৬ বছৰে অসম্পূৰ্ণ ১৪ কোটি টকীয়া প্ৰকল্প 

dainik janambhumi March 11, 2025

ডিজিটেল ডেস্ক : ২০১৯ বৰ্ষতে মাজুলীৰ ফুলনি অঞ্চলৰ ৰঙাচাহীৰ গোটোঙা পথাৰত ৰাজ্যিক পৰ্যায়ৰ তৃতীয়-চতুৰ্থ বৰ্গৰ কৰ্মচাৰীৰ প্রশিক্ষণ কেন্দ্ৰ নিৰ্মাণৰ বাবে প্ৰায় ১৪ কোটি টকা আবণ্টন দিয়া হৈছিল। উক্ত কামৰ দায়িত্ব লাভ কৰিছিল ঠিকাদাৰ মুন্নাফ আহমেদে। কিন্তু ২০২১ বৰ্ষৰ ফেব্ৰুৱাৰী মাহতে প্রকল্পটি নির্মাণ সম্পূর্ণ কৰি ৰাজ্য চৰকাৰক হস্তান্তৰ কৰিব লাগিছিল যদিও আজি ৬ বছৰে প্ৰকল্পটোৰ বিভাগীয় তথ্য মতে নির্মাণৰ স্থিতি মাত্র ৩৭ শতাংশ। 

ইফালে ১৪ কোটি টকীয়া প্ৰকল্পৰ বৰ্তমানৰ নিৰ্মাণৰ স্থিতি অনুসৰি এটা ব্লকৰ চাটাৰিং সম্পূৰ্ণ হোৱাৰ লগতে বাকী তিনিটা ব্লকৰ নিৰ্মাণৰ অগ্ৰগতিৰ নামত কেইটামান অর্ধনিৰ্মিত খুঁটাৰ লগতে ৰিং তেলৰ পাছতে পেলাই থোৱা মামৰে ধৰা ৰডৰ বাহিৰে বাকী ব্লককেইটাৰ যেন একোৱেই অস্তিত্ব বিচাৰি পোৱা নাযায়। উক্ত প্রশিক্ষণ কেন্দ্ৰটোৰ দ্বাৰা ৰাজ্য চৰকাৰৰ তৃতীয়, চতুৰ্থ বৰ্গৰ কৰ্মচাৰীয়ে কেতিয়া সুফল লাভ কৰিব সেয়া ক'ব পৰা নাযাব যদিও উক্ত কোটি টকীয়া আঁচনিৰ অর্ধনিৰ্মিত খুঁটা, ঘৰৰ ভেটি, মামৰে ধৰা ৰডত জাতিলাও, ৰঙালাও আৰু তৰমুজকে ধৰি বিভিন্ন শাক-পাচলিৰ খেতিহে লহপহকৈ এসময়ত বাঢ়ি ভালকৈয়ে ফল ধৰিছিল। ইফালে চলিত বিধানসভাত মাজুলীৰ বিধায়ক ভুৱন গামে উক্ত প্ৰকল্পটোৰ সন্দৰ্ভত সোধা এক লিখিত প্ৰশ্নৰ উত্তৰত উক্ত বিভাগৰ দায়িত্বত থকা মুখ্যমন্ত্রী ড° হিমন্ত বিশ্ব শর্মাই লিখিতভাৱে জনোৱা অনুসৰি, মাজুলীত অসম চৰকাৰৰ তৃতীয় আৰু চতুৰ্থ বৰ্গৰ কৰ্মচাৰী প্ৰশিক্ষণ কেন্দ্ৰ নিৰ্মাণ কৰিবৰ বাবে মুঠ চৰকাৰৰ আবণ্টিত ধনৰ পৰিমাণ হ'ল ১৪,০৮,১৩,০০০.০০ টকা। 

