ভাৰত-পাকিস্তান সেনাৰ ফ্লেগ মিটিং

Dainik janambhumi February 22, 2025

ডিজিটেল ডেস্ক: সীমান্ত গুলীয়াগুলী আৰু আই ই ডিৰে আক্ৰমণৰ কেইবাটাও ঘটনা ঘটাৰ পাছত উত্তেজনা হ্রাস কৰাৰ প্ৰচেষ্টা হিচাপে ভাৰত আৰু পাকিস্তানৰ সেনাৰ মাজত শুকুৰবাৰে ফ্লেগ মিটিং হয়। পুঞ্চ জিলাত প্ৰকৃত নিয়ন্ত্ৰণ ৰেখাত (এল অ' চি) সৃষ্টি হোৱা পৰিস্থিতিক লৈ এই বৈঠক অনুষ্ঠিত হয়। চক্কন-দ্য-বাগ ক্রছিং পইণ্টত অনুষ্ঠিত সেনাৰ ব্রিগেডিয়া পৰ্যায়ৰ এই বৈঠকত দুয়োপক্ষই সীমান্তত শান্তি অটুট ৰখাৰ বাবে সন্মতি জনায়। 

প্রায় ৭৫ মিনিটৰ বৈঠকখন পুৱা ১১ বজাৰ আৰম্ভ হয়। সূত্ৰসমূহে প্ৰকাশ কৰা অনুসৰি সৌহার্দ্যপূৰ্ণ পৰিৱেশত আলোচনা হয় আৰু উভয়পক্ষই সীমান্তত শান্তিৰ ব্যাপক স্বাৰ্থৰ প্ৰতি লক্ষ্য ৰাখি যুদ্ধ বিৰতি চুক্তি অব্যাহত ৰখাত সন্মতি জনায়। উল্লেখযোগ্য যে দুয়োখন দেশৰ মাজত হোৱা যুদ্ধ বিৰতি চুক্তি ২০২১ চনৰ ২৫ ফেব্ৰুৱাৰীত নৱীকৰণ কৰা হৈছিল। ইয়াৰ পাছত সীমান্তত যুদ্ধ বিৰতি উলংঘাৰ ঘটনা হ্রাস পাবলৈ ধৰে। উল্লেখযোগ্য যে বিগত কেইদিনমানত সীমান্তৰ পৰিস্থিতি উত্তেজনাপূর্ণ হৈ পৰে। যোৱা ১১ ফেব্ৰুৱাৰীত আখনুৰ ছেক্টৰত পাকিস্তানী সেনাৰ অপ্ৰৰোচিত  গুলীচালনাত ভাৰতৰ দুজনমান জোৱান আহত হয়।

Share This