১৩০ বছৰীয়া ইতিহাসত আই অ’ চিৰ প্ৰথমগৰাকী মহিলা সভানেত্ৰী হিচাপে পৰিগণিত হ’ল কিৰ্ষ্টি কভেণ্ট্ৰি

Rashmi March 21, 2025

ডিজিটেল ডেস্কঃ আন্তঃৰাষ্ট্ৰীয় ক্ৰিকেট পৰিষদৰ সভাপতি জয় শ্বাহে আন্তঃৰাষ্ট্ৰীয় অলিম্পিক সমিতিৰ নৱনিৰ্বাচিত সভানেত্ৰী কিৰ্ষ্টি কভেণ্ট্ৰিক অভিনন্দন জ্ঞাপন কৰে। আন্তঃৰাষ্ট্ৰীয় অলিম্পিক কমিটীৰ সভানেত্ৰী হোৱা প্ৰথমগৰাকী মহিলা কিৰ্ষ্টি কভেণ্ট্ৰি। ইয়াৰ উপৰি কিৰ্ষ্টি কভেণ্ট্ৰি জিম্বাবুৱেৰ ক্ৰীড়া মন্ত্ৰী। অৱশ্যে এতিয়া তেওঁ আন্তঃৰাষ্ট্ৰীয় অলিম্পিক কমিটীৰ সভানেত্ৰী পদৰ দায়িত্ব ল’ব।

আন্তঃৰাষ্ট্ৰীয় অলিম্পিক সমিতিৰ সভাপতি হোৱাৰ বাবে কিৰ্ষ্টি কভেণ্ট্ৰিক অভিনন্দন জনাই আন্তঃৰাষ্ট্ৰীয় ক্ৰিকেট পৰিষদৰ সভাপতি জয় শ্বাহে কয় যে তেওঁ ২০২৮ চনৰ লছ এঞ্জেলছ অলিম্পিক গেমছত ক্ৰিকেটক অন্তৰ্ভুক্ত কৰিবলৈ প্ৰতিশ্ৰুতিবদ্ধ। ইয়াৰ বাবে তেওঁ আন্তঃৰাষ্ট্ৰীয় অলিম্পিক সমিতিৰ নৱনিৰ্বাচিত সভাপতি কিৰ্ষ্টি কভেণ্ট্ৰিৰ সৈতে কাম কৰিবলৈ আগ্ৰহী।

ইয়াৰ পূৰ্বে কমনৱেলথ গেমছ ২০২২ আৰু এছিয়ান গেমছ ২০২৩ত ক্ৰিকেট অন্তৰ্ভুক্ত কৰা হৈছিল। একে সময়তে এতিয়া ক্ৰিকেটক লছ এঞ্জেলছ অলিম্পিক গেমছ ২০২৮ত অন্তৰ্ভুক্ত কৰাৰ প্ৰস্তুতি চলি আছে। যদি এনেকুৱা হয় তেন্তে প্ৰায় ১২৮ বছৰৰ পাছত ক্ৰিকেট পুনৰ অলিম্পিক গেমছলৈ ঘূৰি আহিব।

উল্লেখ্য যে কিৰ্ষ্টি কভেণ্ট্ৰি আন্তঃৰাষ্ট্ৰীয় অলিম্পিক কমিটীৰ (আই অ’ চি) দশম সভাপতি হ’ব। ইয়াৰ উপৰি আই অ’ চিৰ সভানেত্ৰী নিৰ্বাচিত হোৱা প্ৰথমগৰাকী মহিলা আৰু প্ৰথমগৰাকী আফ্ৰিকান হ’ব। গ্ৰীচৰ কোষ্টা নাভাৰিনোত অনুষ্ঠিত হোৱা আই অ’ চিৰ ১৪৪সংখ্যক অধিবৱশনত কিৰ্ষ্টি কভেণ্ট্ৰি সভানেত্ৰী হিচাপে নিৰ্বাচিত হয়। ইয়াৰ পূৰ্বে আই চি চি চেম্পিয়নছ ট্ৰফীৰ খেলখনৰ বাবে কিৰ্ষ্টি কভেণ্ট্ৰিক আমন্ত্ৰণ জনোৱা হৈছিল। ভাৰত-অষ্ট্ৰেলিয়াৰ ছেমি ফাইনেলৰ সময়ত দেখা গৈছিল কিৰ্ষ্টি কভেণ্ট্ৰিক। অৱশ্যে যদি অলিম্পিক গেমছত ক্ৰিকেট পুনৰ উভতি আহে তেন্তে ইয়াক এক ডাঙৰ পদক্ষেপ বুলি গণ্য কৰা হ’ব। ক্ৰিকেটৰ উপৰি বেছবল, ফ্লেগ ফুটবল, লেক্ৰছ আৰু স্কোয়াছ ২০২৮ চনৰ লছ এঞ্জেলছ অলিম্পিক গেমছত ঘূৰি অহাৰ সম্ভাৱনা আছে।

Share This