বিৰাটৰ শতকেৰে পাকিস্তানক হৰুৱাই চেম্পিয়নছ ট্ৰফীৰ ছেমিত ভাৰত

Dainik janambhumi February 24, 2025

ডিজিটেল ডেস্ক: ভাৰতে চেম্পিয়নছ ট্রফীত আজি দ্বিতীয়খন মেচত চিৰন্তন প্রতিদ্বন্দ্বী পাকিস্তানক ছয় উইকেটৰ ব্যৱধানত পৰাজিত কৰে। ভাৰতে প্রতিযোগিতাত একেৰাহে দ্বিতীয় জয়েৰে ছেমি ফাইনেলত স্থান নিশ্চিত কৰে। আনহাতে আয়োজক পাকিস্তান একেৰাহে দ্বিতীয়খন মেচত পৰাজিত হোৱাৰ পাছত প্রতিযোগিতাৰ পৰা আগতীয়াকৈ বিদায় লোৱাৰ সম্ভাৱনা প্রকট হৈ পৰিল। ভাৰতে কালিৰ জয়েৰে ২০১৭ চনৰ চেম্পিয়নছ ট্রফীৰ ফাইনেলত পাকিস্তানৰ হাতত ১৮০ ৰানৰ ব্যৱধানত পৰাজিত হোৱাৰ মধুৰ প্ৰতিশোধো লয়। কালি পাকিস্তানে প্রথমে বেটিং কৰি ভাৰতক জয়ৰ বাবে ২৪১ ৰানৰ জয়ৰ লক্ষ্য বান্ধি দিয়ে। বিৰাট কোহলীৰ চেঞ্চুৰী আৰু শ্রেয়াস আয়াৰৰ অর্ধশতৰানৰ সহায়ত ভাৰতে সহজে ৪৫টা বল বাকী থকা অৱস্থাত চাৰিটা উইকেট হেৰুৱাই জয়ৰ লক্ষ্যত উপনীত হয়। 

ভাৰতে দলীয় স্ক'ৰ ৩১ হওঁতেই অধিনায়ক ৰোহিত শৰ্মাৰ উইকেটটো হেৰুৱায়। ৰোহিতে ১৫টা বলত ৩টা চাৰি আৰু ১টা ছয়েৰে ২০ ৰান কৰে। ইয়াৰ পাছত ক্ৰিজত শুভমন গীলৰ (৪৬) লগ লাগে বিৰাট কোহলী। দুয়ো মিলি দ্বিতীয় উইকেটত ৬৯ ৰান যোগ কৰাৰ সময়তে গীলে বিদায় লয়। ইয়াৰ পাছত কোহলী আৰু শ্রেয়াস আয়াৰে মিলি ভাৰতৰ জয়ৰ ভেটি গঢ়ে। দুয়োৰে মাজত তৃতীয় উইকেটত সংগ্ৰহ হোৱা ১১৪ ৰানে ভাৰতৰ জয় প্রায় নিশ্চিত কৰে। আয়াৰে ৬৭টা বলত ৫টা চাৰি আৰু ১টা ছয়েৰে ৫৬ ৰান কৰে। আয়াৰৰ পাছতে হার্দিক পাণ্ডিয়াই বিদায় লয়। কোহলীয়ে ১১১টা বলত ৭টা চাৰিৰে ১০০ ৰানত অপৰাজিত হৈ থাকে। কোহলীয়ে কালি ১৫ মাহৰ পাছত এদিনীয়াত চেঞ্চুৰী কৰে। আনহাতে তেওঁ কালি আটাইতকৈ কমসংখ্যক এদিনীয়া ইনিংছত ১৪ হাজাৰ ৰান কৰাৰ শচীন টেণ্ডুলকাৰৰ অভিলেখ ভংগ কৰে। কোহলীয়ে ২৯৯খন এদিনীয়াৰ ২৮৭সংখ্যক ইনিংছত এই কৃতিত্ব অর্জন কৰে। শচীনে ৩৫০টা ইনিংছত ১৪ হাজাৰ ৰান সম্পূৰ্ণ কৰিছিল। ইফালে ৰোহিত শর্মায়ো কালি এক ৰান সংগ্ৰহ কৰাৰ লগে লগে শচীন টেণ্ডুলকাৰৰ আন এক অভিলেখ ভংগ কৰে। ৰোহিতে এদিনীয়াত অ'পেনাৰ ৰূপে আটাইতকৈ কমসংখ্যক ইনিংছত ৯ হাজাৰ ৰান সংগ্ৰহ কৰাৰ লগে লগে শচীনৰ অভিলেখ ভংগ হয়। ৰোহিতে ১৮১সংখ্যক এদিনীয়া ইনিংছত ৯ হাজাৰ ৰান সম্পূর্ণ কৰে। আনহাতে কোহলীয়ে আজি আটাইতকৈ কমসংখ্যক ইনিংছত ২৩,০০০ আন্তঃৰাষ্ট্ৰীয় ৰান সংগ্ৰহ কৰাৰ অভিলেখো গঢ়ে। ইয়াৰ লগতে তেওঁ এদিনীয়াত ৫১ সংখ্যক চেঞ্চুৰীও কৰে। ইয়াৰ আগতে ভাৰতে আজি সুন্দৰ বলিং প্ৰদৰ্শন কৰি পাকিস্তানক ২৪০ ৰানতে সীমিত ৰাখে। বিশেষকৈ অন্তিম অ'ভাৰকেইটাত ভাৰতীয় বলাৰৰ প্ৰদৰ্শন আছিল চমকপ্রদ। কুলদীপ যাদৱে ৯ অ'ভাৰত মাত্র ৪০ ৰান দি তিনিটা উইকেট দখল কৰে। পাকিস্তানৰ ছৌড শ্বাকিলে সর্বাধিক ৬২ ৰান কৰে। অধিনায়ক তথা উইকেটকীপাৰ মহম্মদ ৰিজৱানে ৪৬ আৰু খুছদিল শ্বাহে ৩৮ ৰান কৰে। উল্লেখযোগ্য যে ভাৰতে ডুবাইত পৰাজিত নোহোৱাৰ ধাৰা কালি অব্যাহত ৰাখে।

Share This