ভাৰতৰ নতুন যুদ্ধ নীতিৰ প্ৰস্তুতি আৰম্ভ 

dainik janambhumi July 29, 2025

ডিজিটেল ডেস্ক : ভাৰতীয় সেনাই সন্ত্রাসবাদ আৰু নতুনধৰণৰ প্ৰত্যাহ্বানৰ সন্মুখীন হোৱাৰ কাৰণে 'নতুন যুদ্ধ নীতি' প্রস্তুত কৰাৰ কাম আৰম্ভ কৰিছে। শেহতীয়াকৈ সীমান্তৰ সিপাৰৰ পৰা পৃষ্ঠপোষকতা কৰা সন্ত্রাসবাদৰ বিৰুদ্ধে যুঁজ আৰু অপাৰেশ্যন সেন্দূৰৰ পৰা পোৱা শিক্ষা এই নতুন যুদ্ধ-নীতিৰ ভেটি হ'ব। ভাৰতৰ নতুন যুদ্ধ নীতিত সন্ত্রাসবাদী আক্রমণক দেশৰ বিৰুদ্ধে যুদ্ধ বুলি গণ্য কৰা হ'ব। আনহাতে, সন্ত্রাসবাদক পোহপাল দিয়া তথা পৃষ্ঠপোষকতা কৰাক চৰকাৰ নীতি হিচাপে লোৱা দেশৰ বিৰুদ্ধে মোকাবিলা কৰাৰ কাৰণে দেশৰ সামৰিক বাহিনী অহর্নিশে সাজু হৈ থাকিব। 

এনেধৰণৰ আক্ৰমণাত্মত নীতি নতুন যুদ্ধ নীতিৰ ভেটি হ'ব। প্রতিৰক্ষা বিভাগে যুদ্ধ নীতিৰ বিভিন্ন দিশক লৈ ক্ষিপ্ৰতাৰে কাম কৰি আছে। নতুন নীতিত প্র'এক্টিভ ডিটেৰেন্স প্রিএম্পটিভ ষ্ট্ৰাইকছ আৰু প্রিভেন্টিভ ব্যৱস্থা গ্রহণ অর্থাৎ শত্রুক প্রথমে ভয় দেখুৱাই বাধা দিয়া, বিপদৰ আশংকা দেখিলে আক্রমণ কৰা আৰু ভবিষ্যতৰ বিপদত আগতেই নিঃশেষ কৰাৰ লক্ষ্য লোৱা হ'ব। চীফ অব ডিফেন্স ষ্টাফৰ (চি ডি এছ) তত্ত্বাৱধানত এই নতুন যুদ্ধ নীতিক চূড়ান্ত ৰূপ দি থকা হৈছে। প্ৰাৰম্ভতে সেনাই এটা ফিউচাৰ ৱাৰফেয়াৰ এনালিছিছ গ্রুপ গঠন কৰে। এই গ্রুপে যুদ্ধৰ বিভিন্ন কলা-কৌশল অধ্যয়ন কৰি প্ৰতিবেদন দাখিল কৰিব। 

এই প্রতিবেদনক ভিত্তি কৰি সেনাৰ প্ৰশিক্ষণ প্রণালী, সামৰিক বাহিনীৰ আধুনিকীকৰণ, অস্ত্র-শস্ত্র ক্রয় আৰু অভিযানৰ পৰিকল্পনাৰ সম্পৰ্কত নতুন নীতি নির্ধাৰণ কৰা হ'ব। ইফালে সেনাৰ কাম-কাজ প্ৰযুক্তিৰ দ্বাৰা পৰিচালিত হোৱাত অধিক গুৰুত্ব আৰোপ কৰা হ'ব। মুখামুখি যুদ্ধ কম হ'ব। আক্ৰমণৰ কাৰণে স্কেল্প, হামাৰ আৰু ব্ৰহ্মছৰ দৰে ক্ষেপণাস্ত্ৰ, প্ৰতিৰক্ষাৰ বাবে আকাশ আৰু স্কাই ষ্ট্ৰাইকাৰৰ দৰে ড্ৰোনৰ সংখ্যা বৃদ্ধি কৰা হ'ব। যুদ্ধৰ প্রস্তুতি এনেধৰণেৰে চলোৱা হ'ব শত্রুক কেনে ধৰণেৰে প্রত্যুত্তৰ দিয়া হ'ব তাৰ কোনো উমানেই নাপাব।

Share This