বি পি এফত মোক্ষম আঘাত, বি পি এফ ত্যাগ কৰিলে খাম্পা বৰগয়াৰীয়ে

dainik janambhumi February 03, 2025

ডিজিটেল ডেস্ক: বড়োভূমিত শক্তিশালী বিৰোধীৰ ভূমিকা পালন কৰি থকা বি পি এফ দলত
মোক্ষম আঘাত হানি বি টি চিৰ প্ৰাক্তন উপ-মুখ্য কার্যবাহী তথা দলটোৰ উপ-সভাপতি খাম্পা বৰগয়াৰীয়ে পদত্যাগ কৰে। উল্লেখযোগ্য যে বি পি এফৰ সভাপতি হাগ্রামা মহিলাৰীৰ একালৰ সতীর্থ নেতা খাম্পা বৰগয়াৰীয়ে আনুষ্ঠানিক পত্ৰৰে বি পি এফৰ সভাপতি হাগ্রামা মহিলাৰীলৈ পদত্যাগ-পত্ৰ প্ৰেৰণ কৰাত বি পি এফত ধুমুহাৰ সৃষ্টি হয়। 

অৱশ্যে ব্যক্তিগত অসুবিধাৰ কথা দোহাৰি পদত্যাগ কৰা খাম্পা বৰগয়াৰীয়ে বি পি এফ এৰি কোন দলত যোগদান কৰে সেয়া এতিয়াও ৰহস্যৰ আৱৰ্তত। এটা বিশেষ সূত্ৰৰ মতে, কোকৰাঝাৰ লোক সভা সমষ্টিৰ যোৱা নিৰ্বাচনত বি পি এফ দলৰ প্ৰাৰ্থী খাম্পা বৰগয়াৰীয়ে এন ডি এৰ সমর্থিত প্রার্থী জয়ন্ত বসুমতাৰীৰ হাতত পৰাজয়বৰণ কৰিছিল আৰু নিৰ্বাচনৰ সময়ত দলৰ অভ্যন্তৰত হোৱা কিছু মনোমালিন্যৰ কাৰণে তেওঁ বি পি এফৰ প্ৰতি মোহভংগ হোৱা বুলি জনা গৈছে। ইপিনে বি পি এফৰ প্ৰাথমিক সদস্যৰ পদো ত্যাগ কৰা খাম্পা বৰগয়াৰীয়ে বিগত ২০ বছৰে দলৰ মজিয়াত থাকি ৰাইজক সেৱা কৰাৰ যি সুযোগ পালে তাত বি পি এফৰ প্ৰতি কোনোধৰণৰ আক্ষেপ প্রকাশ নকৰাকৈ দলীয় নেতা-কর্মী আৰু শুভকাংক্ষীক ধন্যবাদ জ্ঞাপন কৰে। লগতে হাগ্রামা মহিলাৰী নেতৃত্বাধীন বি পি এফ দলে ৰাইজৰ আশা-আকাংক্ষা পূৰণ কৰিব পাৰিব বুলি তেওঁ আশা প্রকাশ কৰে পদত্যাগ-পত্ৰখনত। 

উল্লেখযোগ্য যে যোৱা লোক সভাৰ নিৰ্বাচনত কোকৰাঝাৰ লোক সভা সমষ্টিৰ পৰা বি পি এফৰ প্ৰাৰ্থী হিচাপে নির্বাচন খেলি পৰাজিত হোৱাৰ পাছৰে পৰা খাম্পা বৰগয়াৰীয়ে দল সলনি কৰিব পাৰে বুলি বিভিন্ন সময়ত চর্চিত হৈছিল। কিন্তু অৱশেষত সকলো জল্পনা-কল্পনাৰ ওৰ পেলাই আজি তেওঁ বি পি এফৰ পৰা পদত্যাগ কৰাত খাম্পা বৰগয়াৰীক লৈ বু-বা চলি থকা দল বাগৰাৰ কথা স্পষ্ট হৈ পৰে। আনহাতে, প্রথমে গেৰুৱা দলত যোগদানৰ বাবে মনস্থ কৰা খাম্পা বৰগয়াৰীয়ে শেহতীয়াকৈ চলিত ফেব্ৰুৱাৰী মাহৰ প্ৰথম সপ্তাহত প্রমোদ বড়ো নেতৃত্বাধীন ইউ পি পি এলত যোগদান কৰাৰ যথেষ্ট সম্ভৱনা থকা বুলি ৰাজনৈতিক মহলত চৰ্চা চলিছে। সম্প্ৰতি বি টি আৰৰ ৰাজনীতিত চাঞ্চল্যৰ সৃষ্টি কৰি কেন্দ্ৰীয় উপ-সভাপতি খাম্পা বৰগয়াৰীয়ে আজি পদত্যাগ কৰা সমগ্ৰ বিষয়টোত নীৰৱতা অৱলম্বন কৰিছে বি পি এফ দলৰ হাইকমাণ্ড হাগ্রামা মহিলাৰীয়ে।

Share This