দেশজুৰি ভাৰত-পাকিস্তানৰ মেচৰ বিৰোধিতা, অপাৰেশ্যন সেন্দূৰৰ পাছত প্ৰথম মেচ

dainik janambhumi September 14, 2025

ডিজিটেল ডেস্ক : ভাৰতে এছিয়া কাপ ক্রিকেট প্রতিযোগিতাত আজি পাকিস্তানৰ বিৰুদ্ধে খেলিব। পহলগামত সন্ত্রাসবাদীৰ আক্ৰমণত ২৬জন লোক নিহত হোৱাৰ ঘটনা আৰু তাৰ পাছত ভাৰতে চলোৱা অপাৰেশ্যন সেন্দূৰৰ পাছত দুয়োটা দলে প্রথমবাৰৰ বাবে ক্রিকেটৰ খেল পথাৰত পৰস্পৰৰ মুখামুখি হ'ব। ইফালে এই মেচখনক লৈ সমগ্র দেশতে প্রতিবাদ আৰম্ভ হৈছে। দেশৰ কেইবাটাও বিৰোধী দলে এই মেচখন বৰ্জন কৰাৰ আহবান জনাইছে। বিৰোধী পক্ষৰ নেতাসকলে এই বুলি কয় যে পাকিস্তানৰ সৈতে ক্রিকেট মেচ খেলাতো শ্বহীদসকলৰ লগতে পহলগামত সন্ত্রাসবাদীয়ে হত্যা কৰা লোকসকলৰ পৰিয়ালৰ প্ৰতি অপমানজনক। ভাৰত-পাকিস্তানৰ মেচক লৈ ৰাজধানী দিল্লীকে ধৰি দেশৰ বিভিন্ন স্থানত প্রতিবাদ কৰা হৈছে। ৰাজধানী দিল্লীত এই মেচখনৰ বিৰোধিতা কৰি আপৰ নেতাসকলে পাকিস্তানী ক্রিকেটাৰৰ প্ৰতিমূর্তি দাহ কৰে। আপৰ নেতাসকলে 'তেজ আৰু মেচ একেলগে নচলিব' বুলি শ্ল'গানো দিয়ে। 

পঞ্জাবৰ মুখ্যমন্ত্রী ভগৱন্ত মানে এই মেচখনত খেলাৰ অনুমতি দিয়াৰ বাবে কেন্দ্রীয় চৰকাৰক সমালোচনা কৰে। তেওঁ কয় যে দিলজিৎ দোছাঞ্জৰ চিনেমা চোৱাত বাধা দিয়া হয়, কিন্তু গৃহ মন্ত্রী অমিত শ্বাহৰ পুত্রই আই চি চি তথা বিচি চি আই নিয়ন্ত্ৰণ কৰি থকাৰ কাৰণে সকলো কথা সঠিক হৈ গ'ল। দেশৰ প্ৰধান বিৰোধী দল কংগ্রেছেও এই মেচখনৰ বিৰোধিতা কৰিছে। কংগ্ৰেছৰ নেতা পৱন খেড়াই মেচখনৰ তীব্র বিৰোধিতা কৰি কয় যে যি সময়ত তেজ আৰু পানী একেলগে ব'ব নোৱাৰে সেই সময়ত পাকিস্তানৰ সৈতে ক্রিকেট মেচো সম্ভৱ নহয়। শিৱসেনাৰ মুখপত্র সামনাত পাকিস্তানৰ বিৰুদ্ধে ভাৰতৰ মেচখনত দেশদ্রোহ বুলি দিয়া মন্তব্যৰ সমর্থন জনাই খেড়াই কয় যে ইয়াত অকণো ভুল হোৱা নাই। দলটোৰ আন এজন নেতা ইমৰান মাছুদে কয়, 'তেওঁলোকে লাজ পোৱা উচিত। মোৰ ভগ্নীৰ কপালৰ সেন্দূৰ যিসকলে মোহাৰি পেলালে তেওঁলোকৰ সৈতে আপোনালোকে এতিয়া ক্রিকেট খেলিবলৈ ওলাইছে। লাজ পোৱা উচিত। চৰকাৰৰ সেইকণ নৈতিকতাও নোহোৱা হ'লনে?' শির সেনাৰ মুৰববী উদ্ধৱ থাকৰেইও এছিয়া কাপত ভাৰত-পাকিস্তানৰ মেচৰ বিৰোধিতা কৰিছে। তেওঁ কয়, 'এনেকুৱা কি পৰিস্থিতিৰ সৃষ্টি হ'ল যে যি পাকিস্তানৰ বিৰুদ্ধে আমি যুদ্ধ কৰিছোঁ সেই পাকিস্তানৰ বিৰুদ্ধে আমি মেচ খেলিবলৈ গৈ আছোঁ। দেশভক্তিক পেংলাই কৰা হৈছে বুলি মই ভাবোঁ। 

কেৱল পেংলাই কৰাই নহয় দেশভক্তিক লৈ ব্যৱসায়ো কৰা হৈছে। তেওঁলোকৰ বাবে দেশৰ স্বাৰ্থতকৈ ব্যৱসায় অধিক গুৰুত্বপূর্ণ।' জম্মু আৰু কাশ্মীৰৰ মুখ্যমন্ত্রী ওমৰ আব্দুল্লাই কয় 'দুয়োখন দেশৰ মাজৰ দ্বিপাক্ষিক মেচক লৈ সমস্যা আছে, কিন্তু ডাঙৰ প্রতিযোগিতা আৰু বহুপাক্ষিক প্রতিযোগিতাৰ ক্ষেত্ৰত আমাৰ কোনো সমস্যা নাই...যি হৈ গ'ল তাক উলাই কৰিব নোৱাৰি। মোৰ ৰাজ্যৰ এলেকা প্রত্যক্ষভাৱে চিকাৰ হৈছে... পহলগামত কি হৈছিল সেয়া আমি সকলোরে দেখিছোঁ, সেয়াই আমাৰ প্রধান চিন্তা।' এ আই এম আই এমেও এই মেচখন বাতিল কৰাৰ দাবী জনাইছে। টি এম চিয়েও এই মেচখনৰ বিৰোধিতা কৰিছে। দলটোৰ সাংসদ মহুৱা মৈত্রই কয় যে পাকিস্তানৰ ক্ষেত্ৰত তেজ আৰু পানী একেলগে প্রৱাহিত হ'ব নোৱাৰে কিন্তু তেজ আৰু ক্রিকেট একেলগে প্রৱাহিত হ'ব পাৰে।

Share This