প্ৰাগ নিউজৰ কাৰ্যালয়ত আই পি এলৰ ট্ৰফী

Dainik janambhumi February 15, 2025

ডিজিটেল ডেস্ক: আই পি এলৰ সপ্তদশ সংস্কৰণৰ বিজয়ী ট্ৰফীটো প্ৰদৰ্শনৰ বাবে অসমলৈ অনা হয়। এই সুদৃশ্য সোণালী ট্রফীটো প্ৰাগ নিউজৰ উলুবাৰীস্থিত কাৰ্যালয়লৈও অনা হয় সাংবাদিক আৰু সংবাদকর্মীসকলৰ প্ৰদৰ্শনৰ বাবে। প্রাগ টাৱাৰত অনুষ্ঠিত এই প্রদর্শনী অনুষ্ঠানটোত এ এম টেলিভিছনৰ চি এম ডি ড° সঞ্জীৱ নাৰায়ণ,অধ্যক্ষ ডাঃ অক্ষতা নাৰায়ণ, প্রাগ নিউজৰ মুখ্য সম্পাদক প্রশান্ত ৰাজগুৰু, প্ৰাগ নিউজৰ কাৰ্যবাহী সম্পাদক দেৱজিৎ ভূঞাৰ লগতে বহু সাংবাদিক আৰু সংবাদকর্মী উপস্থিত আছিল।

 উল্লেখযোগ্য যে কলকাতা নাইট ৰাইডাৰ্ছ কর্তৃপক্ষই ট্রফীটো পুৱাই লৈ যায় কামাখ্যা মন্দিৰলৈ। ট্ৰফী লৈ মা কামাখ্যাৰ আশিস গ্ৰহণ কৰাৰ অন্তত ট্ৰফীটো মহানগৰীৰ চিটি চেণ্টাৰ মললৈ লৈ যোৱা হয়। চিটি চেণ্টাৰত ট্ৰফীৰ সৈতে এখন ফটো উঠিবলৈ হেতা-ওপৰা লগায় অগণন ক্রিকেটানুৰাগীয়ে। আজি এই সুদৃশ্য ট্রফীটো লৈ যোৱা হ'ব ভুৱনেশ্বৰলৈ। এই প্রসংগতে উল্লেখযোগ্য যে বিগত বৰ্ষত কলকাতা নাইট ৰাইডাৰ্ছে বিজয়ী হৈ লাভ কৰা এই ট্ৰফীটো ৯খন ৰাজ্যত প্ৰদৰ্শনৰ ব্যৱস্থা কৰা হৈছে।

Share This