মুম্বাই ইণ্ডিয়ানছত যোগ দিলে বুমৰাহে

dainik janambhumi April 07, 2025

ডিজিটেল ডেস্কঃ ভাৰতীয় ক্রিকেট ব'ৰ্ডৰ পৰা সেউজ সংকেত লাভ কৰাৰ পাছত যশপ্রীত বুমৰাহে আই পি এলত খেলাৰ ক্ষেত্ৰত কোনো বাধা নাই। মুম্বাই ইণ্ডিয়ানছৰ শিবিৰত দেওবাৰে যোগ দিলে বেগী বলাৰগৰাকীয়ে। আজি ৰয়েল চেলেঞ্জাৰ্ছ বেংগালুৰুৰ বিৰুদ্ধে বুমৰাহ মুম্বাইৰ মূল একাদশত থকাৰ প্ৰসংগত প্রশিক্ষক মাহেলা জয়বর্ধনে কয়, 'বুমৰাহে অনুশীলন আৰম্ভ কৰিছে।

বেংগালুৰুৰ বিৰুদ্ধে তেওঁ খেলিব। আগনিশা তেওঁ আহিছেহে। ৰাষ্ট্ৰীয় ক্ৰিকেট একাডেমিয়ে তেওঁক সেউজ সংকেত দিছে। আমাৰ ফিজিঅ'ই তেওঁক চোৱা-চিতা কৰিব। প্রথমদিনাই তেওঁ অনুশীলনত নমাৰ বাবে ভাল লাগিছে।' দেওবাৰে এটা ভিডিঅ' প্রকাশ কৰিছে মুম্বায়ে। উক্ত ভিডিঅ'ত বুমৰাহক দলত যোগ দিয়া দেখা গৈছে। সকলোৱে তেওঁক আদৰণি জনাইছে। বুমৰাহে অষ্ট্ৰেলিয়াৰ বিৰুদ্ধে পঞ্চম টেষ্টত পিঠিৰ আঘাতত ভুগিছিল।         7

তাৰ পাছৰ পৰাই তেওঁ খেলপথাৰৰ পৰা আঁতৰি আছিল। পৰৱৰ্তী সময়ত বুমৰাহ ৰাষ্ট্ৰীয় ক্রিকেট একাডেমিত পুনঃসংস্থাপনত ব্যস্ত হৈছিল। ৰাষ্ট্ৰীয় ক্ৰিকেট একাডেমিৰ পৰীক্ষাত উত্তীর্ণ হোৱাৰ পাছত ব'ৰ্ডে বুমৰাহক আই পি এলত ভাগ লোৱাৰ ক্ষেত্রত অনুমতি প্রদান কৰে।

Share This