কুম্ভমেলাৰ পৰা ওভতা বাহন দুর্ঘটনাগ্রস্ত

dainik janambhumi February 12, 2025

ডিজিটেল ডেস্কঃ প্রয়াগৰাজত হৈ থকা মহাকুম্ভৰ পৰা উভতি অহাৰ পথত মঙলবাৰে মধ্য প্রদেশৰ জব্বলপুৰ আৰু মাইহাৰত সংঘটিত হোৱা দুটা পথ দুর্ঘটনাত নজন লোক নিহত হয় আৰু আন সাতজন আহত হয়। জব্বলপুৰৰ চিহৰা চহৰৰ সমীপত পুৱা ৮-৩০ মান বজাত ট্রাক এখনৰ লগত মিনিবাছ এখনৰ সংঘৰ্ষ হোৱাত মিনিবাছখনেৰে কুম্ভমেলাৰ পৰা অহা সাতগৰাকী ভক্ত নিহত আৰু দুগৰাকী ভক্ত আহত হয়।

আনহাতে, মাইহাৰত এখন অচিনাক্ত বাহনে কাঞ্চনপুৰ গাঁৱৰ সমীপত ভক্তসকলক কঢ়িয়াই অনা এছ ইউ ভি বাহনখনত খুন্দা মৰাত দুজন লোক নিহত আৰু পাঁচজন আহত হয়। আনহাতে, বিহাৰৰ কাইমুৰ জিলাৰ মহানিয়া আৰক্ষী চকীৰ অন্তৰ্গত মুথানি এলেকাৰ সমীপত মঙলবাৰে পুৱা এখন ট্রাক আৰু অট'ৰিক্সা এখনৰ মুখামুখি সংঘর্ষ হোৱাত তিনিজন লোক নিহত আৰু দুজন আহত হয়। দুর্ভগীয়া লোককেইজন প্রয়াগৰাজৰ মহাকুম্ভৰ পৰা ঘৰলৈ ওভতাৰ সময়ত শোকাৱহ দুর্ঘটনাটো সংঘটিত হয়।

Share This