ডিজিটেল ডেস্ক: উত্তৰ প্ৰদেশৰ প্ৰয়াগৰাজত অনুষ্ঠিত ধৰ্মীয় আস্থাৰ মহান উৎসৱ মহাকুম্ভই বহু দৰিদ্ৰ পৰিয়ালৰ অৰ্থনৈতিক অৱস্থাৰ উন্নতি সাধন কৰিলে। ৪৫ দিন ধৰি চলি থকা এই মহান অনুষ্ঠানত ৬৭ কোটিৰো অধিক ভক্তই পবিত্ৰ স্নান কৰিলে। এই মহাকুম্ভ কেৱল ধৰ্মীয় অনুষ্ঠানতে সীমাবদ্ধ হৈ থকা নাছিল, হাজাৰ হাজাৰ মানুহৰ কৰ্মসংস্থাপন আৰু উপাৰ্জনৰ উৎসও হৈ পৰিল।
ঝাৰখণ্ডৰ পৰা অহা এগৰাকী ট্ৰলীৱালাই কয় ''ভক্তসকলক ইফালৰ পৰা সিফাললৈ অনা-নিয়া কৰি বহু টকা উপাৰ্জন কৰিলোঁ। প্ৰতিদিনে ২০০০-৩০০০ টকা উপাৰ্জন কৰিলোঁ। ১৫ দিনতে এবছৰৰ উপাৰ্জন কৰিবলৈ সক্ষম হলোঁ। আমি আগতে অহা হ’লে অধিক টকা উপাৰ্জন কৰিব পাৰিলোঁহেঁতেন, কিন্তু আমি যি উপাৰ্জন কৰিলোঁ সেয়া আমি আশা কৰাতকৈ বহু বেছি।''
মহাকুম্ভৰ সময়ত কেৱল ট্ৰলীৱালাই নহয়, ক্ষুদ্ৰ চাহ বিক্ৰেতা, পথৰ কাষৰ খাদ্য বিক্ৰেতা, ফুল আৰু প্ৰসাদ বিক্ৰেতাসকলেও আৰ্থিকভাৱে লাভৱান হৈছিল। এজন চাহ বিক্ৰেতাই কয় যে ''এই কুম্ভই আমাক শিকাইছে যে কঠোৰ পৰিশ্ৰম আৰু সঠিক সুযোগৰ ব্যৱহাৰ কৰি যিকোনো ব্যক্তিয়ে নিজৰ আৰ্থিক অৱস্থা উন্নত কৰিব পাৰে।''
তেওঁলোকে কয় যে পৰৱৰ্তী কুম্ভ কেতিয়া আহিব আৰু পুনৰ ইমান টকা উপাৰ্জন কৰিব পাৰিব নে নাই সেয়া নিশ্চিত নহয় যদিও এইবাৰৰ কুম্ভই তেওঁলোকক দিয়া এই সুযোগৰ বাবে সদায় কৃতজ্ঞ হৈ থাকিব। কুম্ভ মেলাই বহু লোকৰ জীৱনক চহকী কৰি তুলিলে। দৰিদ্ৰ শ্ৰেণীৰ বাবে মহাকুম্ভ বৰদান হৈ পৰিল।
উৎস প্ৰাগ নিউজ ডিজিটেল