ঘৰলৈ উভতি গ’ল ‘ভাইৰেল গাৰ্ল’ মনালিছা

Kakali Deka January 25, 2025

ডিজিটেল ডেস্ক : ১৩ জানুৱাৰীৰ পৰা অনুষ্ঠিত হৈ থকা মহাকুম্ভ মেলাত এযুৰি নীলা চকুৱে তোলপাৰ লগাইছিল। যি চকুযুৰিৰ বাবে সামাজিক মাধ্যমত বহুলভাৱে ভাইৰেল হৈ পৰিছিল কুম্ভমেলাত মালা বিক্ৰেতা মনালিছা। সকলোৰে বাবে আকৰ্ষণৰ কেন্দ্ৰ হৈ পৰিছিল মনালিছা। লগতে ভাইৰেল হৈছিল মনালিছাৰ বিভিন্ন কথোপকথন আৰু দৈনন্দিন ক্ৰিয়া-কলাপৰ কেতবোৰ ভিডিঅ’।

কিন্তু এতিয়া আৰু কুম্ভমেলাত দেখিবলৈ পোৱা নাযাব মোহময়ী মনালিছাক।কিয় ঘৰলৈ উভতি গ'ল মনালিছা? 

হয়, প্ৰয়াগৰাজৰ মহা কুম্ভমেলাত ব্যাপক চৰ্চা লাভ কৰা ইন্দোৰৰ মালা বিক্ৰেতা মনালিছা এতিয়া ঘৰলৈ উভতি গৈছে। তেওঁ নতুনকৈ পোৱা খ্যাতি আৰু চৰ্চাৰ বাবে হাৰাশাস্তিৰ সন্মুখীন হৈছিল, যাৰ ফলত তেওঁৰ সুৰক্ষাৰ প্ৰতি উদ্বেগৰ সৃষ্টি হৈছিল।

এই হাৰাশাস্তিৰ পাছত মনালিছাৰ পিতৃয়ে তেওঁক ঘৰলৈ পঠোৱাৰ সিদ্ধান্ত লয়, দাবী কৰি কয় যে কুম্ভমেলা এতিয়া মনালিছাৰ বাবে কাম অব্যাহত ৰাখিবলৈ বা নিজৰ মংগলৰ বাবে নিৰাপদ স্থান নহয়।একে সময়তে, প্ৰয়াগৰাজত মনালিছাৰ পৰিয়ালতো সমস্যা বৃদ্ধি হৈছিল। কিছুমান অচিনাকি লোকে মেলাত মনালিছাৰ ভাতৃক দুৰ্ব্যৱহাৰ কৰিছিল। তাৰ বাবে পৰিয়ালৰ সদস্যসকল অতি শংকিত হৈ পৰিছিল। 

আনহাতে হঠাতে হোৱা এই উত্থানে তেওঁৰ ব্যৱসায়তো বহু পৰিমাণে প্ৰভাৱ পেলাইছে। লোকসকলে তেওঁৰ পৰা মালা ক্ৰয় কৰাৰ পৰিৱৰ্তে তেওঁৰ সৈতে চেলফি উঠিবলৈহে ভিৰ কৰা পৰিলক্ষিত হৈছিল। যাৰ বাবে বহু অসুবিধাৰ সন্মুখীন হৈছিল মালা বিক্ৰেতা মনালিছা। সেয়ে নিজৰ সুৰক্ষাৰ বাবে এতিয়া ঘৰলৈ উভতি গৈছে মনালিছা।

Share This