পাৰমাণৱিক চুক্তি নকৰিলে ইৰানত কৰিব প্ৰচণ্ড বোমাবৰ্ষণ 

dainik janambhumi March 31, 2025

ডিজিটেল ডেস্ক: ইৰানত প্ৰচণ্ড বোমাবর্ষণৰ ভাবুকি দিয়ে আমেৰিকাই। আমেৰিকাৰ ৰাষ্ট্ৰপতি ড'নাল্ড ট্রাম্পে ইৰানক এই ভাবুকি দিয়ে। ট্রাম্পে কয় যে ইৰানে যদি পাৰমাণৱিক চুক্তিত সম্মতি নজনাই তেতিয়া দেশখনত প্রচণ্ড বোমাবর্ষণ কৰা হ'ব। ইয়াৰ লগতে দেশখনৰ বিৰুদ্ধে আৰু অধিক কঠোৰ নিষেধাজ্ঞা আৰোপ কৰা হ'ব বুলিও ট্রাম্পে সঁকীয়াই দিয়ে।

ৰাষ্ট্ৰপতি ট্রাম্পে এন বি চি নিউজক দিয়া এটা সাক্ষাৎকাৰত কয় যে আমেৰিকা আৰু ইৰানৰ মাজত আলোচনা চলি আছে। যদিহে ইৰানে পাৰমাণৱিক চুক্তিত স্বাক্ষৰ নকৰে তেতিয়া দেশখনত বোমাবর্ষণ কৰা হ'ব। ইফালে ইৰানে ট্রাম্পৰ ভাবুকিক নস্যাৎ কৰিছে। ইৰানৰ বিদেশ মন্ত্ৰী আৰ্বাছ অৰাকচীয়ে কয় যে তেওঁৰ দেশে ট্রাম্পৰ পত্ৰৰ উত্তৰ ওমানৰ মাধ্যমেৰে প্ৰেৰণ কৰিছে। পত্ৰখনত ট্রাম্পে নতুন পাৰমাণবিক চুক্তিৰ বাবে অনুৰোধ জনাইছিল। 

মনকৰিবলগীয়া যে ট্রাম্পৰ এই ভাবুকিয়ে মধ্য প্রাচ্যত উত্তেজনা অধিক বৃদ্ধি কৰাৰ আশংকা কৰা হৈছে, কিয়নো ইৰানে ইউৰেনিয়াম সমৃদ্ধকৰণৰ কাম অব্যাহত ৰাখিছে। উল্লেখযোগ্য যে কিছুদিন পূর্বেও ৰাষ্ট্ৰপতি ট্রাম্পে ইৰানক ভাবুকি দিছিল। আনহাতে, ইৰান আক্ৰমণ কৰিবলৈ ইজৰাইলক আওপকীয়াকৈ কর্তৃত্বও দিছিল। এইবাৰ ট্ৰাম্পে দিয়া ভাবুকিত আমেৰিকাই অকলে ইৰানত আক্ৰমণ সংঘটিত কৰিবনে, ইজৰাইলৰ সহযোগত অভিযান চলাব. সেইটো ট্রাম্পে স্পষ্ট কৰি দিয়া নাই।

Share This