ডিজিটেল ডেস্ক: উত্তৰ প্ৰদেশৰ প্রয়াগৰাজত চলি থকা মহাকুম্ভ মেলা অন্তিম পর্যায়ত উপনীত হৈছে। অহা ২৬ ফেব্রুৱাৰীত ত্রিবেণী সংগমত মহাশিৱৰাত্রি উপলক্ষে হ'বলগীয়া 'অমৃত স্নান'ৰ লগে লগে বিশ্বৰ অন্যতম বৃহৎ মহাসমাগমৰ অন্ত পৰিব। সপ্তাহটোৰ অন্তত মহাকুম্ভত 'পৱিত্র স্নান' কৰাৰ বাবে দেওবাৰে প্রয়াগৰাজলৈ অগণিত ভক্তৰ সোঁত বয় আৰু প্রয়াগৰাজ অভিমুখী পথবোৰত ২৫ কিঃমিঃ পর্যন্ত ব্যাপক যান-জঁটৰ সৃষ্টি হয়।
কেইবাঘণ্টা ধৰি ভক্তসকল যান-জঁটৰ বাবে পথত আবদ্ধ হৈ ৰয়। অৱশ্যে, পৰৱৰ্তী সময়ত কর্তৃপক্ষৰ প্ৰচেষ্টাত যান-জঁট নাইকিয়া হয়। তদুপৰি, পণ্ডিত দীনদয়াল উপাধ্যায় ৰে'লৱে জংচনতো বৃহৎসংখ্যক লোকৰ সমাগম হয়। ইফালে, উত্তৰ প্রদেশৰ মুখ্যমন্ত্রীয়ে কয় যে এতিয়ালৈকে ৬২ কোটি লোক মহাকুম্ভলৈ আহিছে। মুখ্যমন্ত্রীজনে কয় যে এটা নির্দিষ্ট সময়ত মহাকুম্ভলৈ বৃহৎসংখ্যক লোকৰ সমাগম হোৱাটোৱে মহাকম্ভক এটা 'শতিকাটোৰ অন্যতম বিৰল অনুষ্ঠান' হিচাপে পৰিগণিত কৰিছে।