চৰকাৰী কাৰ্যালয়ত বাধ্যতামূলক হʼব মাৰাঠী ভাষা

dainik janambhumi February 05, 2025

ডিজিটেল ডেস্কঃ হিন্দী বাণিজ্যিক চলচ্চিত্ৰ জগতৰ কেন্দ্ৰ মুম্বাই যি ৰাজ্যৰ ৰাজধানী, সেই মহাৰাষ্ট্ৰৰ ৰাজ্য চৰকাৰে মাতৃভাষা মাৰাঠীৰ হকে জাৰি কৰিছে কিছু কঠোৰ নিৰ্দেশনা। সোমবাৰে ৰাজ্য চৰকাৰে জাৰি কৰা অধিসূচনাৰ মতে এতিয়াৰ পৰা মহাৰাষ্ট্ৰৰ সকলো চৰকাৰী আৰু অর্ধ-চৰকাৰী কাৰ্যালয়ত কেৱল মাৰাঠীতহে কথা পতাটো বাধ্যতামূলক।

চৰকাৰে লোৱা প্ৰস্তাৱ কাৰ্যকৰীকৰণৰ বাবে নিৰ্দেশত আৰু কোৱা হৈছে যে স্ব-প্রশাসন, চৰকাৰী নিগম আৰু চৰকাৰী সাহায্যপ্রাপ্ত প্রতিষ্ঠানতো মাৰাঠীত কথা কোৱাটো বাধ্যতামূলক কৰা হৈছে। অধিসূচনাত কোৱা হৈছে যে এই নির্দেশ অমান্য কৰা বিষয়াই শাস্তিমূলক ব্যৱস্থাৰ সন্মুখীন হ'ব। 

উল্লেখযোগ্য যে যোৱা বছৰ অনুমোদন জনোৱা মাৰাঠী ভাষা নীতিত ভাষাটোৰ পালন, সংৰক্ষণ, প্ৰচাৰ, বিস্তাৰ আৰু উন্নয়নৰ পদক্ষেপ অধিক দৃঢ় কৰিবৰ বাবে ৰাজহুৱা কাম-কাজ ত মাৰাঠী ভাষাৰ ব্যৱহাৰৰ পৰামৰ্শ দিয়া হৈছিল। 

চৰকাৰী প্ৰস্তাৱত এই কথাও কোৱা হৈছে যে কাৰ্যালয়বোৰত থকা পি চিৰ (পাৰ্ছনেল কম্পিউটাৰ) কী-ব'ৰ্ডত ৰোমান লিপিৰ বাহিৰেও মাৰাঠী দেৱনাগৰী লিপি থাকিব লাগিব।

Share This