সেনাৰ বিমানে খুন্দিয়ালে এটা ঘৰত ; থিতাতে নিহত বহু জোৱান আৰু সাধাৰণ লোক 

Kakali Deka February 26, 2025

ডিজিটেল ডেস্কঃ এক ভয়ংকৰ ঘটনা৷ ওমদুৰমান চহৰত দুৰ্ঘটনাগ্ৰস্ত হৈছে চুডানৰ এখন সামৰিক বিমান। বুধবাৰে সামৰিক আৰু স্বাস্থ্য বিষয়াসকলে এক চমু বিবৃতিত জনোৱা মতে, মঙলবাৰে ওমদুৰমানৰ উত্তৰ দিশৰ ৱাডি ছায়েদনা বিমানঘাটিৰ পৰা উৰণৰ সময়তে দুৰ্ঘটনাগ্ৰস্ত হয় এণ্টন’ভ বিমানখন। ওমদুৰমান ৰাজধানী খাৰ্টুমৰ ভগ্নী চহৰ। মঙলবাৰে খাৰ্টুমৰ উপকণ্ঠ অঞ্চলত সংঘটিত এই ঘটনাৰ ফলত প্ৰায় ৪৯ জন লোকৰ মৃত্যু হোৱা বুলি জানিব পৰা গৈছে। এই ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে।

সেনাৰ বিবৃতি অনুসৰি এই দুৰ্ঘটনাত নিহত হৈছে সামৰিক জোৱান আৰু সাধাৰণ নাগৰিক। অৱশ্যে এই পৰ্যন্ত কিমানজন লোকৰ মৃত্যু হোৱাৰ খবৰ পোৱা গৈছে সেয়া প্ৰকাশ কৰা হোৱা নাই। কিহৰ বাবে দুৰ্ঘটনা সংঘটিত হৈছে সেই কথাও কোৱা হোৱা নাই।

ইফালে, স্বাস্থ্য মন্ত্ৰ্যালয়ে জনোৱা মতে, কমেও ৪৬ জন লোকৰ মৃত্যু হৈছে, যাৰ মৃতদেহ ওমদুৰমানৰ নাউলৈ স্থানান্তৰ কৰা হৈছে। দুজন কণমানি ভাই-ভনীকে ধৰি পাঁচজন আহত সাধাৰণ নাগৰিককো চিকিৎসালয়ত ভৰ্তি কৰোৱা হৈছে।

উল্লেখ্য যে, ২০২৩ চনৰ পৰা চুডান সেনাই আৰ এ এফৰ সৈতে যুদ্ধ কৰি আহিছে। শেহতীয়াকৈ চুডানৰ কেইবাখনো চহৰ আৰু নগৰ আৰ এ এফৰ নিয়ন্ত্ৰণৰ পৰা মুক্ত কৰিছে সেনাই। দুবছৰ ধৰি আৰ এ এফে দখল কৰি ৰখা মুখ্য চহৰ এল-ওবেইদকো মুক্ত কৰে চুডান সেনাই। তাৰ পাছত ৰাজপথত একাংশ জনতাই বিজয় উদযাপন কৰা দেখা গৈছে। উত্তৰ কৰ্ডোফান ৰাজ্যৰ ৰাজধানীখন খাৰ্টুমক দাৰফুৰৰ সৈতে সংযোগ কৰা এক কৌশলগত কেন্দ্ৰ। এই ক্ষেত্ৰত শেহতীয়াকৈ লাভ কৰা বিজয়ে সংঘাতৰ এক টাৰ্নিং পইণ্ট হিচাপে পৰিগণিত হ’ব পাৰে।

 

উৎসঃ প্ৰাগ নিউজ ডিজিটেল

Share This