ছেমি ফাইনেলত অষ্ট্ৰেলিয়াৰ বিৰুদ্ধে ভাৰত

dainik janambhumi March 03, 2025

ডিজিটেল ডেস্ক: ভাৰতে আই চি চি চেম্পিয়নছ ট্রফীত অষ্ট্ৰেলিয়াৰ বিৰুদ্ধে ছেমি ফাইনেল খেলিব। নিউজিলেণ্ডক সোমবাৰে প্রতিযোগিতাখনৰ অন্তিমখন লীগ খেলত ৪৪ ৰানত হৰুৱাই ভাৰতে গ্রুপ 'এ'-ত শীর্ষ স্থান দখল কৰে। সেই অনুসৰি ভাৰতে গ্ৰুপ 'বি'-ৰ দ্বিতীয় স্থান দখলকাৰী অষ্ট্ৰেলিয়াৰে আজি প্ৰথমখন ছেমি ফাইনেলত মুখামুখি হ'ব। আনহাতে, বুধবাৰে নিউজিলেণ্ড আৰু দক্ষিণ আফ্ৰিকাৰ মাজত অনুষ্ঠিত হ'ব দ্বিতীয়খন ছেমি ফাইনেল। ভাৰতে কালিৰ খেলখনত প্রথমে বেট ধৰি ৯ উইকেটত ২৪৯ ৰান কৰে। প্ৰত্যুত্তৰত নিউজিলেণ্ডে বৰুণ চক্ৰৱৰ্তীৰ বিধ্বংসী বলিঙত তিষ্ঠিব নোৱাৰি ৪৫.৩ অ'ভাৰত ২০৫ ৰানত কেউটা উইকেট হেৰুৱায়। 

নিউজিলেণ্ডৰ হৈ কেন উইলিয়ামছনে ১২০টা বল খেলি ৭টা চাৰিৰে ৮১ ৰান কৰিলেও দলক জয়ৰ লক্ষ্যলৈ তুলি নিয়াত ব্যর্থ হয়। অধিনায়ক মিচেল ছাণ্টনাৰে ২৮ আৰু উইল ইয়ঙে ২২ ৰানৰ অৱদান যোগায়। ৪২ ৰানত বৰুণে ৫টা উইকেট দখল কৰাৰ বিপৰীতে কুলদীপ যাদৱে ২টা আৰু হার্দিক পাণ্ডিয়া, অক্ষৰ পেটেল আৰু ৰবীন্দ্ৰ জাদেজাই এটাকৈ উইকেট দখল কৰে। ইয়াৰ আগেয়ে শ্রেয়াস আয়াৰৰ (৭৯) দৃঢ়তাপূর্ণ অর্ধ-শতৰান সত্ত্বেও নিউজিলেণ্ডৰ পেচাৰ মাৰ্ক হেনৰীয়ে দখল কৰা ৫টা উইকেটৰ সহায়ত ভাৰতক ৯ উইকেটত ২৪৯ ৰানত সীমিত ৰাখিছিল। দলীয় স্ক'ৰ ৩০ ৰানতে শুভমন গীল (২), অধিনায়ক ৰোহিত শর্মা (১৫) আৰু বিৰাট কোহলী (১১) আউট হােৱাত শ'লঠেকত পৰে ভাৰত। 

দলক বিপৰ্যয়ৰ পৰা উদ্ধাৰ কৰে শ্রেয়াস আয়াৰে। ৯৮টা বলত ৪টা চাৰি আৰু দুটা ছয়েৰে ৭৯ বানত ক্রিজ এৰাৰ আগেয়ে শ্রেয়াসে অক্ষৰ পেটেলৰে (৬১টা বলত ৪২ ৰান) মিলি চতুর্থ উইকেটত ৯৮ ৰানৰ গুৰুত্বপূৰ্ণ যুটি বান্ধে। আনহাতে, টপ-অৰ্ডাৰৰ ব্যৰ্থতাৰ পাছত শেষৰফালে হার্দিক পাণ্ডিয়াই ৪৫টা বলত খৰতকীয়াকৈ ৪৫ ৰানৰ উপযোগী ইনিংছ খেলে। নিউজিলেণ্ডৰ হেনৰীয়ে ৪২ ৰানত ৫টা উইকেট দখল কৰি ভাৰতৰ ইনিংছ ৯ উইকেটত ২৪৯ ৰানত সীমিত ৰাখিবলৈ সক্ষম হয়।

Share This