাট কোহলীয়ে ফিল্ডিঙত উল্লেখনীয় ৰেকৰ্ডৰ গৰাকী হয়। অষ্ট্ৰেলিয়াৰ ইনিংছৰ ২৭সংখ্যক অ'ভাৰত জুছ ইংলিছৰ
কেচ আয়ত্ত কৰি এক অভিলেখ গঢ়ে তেওঁ।

ৰবীন্দ্র জাদেজাৰ বলত অষ্ট্ৰেলিয়ান উইকেটকীপাৰ-বেটাৰ ইংলিছে তুলি দিয়া কেচ ধৰি খেলবিধৰ কেউটা সংস্কৰণ মিলি আন্তর্জাতিক খেলত ভাৰতীয় ফিল্ডাৰ হিচাপে ৰাহুল দ্রাবিড়ৰ ৩৩৪টা কেচৰ ৰেকৰ্ড ম্লান কৰে কোহলীয়ে। বর্তমান কোহলীৰ নামত আছে ৩৩৬টা কেচ।

কোহলীয়ে ৫৪৯খন আন্তর্জাতিক মেচত সেই কৃতিত্ব অর্জন কৰে। কোহলীয়ে ইয়াৰ উপৰি এদিনীয়া ক্রিকেটত ফিল্ডাৰ হিচাপে ৰিকী পণ্টিঙৰ অভিলেখ অতিক্রম কৰে।

৩৬ বছৰীয়া কোহলীয়ে অষ্ট্ৰেলিয়াৰ ইনিংছত দুটা কেচ আয়ত্ত কৰি পণ্টিঙৰ ৰেকৰ্ড ভংগ কৰে। পণ্টিঙৰ ১৬০টা কেচৰ বিপৰীতে কোহলীৰ কেচৰ সংখ্যা হ'ল ১৬১টা। কোহলীয়ে ৩০১খন এদিনীয়াত ১৬১টা কেচ আয়ত্ত কৰি ফিল্ডাৰ হিচাপে এদিনীয়াত সর্বকালৰ সৰ্বাধিক কেচ ধৰাৰ তালিকাত শ্রীলংকাৰ মাহেলা জয়বর্ধনেৰ (২১৮টা কেচ) পাছত দ্বিতীয় স্থানত ৰৈছে।

Share This