থাকে ভাৰতত, দৰমহা লয় বাংলাদেশৰ পৰা

dainik janambhumi July 16, 2025

ডিজিটেল ডেস্ক : ভাৰতত ঘৰ-মাটি কিনিছে, পৰিয়ালৰ সৈতে বসবাস কৰিছে। অথচ চাকৰি বাংলাদেশৰ এখন কলেজত। কেৱল সেয়েই নহয়, নিয়মিত দৰমহা-বোনাছ আদিও লাভ কৰিছে। এনে অভিযোেগ পোৱা গৈছে বাংলাদেশৰ মাদাৰীপুৰ জিলাৰ ডাসাৰ মহকুমাৰ শশিকৰ শ্বহীদ স্মৃতি মহাবিদ্যালয়ৰ অধ্যক্ষ দুর্লভানন্দ বাড়ৈ আৰু তেওঁৰ পত্নী একেই মহাবিদ্যালয়ৰ সমাজ কর্ম বিভাগৰ প্ৰবক্তা চম্পাৰাণী মণ্ডলৰ বিৰুদ্ধে।

জানিব পৰা মতে, ছুটীৰ নামত দীর্ঘদিন তেওঁলোক ভাৰতৰ পশ্চিম বংগৰ কল্যাণীত নিজৰ ঘৰত বসবাস কৰি আহিছে। এই অনিয়ম আৰু দুর্নীতি সত্য বুলি প্রতিপন্ন হোৱাত মাধ্যমিক আৰু উচ্চ শিক্ষা বিভাগে উক্ত দম্পতীৰ এম পি অ' (মান্থলী পে' অৰ্ডাৰ) বাতিল কৰিছে। নাম প্রকাশত অনিচ্ছুক একাধিক শিক্ষকৰ অভিযোগ যে মহাবিদ্যালয় পৰিচালনা সমিতি আৰু প্ৰশাসনৰ সৈতে সু-সম্পৰ্কৰ জৰিয়তে দীর্ঘদিন উক্ত দম্পতীয়ে এই অনিয়ম কৰি আহিছে।

স্থানীয় বাসিন্দাৰ মতে যোৱা বছৰ ৫ আগষ্টত আৱামী লীগৰ চৰকাৰৰ পতন ঘটাৰ পাছতে শিক্ষক দম্পতী ভাৰতলৈ পলাই যায়। পাছত অধ্যক্ষ দুর্লভানন্দ দেশলৈ ঘূৰি আহে, কিন্তু তেওঁৰ পত্নী এতিয়াও ভাৰততে আছে আৰু নিয়মিত দৰমহা-বোনাছ গ্ৰহণ কৰি আছে। ইফালে এই অভিযোগ অস্বীকাৰ কৰি দুৰ্লভানন্দ বাড়ৈয়ে কয় যে তেওঁৰ পত্নী বর্তমান মেডিকেল ছুটীত ভাৰতত আছে।

Share This