সেনাপতি জিলালৈ গৈ থকা বাছত উন্মত্ত কুকি জনতাৰ আক্ৰমণ, নিহত এজন

dainik janambhumi March 09, 2025

ডিজিটেল ডেস্কঃ মণিপুৰত ৰাষ্ট্ৰপতিৰ শাসন বলৱৎ হোৱাৰ পাছত শনিবাৰে প্ৰথমবাৰৰ বাবে ইম্ফলৰ পৰা আন পাহাৰীয়া জিলাসমূহলৈ আন্তঃজিলা বাছ সেৱা পুনৰ আৰম্ভ হয়। ইফালে, ৰাজ্যখনত এটা পৃথক প্রশাসন ব্যৱস্থা নোপোৱালৈকে কোনো ধৰণৰ মুকলি গতি-বিধি নিবিচাৰে কুকি জনগোষ্ঠীয়ে। কুকি জনগোষ্ঠীয় লোকসকলে ৰাজ্যখনত মুকলি গতি-বিধিৰ বিৰোধিতা কৰি কুকি অধ্যুষিত অঞ্চলবোৰত আজিও প্রতিবাদ অব্যাহত ৰাখে। শনিবাৰে কাংপকপীত মণিপুৰ ৰাজ্যিক পৰিবহণৰ বাছ এখনত আক্ৰমণ কৰে দুষ্কৃতিকাৰীয়ে। উল্লেখযোগ্য যে বিগত বৰ্ষৰ ডিচেম্বৰত ইম্ফলৰ পৰা কাংপক্‌পী আৰু চূড়াচান্দপুৰলৈ ৰাজ্য চৰকাৰে ৰাজহুৱা বাছ সেৱা আৰম্ভ কৰিবলৈ চেষ্টা কৰিছিল যদিও ব্যর্থ হয়।

শনিবাৰে সেনাপতি জিলা অভিমুখী এখন বাছত উন্মত্ত জনতাই শিল দলিয়ায় কাংপক্‌পীৰ গামিফাই এলেকাত। উন্মত্ত জনতাৰ ওপৰত নিৰাপত্তা বাহিনীয়ে কন্দুৱা গেছ প্ৰয়োগ কৰাৰ লগতে লাঠীচালনাও কৰে। নিৰাপত্তা বাহিনীৰ এই সুৰক্ষামূলক ব্যৱস্থাত কিছু লোক আহত হয়।

৮ মাৰ্চৰ পৰা মণিপুৰৰ সকলো পথত জনসাধাৰণৰ বাবে মুকলি গতি-বিধি সু-নিশ্চিত কৰিবলৈ নিৰাপত্তা বাহিনীক শেহতীয়াকৈ কেন্দ্রীয় গৃহ মন্ত্রী অমিত শ্বাহে নিৰ্দেশ দিয়াৰ পাছত আজিৰ পৰা মণিপুৰত পুনৰ আন্তঃজিলা বাছ সেৱা আৰম্ভ হৈছে। শেহতীয়া বাতৰি অনুসৰি উন্মত্ত জনতাক ছত্রভংগ দিয়াবলৈ আৰক্ষীয়ে চলোৱা গুলীচালনাত ৩০ বছৰীয়া এজন প্ৰতিবাদকাৰী নিহত হয়।

Share This