কেন্দ্ৰটোৰ নিৰ্মাণকাৰ্যৰ বাবে দুবছৰ সময় ধাৰ্য কৰা হৈছিল। আবণ্টিত মাটি, পিটনি আৰু জলাশয় হোৱা বাবে কাম আৰম্ভ কৰা পলম হয়। ইয়াৰ পাছত কৰ'না মহামাৰীৰ বাবেও কাম স্থগিত ৰাখিব লগা হয়। বিলৰ ধনৰাশি সময়মতে নোপোৱাৰ বাবেও ঠিকাদাৰে কামৰ অগ্রগতি লেহেম কৰে। বিভাগৰ পৰা সময়ে সময়ে ঠিকাদাৰজনক কামৰ গতি তীব্ৰ কৰাৰ বাবে পত্ৰ প্ৰেৰণ কৰা হৈছে। কামৰ গতি অত্যধিক লেহেম হোৱাৰ বাবে ঠিকাদাৰৰ লগত হোৱা চুক্তিপত্র বাতিল কৰিবলৈ কাৰ্যবাহী অভিযন্তাই অনুমতি বিচাৰি পত্ৰ প্ৰেৰণ কৰে। এই সংক্ৰান্তত মুখ্য অভিযন্তাৰ উপস্থিতিত ঠিকাদাৰজন সংমণ্ডলৰ কাৰ্যবাহী অভিযন্তা আৰু অন্যান্য বিষয়ববীয়াৰ লগত যোৱা বৰ্ষৰ ২০ জুনত এখন বৈঠক অনুষ্ঠিত কৰি ২০২৪ চনৰ ডিচেম্বৰত কাম সম্পূৰ্ণ কৰাৰ প্ৰতিশ্রুতি আদায় কৰা হয়। কিন্তু কামৰ অগ্রগতি নোহোৱাত যোৱা বৰ্ষৰ ১৮ নৱেম্বৰত পুনৰ ঠিকাদাৰজনক মুখ্য অভিযন্তাৰ কাৰ্যালয়লৈ তলব কৰা হয়। উক্ত ঠিকাদাৰজনে পুনৰ ২০২৫ ৰ মাৰ্চৰ ভিতৰত কাম সম্পাদন কৰাৰ লিখিত প্রতিশ্রুতি প্রদান কৰে বুলি জনায়। ইফালে বিধায়কগৰাকীৰ উক্ত প্ৰশ্নৰ উত্তৰত চৰকাৰে দিয়া উত্তৰত ঠিকাদাৰগৰাকীয়ে চলিত মার্চ মাহতে কাম সম্পূর্ণ কৰাৰ প্ৰতিশ্রুতি দিলেও বাস্তৱিকতে প্ৰকল্পৰ কামৰ অগ্রগতিলৈ চাই এইবাৰো সেয়া যে সম্ভৱ হৈ নুঠে সেয়াও একপ্ৰকাৰে খাটাং। কিন্তু এইবাৰ ঠিকাদাৰগৰাকীৰ বিৰুদ্ধে বিভাগে কি ব্যৱস্থা গ্ৰহণ কৰে সেয়া পৰৱৰ্তী সময়ত লক্ষণীয় হ'ব। 

ইফালে মাজুলীত কাম কৰি থকা একাংশ বহিৰাগত ঠিকাদাৰে এনেদৰে মাজুলীক খীৰতী গাইৰ দৰে ব্যৱহাৰ কৰাৰ ফলতেই পূৰ্বৰ মুখ্যমন্ত্ৰী সৰ্বানন্দ সোণোৱালে মাজুলীক লৈ দেখা সপোন, আশা-প্রত্যাশাক ছাৰখাৰ হোৱাৰ উপক্ৰম হৈছে। কাৰ সাহসত, কাৰ আশীৰ্বাদপুষ্ট হৈ উঠিৰজা-বহিৰজাৰ দৰে এই ঠিকাদাৰসকলে মইমতালিৰে কাম কৰিছে বুলিও এতিয়া মাজুলীবাসীয়ে প্রশ্ন কৰিছে। এই ঠিকাদাৰসকলে মাজুলীৰ উন্নয়নত স্থবিৰতা অনাৰ ক্ষেত্ৰত কাৰ হাত আছে বুলিও প্ৰশ্নৰ উঠাৰ লগতে মাজুলীৰ ৰাইজৰ সৰলতাৰ সুযোগ লৈ ঠিকাদাৰসকলে এইদৰে মইবৰ মনোভাবেৰে কাম কৰা বুলিও এতিয়া সর্বত্র চর্চা চলা পৰিলক্ষিত হৈছে।

Share This