পাকিস্তানৰ ৬খন বিমান ধ্বংস কৰিছিল ভাৰতীয় বায়ু সেনাই

dainik janambhumi August 10, 2025

ডিজিটেল ডেস্ক : এয়াৰ চীফ মাৰ্শ্বাল অমৰ প্ৰীত সিঙে শনিবাৰে কয় যে অপাৰেশ্যন সেন্দূৰৰ সময়ত ভাৰতীয় বায়ু সেনা বাহিনীয়ে (আই এ এফ) ৫খন পাকিস্তানী যুঁজাৰু বিমান আৰু এখন ডাঙৰ বিমান ভূপাতিত কৰে। সিঙে লগতে কয় যে ভাৰতে স্থলভাগৰ পৰা আকাশলৈ নিক্ষেপ কৰা মিছাইলেৰে বিমান ভূপাতিত কৰাৰ সংখ্যা এয়াই আছিল সর্বাধিক। বেংগালুৰুত এল এম কাট্টে বক্তৃতানুষ্ঠানত দিয়া ভাষণত এয়াৰ চীফ মাৰ্শ্বাল সিঙে কয় যে ১০ মে'ত ভাৰতে পাকিস্তানৰ সামৰিক স্থানত কৰা আক্ৰমণত জেকোবাবাদ বিমান ঘাটিত থকা আমেৰিকা নির্মিত এফ-১৬ যুঁজাৰু বিমান ক্ষতিগ্রস্ত হয়। উক্ত আক্রমণত দুটা কমাণ্ড আৰু এটা নিয়ন্ত্রণ কেন্দ্ৰও ক্ষতিগ্রস্ত হয়। ভাৰতে বিমান ঘাটিবোৰত চলোৱা আক্ৰমণৰ (যিবোৰৰ কিছু এতিয়া কার্যক্ষম হোৱা নাই) ফলত পাকিস্তানে যুদ্ধাৰম্ভৰ তিনি দিনৰ পাছত যুদ্ধ-বিৰতিৰ বাবে ভাৰতলৈ ফ'ন কৰিবলৈ বাধ্য হয়। 

ভাষণত সিঙে কয়, 'আমি নিশ্চিতভাৱে কমেও ৫খন যুঁজাৰু বিমান আৰু এখন বৃহৎ বিমান ভূপাতিত কৰিলোঁ। বৃহৎ বিমানখন এখন এলিন্ট বিমান (নিৰীক্ষণ বা চোৰাংচোৱাগিৰিৰ) অথবা এখন এ ই ডব্লিউ এণ্ড চি (এয়াৰব'র্ন ৱার্নিং এণ্ড কন্ট্র ছিষ্টেম) বিমান হ'ব পাৰে। এই বিমানখন ৩০০ কিল'মিটাৰ নিলগত ভূপাতিত কৰা হয়। ভাৰতে স্থলভাগৰ পৰা আকাশলৈ মিছাইলেৰে বিমান ভূপাতিত কৰাৰ সংখ্যা এয়াই আছিল সর্বাধিক।' উল্লেখযোগ্য যে এয়া আছিল অপাৰেশ্যন সেন্দূৰৰ সময়ত পাকিস্তানী বায়ু সেনাৰ হোৱা ক্ষতিৰ বিষয়ে সেনা বাহিনীৰ প্ৰথম ৰাজহুৱা প্ৰকাশ। এয়াৰ চীফ মাৰ্শ্বাল অমৰ প্ৰীত সিঙে আৰু কয়, 'জেকোবাবাদ বিমান ঘাটিত এখন এফ-১৬ যুঁজাৰু বিমান আছিল। বিমান ৰখা ঘৰৰ (হেংগাৰ) আধা অংশ ধ্বংস হয়। মই নিশ্চিত যে তাত কিছু বিমান আছিল যিবোৰ ক্ষতিগ্রস্ত হৈছে। মুৰিদ আৰু চাকলালাত আমি কমেও দুটা কমাণ্ড আৰু এটা নিয়ন্ত্রণ কেন্দ্ৰ ধ্বংস কৰিলোঁ। ছটা ৰাডাৰ... মেৰামতি কৰাই থকা এটা এ ই ডব্লিউ এণ্ড চি আৰু কিছু এফ-১৬-ৰো ক্ষতিসাধন হৈছে।' 

ভাৰতীয় বায়ু সেনা বাহিনীৰ মুৰব্বীজনে এই সফলতাৰ বাবে ৰাছিয়াত নির্মিত এছ-৪০০ এয়াৰ ডিফেন্স ছিষ্টেমক প্রশংসা কৰে। তেওঁ এয়াৰ ডিফেন্স ছিষ্টেমক 'গে'ম চেঞ্জাৰ' (পৰিস্থিতি পৰিৱৰ্তনকাৰী) আখ্যা দিয়ে। উল্লেখযোগ্য যে ২৩ এপ্রিলত জম্মু-কাশ্মীৰৰ পহলগামত পাকিস্তানৰ সন্ত্রাসবাদীয়ে ২৬জন লোকক হত্যা কৰাৰ পোটক তুলিবলৈ ভাৰতে ৭ মে'ত অপাৰেশ্যন সেন্দূৰ আৰম্ভ কৰি পাকিস্তানত থকা সন্ত্রাসবাদীৰ কাৰ্যালয় শিবিৰ আদিত আক্ৰমণ কৰিছিল। উক্ত আক্ৰমণত প্রায় এশ সন্ত্রাসবাদীৰ মৃত্যু হৈছিল।

Share This