ভাৰত-বাংলাদেশ মৈত্রী বাছ সেৱা পুনৰ আৰম্ভ

dainik janambhumi February 22, 2026

ডিজিটেল ডেস্ক: বাংলাদেশত তাৰেক ৰহমানৰ নেতৃত্বত নতুন চৰকাৰে কাৰ্যভাৰ গ্ৰহণ কৰাৰ পাছত দুয়োখন দেশৰ মাজৰ সম্পৰ্ক পুনৰ উন্নত হোৱাৰ দিশত আগবাঢ়িছে। বাংলাদেশে ভাৰতত ভিছা সেৱা আৰম্ভ কৰাৰ পাছত আগৰতলাৰ পৰা ঢাকা হৈ কলকাতাক সংযোগ কৰা ৰয়েল-মৈত্রী আন্তঃৰাষ্ট্ৰীয় বাছ সেৱাও কালি পৰীক্ষামূলকভাৱে আৰম্ভ কৰা হয়। এই বাছ সেৱা ২৪ ফেব্ৰুৱাৰীৰ পৰা আনুষ্ঠানিকভাৱে আৰম্ভ কৰা হ'ব। 

উল্লেখযোগ্য যে বাংলাদেশত ছাত্র আন্দোলনৰ ফলত তদানীন্তন প্রধানমন্ত্রী শ্বেখ হাছিনাৰ ভাৰতত আশ্রয় গ্রহণ আৰু তাৰ পাছত দেশখনত সৃষ্টি হোৱা পৰিস্থিতিৰ পৰিপ্ৰেক্ষিতত এই বাছ সেৱা স্থগিত ৰখা হৈছিল। চৰকাৰী বিষয়াসকলে কয় যে এই বাছ সেৱা পুনৰ আৰম্ভ কৰাৰ আগে আগে কালি পৰীক্ষামূলকভাৱে যাত্রীবাহী বাছ সেৱা আৰম্ভ কৰা হয়। ইণ্টাৰনেশ্যনেল বাছ ছাৰ্ভিচ অপাৰেটৰৰ প্ৰবন্ধক মনোৰঞ্জন দেৱনাথে কয় যে যিহেতু দুয়োখন দেশৰ মাজৰ এই বিষয়ক চুক্তি বাতিল কৰা হোৱা নাই, সেয়েহে মৈত্রী বাছ সেৱা আৰম্ভ কৰাৰ কাৰণে পুনৰ অনুমতি লোৱাৰ প্ৰয়োজন নাই। 

ত্ৰিপুৰাৰ মুখ্যমন্ত্রী মাণিক সাহাই বাছ সেৱা পুনৰ আৰম্ভ কৰাৰ বাবে গ্ৰহণ কৰা পদক্ষেপক আদৰণি জনাইছে। এই বাছ সেৱা পুনৰ আৰম্ভ কৰাৰ কাৰণে তেওঁলোকক কর্তৃত্ব দিয়া হৈছে নে নাই বুলি সোধাত দেৱনাথে কয় যে যিহেতু ২০০১ চনত ভাৰত আৰু বাংলাদেশৰ মাজৰ দ্বিপাক্ষিক চুক্তি বাতিল কৰা হোৱা নাই, সেয়েহে বাছ সেৱা আৰম্ভ কৰাৰ বাবে অনুমতি লোৱাৰ প্ৰয়োজন নাই। মুখ্য মন্ত্রী সাহাই কয় যে বাংলাদেশত নির্বাচিত চৰকাৰ গঠন হোৱাৰ পাছত এতিয়া অনিশ্চয়তা আঁতৰিছে। ই দ্বিপাক্ষিক সম্পৰ্কৰ বাবে ভাল লক্ষণ। দেৱনাথে কয় যে বাছ সেৱা পুনৰ আৰম্ভ কৰাৰ বাবে ঢাকাৰ পৰা পশ্চিম ত্ৰিপুৰাৰ কৃষ্ণনগৰ ষ্টেশ্যনলৈ এখন বাছ অনা হয়। 

কালি বাছখনে পৰীক্ষামূলকভাৱে কৃষ্ণনগৰ আস্থানৰ পৰা ঢাকালৈ ৰাওনা হয়। অহা দুই-এদিনৰ বাবে এই পৰীক্ষামূলক বাছ সেৱা অব্যাহত থাকিব। ইয়াৰ পাছত প্ৰক্ৰিয়াটো সুস্থিৰ অৱস্থালৈ আহিলে এসপ্তাহৰ ভিতৰত বাছ সেৱা পুনৰ আৰম্ভ কৰা হ'ব।

Share This