আজি লোক সভাত নতুন আয়কৰ বিধেয়ক উত্থাপনৰ সম্ভাৱনা 

dainik janambhumi February 13, 2025

ডিজিটেল ডেস্ক: ৬২২টা পৃষ্ঠা, ২৩টা অধ্যায় তথা ৫৩৬টা ধাৰাৰে সৰলীকৃত নতুন আয়কৰ বিধেয়কখন আজি লোক সভাত দাখিল কৰাৰ সম্ভাৱনা আছে। আয়কৰ বিধেয়ক ২০২৫ নামৰ এই বিধেয়কখন বলবৎ হোৱাৰ লগে লগে বিগত বছৰবোৰত সংশোধনেৰে গধুৰ আৰু জটিল হৈ পৰা আয়কৰ আইন ১৯৬১খন নোহোৱা হ'ব। আয়কৰ আইন ১৯৬১-ত থকা 'প্রিভিয়াছ ইয়েৰ' (বিগত বৰ্ষ)ৰ সলনি প্ৰস্তাৱিত আইনখনত 'কৰ বৰ্ষ' ব্যৱহাৰ কৰা হৈছে। 

তদুপৰি 'এছেছমেন্ট ইয়েৰ' (মূল্যায়ন বর্ষ)-ৰ ধাৰণাও নাইকিয়া কৰা হৈছে। বর্তমান বিগত বৰ্ষত (ধৰা হওক ২০২৩-২৪) উপার্জন কৰা ধনৰ বাবে 'মূল্যায়ন বৰ্ষত (ধৰা হওক ২০২৪-২৫) কৰ পৰিশোধ কৰা হয়। এতিয়া 'প্রিভিয়াছ ইয়েৰ' আৰু 'এছেছমেন্ট ইয়েৰ' ধাৰণা আঁতৰাই সৰলীকৃত বিধেয়কত কেৱল কৰ বৰ্ষ কৰা হৈছে। আয়কৰ বিধেয়ক ২০২৫-ত ৫৩৬টা ধাৰা আছে। বৰ্তমানৰ আয়কৰ আইন ১৯৬১-ত থকা ২৯৮টা ধাৰাতকৈ ই বেছি। বৰ্তমানৰ আইনত ১৪টা অনুসূচী থকাৰ বিপৰীতে নতুনখনত থাকিব ১৬টা। অৱশ্যে, অধ্যায়ৰ সংখ্যা ২৩তে ৰখা হৈছে আৰু পৃষ্ঠাৰ সংখ্যা ৬২২টালৈ হ্ৰাস কৰা হৈছে।এই পৃষ্ঠা সংখ্যা হৈছে যোৱা ৬টা দশকত সংশোধনযুক্ত বৰ্তমানৰ আয়কৰ আইনৰ প্ৰায় আধা। প্ৰথম যেতিয়া আয়কৰ আইন, ১৯৬১ বলৱৎ কৰা হৈছিল তেতিয়া আইনখনৰ পৃষ্ঠা আছিল ৮৮০।

Share This