মহাকুম্ভমেলাত উত্তৰ কমলাবাৰী সত্ৰৰ দল

dainik janambhumi January 22, 2025

ডিজিটেল ডেস্ক:  প্ৰয়াগৰাজত অনুষ্ঠিত হৈ থকা মহাকুম্ভমেলালৈ যোৱা ১৭ জানুৱাৰীত ৰাওনা হয় মাজুলীৰ প্ৰথমটো বৈষ্ণৱ সাংস্কৃতিক দল৷ মাজুলীৰ উত্তৰ কমলাবাৰী সত্ৰৰ সত্ৰাধিকাৰ জনাৰ্দন দেৱ গোস্বামীৰ নেতৃত্বত যোৱা প্ৰায় ৩০জনীয়া বৈষ্ণৱ সাংস্কৃতিক দলটো ইতিমধ্যে প্ৰয়াগৰাজৰ কুম্ভমেলা স্থলীত উপস্থিত হৈছেগৈ৷
 

যোৱা ১৮ জানুৱাৰীত গুৱাহাটীৰ শ্ৰীমন্ত শংকৰদেৱ কলাক্ষেত্ৰৰ পৰা মন্ত্ৰী ডাঃ ৰণোজ পেগু, জয়ন্ত মল্ল বৰুৱাৰ উপস্থিতিত আৰম্ভ হোৱা উক্ত যাত্ৰা কালি সন্ধ্যা ৮-৩০ বজাত মহাকুম্ভমেলাত দলটো সুকলমে উপস্থিত হোৱাত উক্ত যাত্ৰাৰ সামৰণি পৰে৷ প্ৰয়াগৰাজত ইতিমধ্যে সুন্দৰকৈ সজাই তোলা প্ৰাগজ্যোতিষ ক্ষেত্ৰত নিৰ্মাণ কৰা নামঘৰৰ গুৰু আসনত মাজুলীৰ পৰা নিয়া ভাগৱত স্থাপন কৰে উত্তৰ কমলাবাৰী সত্ৰৰ অধিকাৰ জনাৰ্দন দেৱ গোস্বামীয়ে৷ 

ভকত-বৈষ্ণৱৰ নাম-প্ৰসংগ, গায়ন-বায়ন, খোল-তালৰ ধবনিৰে মুখৰিত হৈ পৰা মহাকুম্ভত মাজুলীৰ মুখাশিল্পকে ধৰি সত্ৰীয়া সংস্কৃতিৰে প্ৰাগজ্যোতিষ ক্ষেত্ৰ মেলাত জিলিকি উঠিছে৷ একপ্ৰকাৰে যেন গংগাৰ পাৰ নৈমিষাৰণ্যলৈ পৰিণত হৈছে৷ উক্ত প্ৰাগজ্যোতিষ ক্ষেত্ৰত প্ৰজ্ঞাৰ বিশেষ প্ৰদৰ্শনীৰ লগতে খোল, তাল, দবা, শংখৰ ধবনিৰে গংগাৰ তীৰ মুখৰ হৈ পৰাত অসমৰ দৰ্শনাৰ্থীয়ে প্ৰাগজ্যোতিষ ক্ষেত্ৰত ভিৰ কৰা বুলি জানিব পৰা গৈছে৷ উল্লেখযোগ্য যে যোৱা ১৩ জানুৱাৰীৰ পৰা অহা ২৬ ফেব্ৰুৱাৰীলৈ প্ৰয়াগৰাজত ৪৫দিনীয়া মহাকুম্ভ মহোৎসৱত এইবাৰ প্ৰথমবাৰৰ বাবে অসমৰ নামঘৰ, মণিকূট আৰু ৰাঙলীচ’ৰা নিৰ্মাণ কৰা হৈছে৷ য’ত প্ৰথমবাৰৰ বাবে প্ৰাগজ্যোতিষ ক্ষেত্ৰ তৈয়াৰ কৰি বৃহৎ অনুষ্ঠানত অসমৰ পৰা যোৱা বৈষ্ণৱ শিল্পীৰ দলে সাংস্কৃতিক অনুষ্ঠান পৰিৱেশন কৰিব৷ ইতিমধ্যে মাজুলীৰ বহুকেইখন সত্ৰৰ সাংস্কৃতিক দলে এইবাৰ উক্ত মহাকুম্ভত সাংস্কৃতিক অনুষ্ঠান প্ৰদৰ্শন কৰিব৷ সেই অনুসৰি মহাকুম্ভত মাজুলীৰ বৈষ্ণৱ শিল্পীৰ দলে দুজনা গুৰুৰ অমৰ সৃষ্টি ৰাম বিজয় নাট, দশাৱতাৰ নৃত্য, সত্ৰীয়া নৃত্য, গায়ন-বায়ন আৰু ৭ দিনীয়া ভাগৱত ব্যাখ্যা অনুষ্ঠান অনুষ্ঠিত কৰিব l

 ইফালে ঐতিহাসিক আউনীআটী সত্ৰৰ বৈষ্ণৱবৃন্দই ১২ বছৰৰ মূৰত হোৱা প্ৰয়াগৰাজৰ মহাকুম্ভমেলাত সত্ৰীয়া সংস্কৃতি প্ৰদৰ্শনৰ বাবে যোৱাৰ প্ৰস্তুতি প্ৰায় সম্পূৰ্ণ কৰিছে৷ আউনীআটীয় সত্ৰাধিকাৰ ড° পীতাম্বৰ দেৱ গোস্বামীৰ নেতৃত্বত সত্ৰখনৰ ৪০গৰাকী বৈষ্ণৱে কুম্ভমেলালৈ অহা ২৯ জানুৱাৰীত যাত্ৰা আৰম্ভ কৰিব৷ আউনীআটী সত্ৰৰ বৈষ্ণৱ শিল্পীৰ দলটোৱে কুম্ভমেলাত মাজুলীৰ সত্ৰীয়া পৰিৱেশ আৰু সত্ৰীয়া সংস্কৃতি পৰিৱেশনৰ বাবে জনোৱা বিশেষ অনুৰোধ সাপেক্ষে কুম্ভমেলাত শংকৰদেৱৰ অমৰ সৃষ্টি অংকীয়া নাট ‘ৰাম বিজয়’ প্ৰদৰ্শন কৰিব৷

Share This