লাডাখত চীনে দুখন নতুন গাঁও স্থাপনক লৈ অসন্তুষ্ট ভাৰত

dainik janambhumi March 24, 2025

ডিজিটেল ডেস্ক : চীনা সৈন্যই লাডাখত দুখন নতুন গাঁও স্থাপন কৰাৰ তথ্য প্রকাশ পাইছে। এই তথ্য প্ৰকাশ পোৱাৰ পাছতে ভাৰত চৰকাৰে দেশখনৰ ওচৰত ইয়াৰ তীব্র প্রতিবাদ জনাইছে। ভাৰতে কূটনৈতিক মাধ্যমেৰে ইয়াৰ প্ৰতিবাদ কৰি দেশখনক স্পষ্টভাৱে জনাই দিয়ে যে এনেধৰণৰ কার্যকলাপ কোনোপধ্যেই গ্রহণযোগ্য নহয়। ভাৰত চৰকাৰৰ তৰফৰ পৰা কোৱা হয় যে উক্ত অঞ্চলটোত চীনৰ বেদখলক ভাৰতে কেতিয়াও মানি নলয়। 

উল্লেখযোগ্য যে চীনে অলপতে হোটন প্রদেশত দুখন নতুন গাঁও স্থাপন কৰাৰ কথা ঘোষণা কৰিছিল। এই গাঁও দুখনৰ একাংশ ভাৰতৰ লাডাখ কেন্দ্রীয়শাসিত অঞ্চলৰ ভিতৰত পৰিছে। সংসদত অলপতে এই বিষয়টো উত্থাপন কৰি চীনৰ বিৰুদ্ধে কি ব্যৱস্থা গ্ৰহণ কৰা হৈছে বুলি সোধা প্ৰশ্নৰ উত্তৰত বৈদেশিক পৰিক্ৰমা দপ্তৰৰ ৰাজ্যিক পৰ্যায়ৰ মন্ত্ৰী কীৰ্তি বর্ধনে কয় যে চৰকাৰে এই নিৰ্মাণকাৰ্যৰ বিৰোধিতা কৰি চীনৰ ওচৰত আপত্তি দাখিল কৰিছে। তেওঁ লগতে কয় যে চীনে অঞ্চলটোক আন্তঃগাঁথনিৰ বিকাশ কৰি থকা বুলিও চৰকাৰে তথ্য লাভ কৰিছে। 

মন্ত্ৰীজনে কয়, 'ভাৰত চৰকাৰে ভাৰতীয় অঞ্চলত চীনৰ দখল কেতিয়াও মানি লোৱা নাই। নতুন গাঁও নির্মাণে অঞ্চলটোত ভাৰতৰ সাৰ্বভৌমত্বক লৈ দীর্ঘ দিন গ্ৰহণ কৰি অহা স্থিতিক প্ৰভাৱিত নকৰে আৰু চীনৰ এই অবৈধ তথা বলপূর্বক দখলক বৈধ বুলি ভাৰতে গ্ৰহণ নকৰে। ইয়াৰ অৰ্থ হ'ল ভাৰতে চীনৰ এই পদক্ষেপ কোনোপধ্যেই মানি নলয়।' তেওঁ লগতে কয় যে ভাৰত চৰকাৰে দেশখনৰ নিৰাপত্তাত প্ৰভাৱ পেলাব পৰা সকলো ঘটনাৰ ওপৰত সতৰ্ক দৃষ্টি ৰাখিছে আৰু নিজৰ অখণ্ডতা তথা সাৰ্বভৌমত্ব ৰক্ষাৰ বাবে প্ৰয়োজনীয় সকলো ব্যৱস্থা গ্রহণ কৰিছে। মন্ত্ৰীজনে লগতে কয় যে ভাৰতে চীন সীমান্তত নতুন পথ, সুৰংগ তথা দলঙৰ ক্ষিপ্ৰতাৰে নিৰ্মাণকাৰ্য চলাই আছে। ইয়াৰ দ্বাৰা স্থানীয় লোকৰ বাবে যোগাযোগ ব্যৱস্থা উন্নত হৈছে আৰু নিৰাপত্তা বাহিনীসমূহৰো সুবিধা হৈছে।

Share This