মহাকুম্ভত সন্ধানহীন অসমৰ ৩গৰাকী মহিলা

Dainik janambhumi January 31, 2025

ডিজিটেল ডেস্ক : উত্তৰ প্ৰদেশৰ প্ৰয়াগৰাজত চলি থকা মহাকুম্ভমেলাত স্নান কৰিবলৈ গৈ অসমৰ তিনিচুকীয়া জিলাৰ দুগৰাকী মহিলা সন্ধানহীন হৈ থকাৰ বিষয়ে জানিব পৰা গৈছে। ইয়াৰে এগৰাকী তিনিচুকীয়া জিলাৰ পৰ্বতীয়াৰ নিউ কলনি ফিডাৰ ৰ'ডৰ জোস্না দেৱ আৰু এগৰাকী বৰহাপজানৰ লীলা দেৱী। 

জ্যোস্না দেৱ নামৰ মহিলাগৰাকী যোৱা ২৮ জানুৱাৰীৰ পৰা সন্ধানহীন হৈ আছে। আনহাতে, বৰহাপজানৰ লীলা দেৱী নামৰ মহিলাগৰাকী যোৱা ২৯ জানুৱাৰীৰ পৰা সন্ধানহীন হৈ আছে।মহিলাগৰাকীয়ে পৰিয়ালৰ সৈতে মহাকুম্ভত অমৃত স্নান কৰিবলৈ গৈছিল । কোনো লোকে লীলা দেৱী নামৰ মহিলাগৰাকীৰ সন্ধান লাভ কৰিলে ৮৪৭২৯০০৮৩৩ নাইবা ৯৪৩৫৫৬২২২২ ম'বাইল নম্বৰত যোগাযোগ কৰিবলৈ পৰিয়ালৰ লোকে আহ্বান জনাইছে। আনহাতে, অসম আৰক্ষী তথা তিনিচুকীয়া আৰক্ষীয়ে উত্তৰ প্ৰদেশ আৰক্ষীৰ সৈতে বিষয়টোৰ ক্ষেত্ৰত যোগাযোগ অব্যাহত ৰাখিছে। 

আনহাতে মহাকুম্ভমেলাৰ ত্রিবেণী সংগমত স্নান কৰি নিৰুদ্দেশ হৈছে বিশ্বনাথৰ এগৰাকী ধৰ্মপ্ৰাণা মহিলা মঞ্জু দেৱী।আত্মীয়ৰ সৈতে পুৱাৰ ভাগত পৱিত্ৰ স্নানত অংশ লৈছিল মঞ্জু দেৱীয়ে। পাছত পাৰলৈ উঠাৰ সময়তে আত্মীয়ৰ পৰা একাষৰীয়া হৈ পৰে।মহাকুম্ভত প্রায় ৪০ গৰাকী ভক্তৰ পদপিষ্ট হৈ মৃত্যু হৈছিল। ইতিমধ্যে মঞ্জু দেৱীৰ পৰিয়ালে বিচাৰ-খোঁচাৰ আৰম্ভ কৰিছে যদিও সন্ধান পোৱা নাই। ষাঠিৰ ঊর্ধ্বৰ মহিলাগৰাকী বিশ্বনাথৰ মধ্যমপাৰাৰ। আত্মীয়ৰ সৈতে প্রয়াগৰাজৰ মহাকুম্ভত স্নানৰ বাবে যোৱা মঞ্জু দেৱীৰ সন্ধানৰ বাবে ইতিমধ্যে হেল্পলাইন মুকলি কৰিছে। মঞ্জু দেৱীৰ পৰিয়ালে সম্ভৱপৰ সকলো স্থানতে মহিলাগৰাকীৰ সন্ধান কৰিছে যদিও কোনো সন্ধান পোৱা নাই। মহাকুম্ভমেলালৈ বিশ্বনাথৰ একাংশ ভক্ত পৱিত্ৰ স্নানৰ বাবে ৰাওনা হৈ আহুকালত পৰা বুলি সামাজিক মাধ্যমত প্ৰকাশ কৰাৰ সমান্তৰালভাৱে মঞ্জু দেৱীৰ নিৰুদ্দেশৰ খবৰে বিশ্বনাথবাসীক ব্যথিত কৰি তুলিছে। যোৱা ২৭ জানুৱাৰীত মহাকুম্ভমেলালৈ ৰাওনা হোৱা মঞ্জু দেৱীৰ পৰিয়ালে এতিয়াও প্রয়াগৰাজতে মহিলাগৰাকীৰ সন্ধান লাভৰ বাবে উদগ্রীৱ হৈ আছে l

Share This