সৰুসজাইত 'ঝুমইৰ বিনন্দীয়া'ৰ প্ৰস্তুতিৰ বুজ ল'লে মুখ্যমন্ত্রীয়ে

Dainik janambhumi February 15, 2025

ডিজিটেল ডেস্ক: ছিংগাপুৰৰ পৰা আহিয়েই মুখ্যমন্ত্রী ড° হিমন্ত বিশ্ব শর্মাই গুৱাহাটীৰ সৰুসজাই ষ্টেডিয়ামত উপস্থিত হৈ অহা ২৪ ফেব্ৰুৱাৰীত অনুষ্ঠিত হ'বলগীয়া 'ঝুমইৰ বিনন্দিনী' অনুষ্ঠানৰ প্ৰস্তুতিৰ অগ্ৰগতিৰ বুজ লয়। সাংবাদিকসকলৰ সৈতে হোৱা বাৰ্তালাপত মুখ্যমন্ত্রী ড° হিমন্ত বিশ্ব শৰ্মাই কয় যে ঝুমইৰ নৃত্য সমগ্র বিশ্বজুৰি জনপ্ৰিয়কৰণৰ উদ্দেশ্যে অহা ২৪ ফেব্ৰুৱাৰীত অসম চৰকাৰে অসমৰ চাহ জনগোষ্ঠী আৰু আদিবাসীসকলৰ ঝুমইৰ নৃত্য কেন্দ্ৰীয়ভাৱে সৰুসজাই ষ্টেডিয়ামত প্ৰদৰ্শন কৰাৰ বাবে এক বর্ণাঢ্য কাৰ্যসূচীৰ আয়োজন কৰিছে।

চাহ বাগিচাৰ ৮ হাজাৰতকৈ অধিক যুৱক-যুৱতীয়ে এই অনুষ্ঠানত অংশগ্রহণ কৰিব। অসমৰ চাহ উদ্যোগৰ ২০০ বছৰ উপলক্ষে ৰাজ্য চৰকাৰে এই বর্ণাঢ্য কাৰ্যসূচী অনুষ্ঠিত কৰাৰ বাবে সিদ্ধান্ত গ্রহণ কৰিছে। আনহাতে, প্রধানমন্ত্রী নৰেন্দ্ৰ মোদীয়ে এই অনুষ্ঠানত উপস্থিত থাকিব বুলি নিশ্চিতি প্ৰদান কৰাৰ কথা উল্লেখ কৰি তেওঁ কয় যে ২১খন ৰাষ্ট্ৰৰ ৰাষ্ট্ৰদূতসকলৰ লগতে উদ্যোগপতি, ৰাজনৈতিক আৰু সাংস্কৃতিক ক্ষেত্ৰৰ লগত জড়িত ব্যক্তিসকলো এই অনুষ্ঠানত উপস্থিত থাকিব বুলি আশা কৰা হৈছে। এই কাৰ্যসূচী যাতে সুন্দৰকৈ অনুষ্ঠিত হয় তাৰ বাবে ইতিমধ্যে সমষ্টি, আঞ্চলিক আৰু জিলা পৰ্যায়ত কর্মশালা অনুষ্ঠিত হোৱাৰ কথা উল্লেখ কৰি তেওঁ লগতে কয় যে অহা ২১ ফেব্ৰুৱাৰীত চাহ বাগিচাসমূহৰ প্ৰায় ৮ হাজাৰতকৈও অধিক কলা-কুশলী গুৱাহাটীত আহি উপস্থিত হ'বহি। এই অনুষ্ঠান সাফল্যমণ্ডিত কৰিবৰ বাবে মন্ত্ৰীসভাৰ সদস্যসকলৰ এটা গোটে দিনে-নিশাই কাম কৰি থকাৰ লগতে সাংস্কৃতিক পৰিক্ৰমা বিভাগে সকলোখিনি তদাৰক কৰি আছে। 

এই অনুষ্ঠানৰ প্ৰস্তুতি সম্পর্কে বিতংভাৱে বুজ লৈ সংশ্লিষ্ট বিভাগক যাৱতীয় নিদের্শনা প্রদান কৰি মুখ্যমন্ত্ৰীয়ে অনুষ্ঠানটো সর্বাংগসুন্দৰ কৰি তোলাৰ বাবে সকলোকে আহ্বান জনায়। পৰিদৰ্শনকালত মুখ্যমন্ত্ৰীৰ সৈতে জলসম্পদ আদি বিভাগৰ মন্ত্ৰী পীযূষ হাজৰিকা, সাংস্কৃতিক পৰিক্ৰমা আদি বিভাগৰ মন্ত্ৰী বিমল বড়া, স্বাস্থ্য আৰু পৰিয়াল কল্যাণ আদি বিভাগৰ মন্ত্ৰী অশোক সিংহল, জনস্বাস্থ্য কাৰিকৰী আদি বিভাগৰ মন্ত্ৰী জয়ন্ত মল্ল বৰুৱা, শ্রম আদি বিভাগৰ মন্ত্ৰী ৰূপেশ গোৱালা, বিধায়ক দিগন্ত কলিতাৰ উপৰি আৰক্ষী সঞ্চালকপ্ৰধান হৰমীত সিং, সাংস্কৃতিক বিভাগৰ প্ৰধান সচিব বি কল্যাণ চক্ৰৱৰ্তী প্ৰমুখ্যে সংশ্লিষ্ট বিভাগৰ শীৰ্ষ বিষয়াসকল উপস্থিত থাকে।

Share This