কোহলী-ৰোহিতে খেলিব ৯খন এদিনীয়া

dainik janambhumi March 27, 2026

ডিজিটেল ডেস্ক : অহা বছৰৰ আৰম্ভণিতে বিৰাট কোহলী আৰু ৰোহিত শর্মাক কলকাতাত দেখা পোৱা যাব। জিম্বাবুৱেৰ বিৰুদ্ধে ভাৰতৰ সেই এদিনীয়া খেলখন ২০২৭ চনৰ ৩ জানুৱাৰীত ইডেনত অনুষ্ঠিত হ'ব। বিচি চি আয়ে ২০২৬-২৭ ছিজনৰ বাবে ভাৰতীয় দলৰ ঘৰুৱা সূচী ঘোষণা কৰিছে। কোহলী আৰু ৰোহিতে ঘৰৰ মাটিত মুঠ ৯খন এদিনীয়া মেচত অৱতীৰ্ণ হ'ব। ২০২৭ চনৰ ফেব্ৰুৱাৰী মাহলৈকে প্রকাশ পোৱা এই সূচীত মুঠ ৪টা দল-ৱেষ্ট ইণ্ডিজ, শ্রীলংকা, জিম্বাবুৱে আৰু অষ্ট্ৰেলিয়াই ভাৰত ভ্ৰমণ কৰিব। 

১৭খন চহৰত ২২খন খেল অনুষ্ঠিত হ'ব। মুঠ ৯খন এদিনীয়া মেচ, ৮খন টি-২০ মেচ আৰু ৫খন টেষ্ট। এই ছিজনৰ আৰম্ভণি হ'ব ৱেষ্ট ইণ্ডিজৰ ভাৰত ভ্ৰমণৰ জৰিয়তে। এই শৃংখলাত তিনিখন এদিনীয়া আৰু ৫খন টি-২০ মেচ অনুষ্ঠিত হ'ব। তিৰুৱনন্তপুৰম, গুৱাহাটী আৰু নিউ চণ্ডীগড়ত হ'ব এদিনীয়া খেল। ইয়াৰ পাছতে লক্ষ্ণৌ, ৰাঁচী, ইন্দোৰ, হায়দৰাবাদ আৰু বেংগালুৰুত অনুষ্ঠিত হ'ব টি-২০ শৃংখলা। ইয়াৰ পাছত ডিচেম্বৰত ভাৰত ভ্ৰমণলৈ আহিব শ্রীলংকা। বগা বলৰ শৃংখলাত তিনিখন এদিনীয়া আৰু তিনিখন টি-২০ মেচ অনুষ্ঠিত হ'ব। দিল্লী, বেংগালুৰু আৰু আহমেদাবাদত হ'ব এদিনীয়া মেচ। ৰাজকোট, কটক আৰু পুনেত অনুষ্ঠিত হ'ব টি-২০ শৃংখলা। 

ইফালে, জিম্বাবুৱেই ভাৰত ভ্ৰমণ কৰি নতুন বছৰ অৰ্থাৎ ২০২৭ চনৰ জানুৱাৰীত তিনিখন খেলৰ এদিনীয়া শৃংখলাত খেলিব। খেল হ'ব কলকাতা, হায়দৰাবাদ আৰু মুম্বাইত। আনহাতে, অষ্ট্ৰেলিয়াৰ বিৰুদ্ধে ব'ৰ্ডাৰ-গাভাস্কাৰ ট্ৰফীৰে ছিজনৰ সামৰণি পৰিব। অহা ২১ জানুৱাৰীত নাগপুৰত অষ্ট্ৰেলিয়াৰ বিৰুদ্ধে ৫খনীয়া টেষ্ট শৃংখলা আৰম্ভ হ'ব।

Share This