অসম পৰ্যটনৰ ব্ৰেণ্ড এম্বেছেডৰ হোৱাৰ আগ্রহ লাভলীনাৰ

dainik janambhumi March 31, 2025

ডিজিটেল ডেস্ক : অসমৰ বন বিভাগে আহ্বান জনালে কাজিৰঙাৰ ব্ৰেণ্ড এম্বেছেডৰ হ'বলৈ আগ্রহী বক্সাৰ লাভলীনা বৰগোহাঁই। কাজিৰঙা ৰাষ্ট্ৰীয় উদ্যান দৰ্শন কৰি এই মন্তব্য বক্সাৰগৰাকীৰ। জানিব পৰা মতে, কাজিৰঙা ৰাষ্ট্ৰীয় উদ্যান দৰ্শন কৰাৰ উদ্দেশ্যে পৰিয়ালৰ সৈতে কালি কঁহৰাত উপস্থিত হৈছিল অলিম্পিয়ান লাভলীনা বৰগোহাঁই। পৰিয়ালৰ সদস্যৰ সৈতে কাজিৰঙা ৰাষ্ট্ৰীয় উদ্যানৰ কঁহৰা বনাঞ্চলত জীপ ছাফাৰী কৰি ৰাষ্ট্ৰীয় উদ্যানখনৰ সৌন্দর্যত আপ্লুত হয় লাভলীনা বৰগোহাঁই। 

কাজিৰঙা ৰাষ্ট্ৰীয় উদ্যানৰ মনোমোহা প্রাকৃতিক দৃশ্যৰ লগতে গঁড়, হাতী, হৰিণা, ম'হ, বিভিন্ন প্ৰজাতিৰ পক্ষী আদি দেখা পাই মতব্যক্ত কৰি কয়- কাজিৰঙাৰ এশিঙীয়া গঁড় সম্পর্কে বিদেশতো তেওঁৰ পৰা বহুতে জানিবলৈ বিচাৰে। বিশ্বৰ সৰ্বাধিক এটা খৰ্গ থকা গঁড়ৰ বাসস্থান তথা বিশ্ব ঐতিহ্যক্ষেত্র কাজিৰঙা ৰাষ্ট্ৰীয় উদ্যান সকলোৰে বাবে গৌৰৱ বুলি মন্তব্য কৰে লাভলীনাই। মাতৃ, পিতৃ আৰু জ্যেষ্ঠ ভগ্নীৰ সৈতে কাজিৰঙা ৰাষ্ট্ৰীয় উদ্যান দৰ্শন কৰি লাভলীনা বৰগোহাঁয়ে আৰু জানিবলৈ দিয়া মতে, কাজিৰঙা ৰাষ্ট্ৰীয় উদ্যানৰ বাবে নিজে গৌৰৱ অনুভৱ কৰোঁ। আমাৰ ৰাজ্যত এনেকুৱা এখন বিশ্ববিখ্যাত ৰাষ্ট্ৰীয় উদ্যান আছে য'ত ৰাজ্যখনৰ লগতে দেশৰ বিভিন্ন প্রান্ত তথা বিদেশৰ পৰ্যটকে আহি বন্যপ্রাণী দৰ্শন কৰিব পাৰে। 

কাজিৰঙা ৰাষ্ট্ৰীয় উদ্যানৰ ব্ৰেণ্ড এম্বেছেডৰ হ'বলৈ পালে নিজকে সৌভাগ্যৱান বুলি ভাবিব বুলি মত প্রকাশ কৰে বক্সাৰ লাভলীনা বৰগোহাঁয়ে। আনহাতে, আগন্তুক দুটাকৈ ৱৰ্ল্ড কাপ, ৱর্ল্ড চেম্পিয়নশ্বিপ, এছিয়ান চেম্পিয়নশ্বিপৰ বাবে প্রস্তুতি চলাই থকা বুলি সাংবাদিকৰ আগত সদৰী কৰে অলিম্পিয়ানগৰাকীয়ে। ইফালে যদিহে লাভলীনা বৰগোহাঁই সঁচাকৈয়ে বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যানৰ ব্ৰেণ্ড এম্বেছেডৰ হ'বলৈ আগ্রহী, তেন্তে ই সংৰক্ষণৰ প্রচেষ্টা, বন্যপ্রাণী সুৰক্ষা আৰু উদ্যানখনৰ সৌন্দৰ্যক বহল দৰ্শকৰ আগত প্ৰচাৰ কৰাৰ এক সুন্দৰ সুযোগ হ'ব পাৰে বুলি কাজিৰঙা টুৰিজিম ডেভেলপমেন্ট ছ'চাইটিৰ সভাপতি তৰুণ গগৈয়ে মত প্রকাশ কৰে। কাজিৰঙা ৰাষ্ট্ৰীয় উদ্যান এক খর্গযুক্ত গঁড়, হাতী, ঢেঁকীয়াপতীয়া বাঘ, দুষ্প্রাপ্য দল হৰিণা, ম'হ, বিভিন্ন প্ৰজাতিৰ পক্ষী তথা বৈচিত্র্যময় বন্যপ্রাণী আৰু জৈৱ-বৈচিত্র্যৰ বাবে বিখ্যাত। ইতিমধ্যে ৰাষ্ট্ৰীয় আৰু আন্তঃৰাষ্ট্ৰীয় সবল উপস্থিতি থকা লাভলীনা বৰগোহাঁইৰ দৰে ব্যক্তি কাজিৰঙা ৰাষ্ট্ৰীয় উদ্যানৰ ব্ৰেণ্ড এম্বেছেডৰ হৈ থাকিলে উদ্যানখনৰ প্ৰতি আৰু ইয়াৰ গুৰুত্বৰ প্রতি অধিক দৃষ্টি আকর্ষণ বৃদ্ধি পাব বুলিও সচেতন মহলে মত ব্যক্ত কৰে।

Share This