অতি বিষাক্ত পানীত স্নান কৰি আছে মহাকুম্ভ মেলাৰ ভক্তই

Dainik janambhumi February 19, 2025

ডিজিটেল ডেস্কঃ উত্তৰ প্ৰদেশৰ প্ৰয়াগৰাজত যোৱা ১৩ জানুৱাৰীৰ পৰা আৰম্ভ হোৱা মহাকুম্ভ মেলাত ভক্তৰ পবিত্র স্নান অব্যাহত আছে। প্রয়াগৰাজৰ ত্রিবেণী সংগমত এতিয়ালৈকে ৫০ কোটিতকৈ অধিক ভক্তই স্নান কৰিছে। ত্রিবেণী সংগমত স্নানৰ কাৰণে এতিয়াও বৃহৎ সংখ্যক ভক্তই ভিৰ কৰি আছে। ইয়াৰ মাজতে প্রয়াগৰাজত গংগা আৰু যমুনাৰ পানীৰ বিশুদ্ধতা তথা গুণগত মানক লৈ প্ৰশ্নৰ অৱতাৰণা হৈছে। ৰাষ্ট্ৰীয় সেউজ ন্যায়াধিকৰণত (এন জি টি) কেন্দ্রীয় প্রদূষণ নিয়ন্ত্রণ ব'র্ডে (চি পি চি বি) কালি দাখিল কৰা এখন প্রতিবেদনত উল্লেখ কৰা অনুসৰি প্ৰয়াগৰাজত গংগা আৰু যমুনাৰ পানীৰ গুণগত মান একেবাৰে শোচনীয়। ইয়াত স্নান কৰাসকলৰ স্বাস্থ্যত প্ৰভাৱ পৰিব পাৰে।

কেৱল মানুহৰ স্বাস্থ্যই নহয়, পৰিৱেশতো ইয়াৰ ব্যাপক বিৰূপ প্রভাৱ পৰাৰ আশংকা কৰা হৈছে। ইয়াত পানীৰ গুণগত মান ৰক্ষাৰ উপায়বিলাক সঠিকভাৱে পালন কৰা হোৱা নাই। চি পি চি বিৰ প্ৰতিবেদনখনত উল্লেখ কৰা অনুসৰি প্রয়াগৰাজত গংগা আৰু যমুনাৰ পানীত বায়'কেমিকেল অক্সিজেন ডিমাণ্ডৰ (বি অ' ডি) মাত্রা স্বাভাৱিকতে গা-ধোৱা পানীতকৈ বহুত বেছি। ইয়াৰ লগতে ফেকল কলিফৰ্মৰ (এফ চি) মাত্রাও বহুত বেছি পোৱা গৈছে। সাধাৰণতে এক মিলিলিটাৰ পানীত ১০০টা ফিকল কলিফর্ম বেক্টেৰিয়া স্বাস্থ্যৰ বাবে ক্ষতিকাৰক নহয়, কিন্তু প্রয়াগৰাজত গংগা আৰু যমুনাৰ পানীত প্রতি মিলিলিটাৰত ২০০০-২৩০০ ফিকল কলিফর্ম পোৱা গৈছে। ফিকল কলিফর্ম মল-মূত্রত পোৱা এবিধ বেক্টেৰিয়া। এই বেক্টেৰিয়াই ত্রিবেণী সংগমত স্নান কৰা ভক্তসকলৰ স্বাস্থ্যৰ প্রতি ভাবুকিৰ সৃষ্টি কৰাৰ আশংকা কৰা হৈছে। কেৱল সিমানেই নহয়, নদী দুখনৰ পানীত ব্যাপক হাৰত ৰোগৰ সংক্ৰমণ হোৱা ছালমনেলা আৰু ই কলাইৰ দৰে ভাইৰাছো থকাৰো আশংকা প্রকাশ কৰা হৈছে। প্রতিবেদনখনত উল্লেখ কৰা অনুসৰি মল-মূত্র নিষ্কাশনৰ ব্যৱস্থাও নিৰ্ধাৰিত মানৰ হোৱা নাই বুলি কোৱা হৈছে। চি পি চি বিয়ে প্রতিবেদনখনত উল্লেখ কৰা মতে, ছিৱেজ ট্রিটমেন্ট প্লান্টে (এছ টি পি) নিজৰ ক্ষমতাতকৈ অধিক কাম কৰিবলগীয়া হৈছে। প্রয়াগৰাজত ৩৪০ এম এল ডিৰ দহটা ছিৱেজ ট্রিটমেন্ট প্লান্ট আছে। ছিৱেজ ট্রিটমেন্ট প্লান্টে নিজৰ ক্ষমতাতকৈ অধিক কাম কৰি থকা বুলি কোৱা হৈছে। চি পি চি বিৰ এটা দলে অলপতে প্রয়াগৰাজত সাতটা জিঅ' ছিন্থেটিকৰ (জিঅ' টিউব) স্থান পর্যবেক্ষণ কৰে। ইয়াৰ পৰা সংগ্ৰহ কৰা নমুনাত জিঅ' টিউব নিৰ্ধাৰিত মানৰ নহয় বুলি কোৱা হৈছে। জিঅ' টিউবে পৰিশোধন প্রণালীৰ মানসমূহ পূৰণ কৰাত ব্যর্থ হৈছে। চি পি চি বিয়ে ৯-২১ জানুৱাৰীত প্রয়াগৰাজৰ ৭৩টা স্থানৰ পৰা নমুনা সংগ্ৰহ কৰিছিল। ইফালে নতুন দিল্লীৰ ইন্দ্ৰপ্ৰস্থ এপল' হস্পিটেলৰ ইণ্টাৰনেল মেডিচিনৰ এজন বিশেষজ্ঞই কয় যে কুম্ভ মেলাত স্নান কৰি অহা একাংশ লোক অসুস্থ হৈ পৰা দেখা পোৱা গৈছে। ইয়াৰে ভালেমান লোকৰ শ্বাস-প্রশ্বাস তথা বুকুত সংক্রমণ হোৱা বুলি ধৰা পৰিছে।

Share This