মায়ঙৰ এখন বিশেষ বিদ্যালয় ; বিক্ৰেতাৰ ৰূপত কণ কণ ছাত্ৰ-ছাত্ৰী, বজাৰ কৰিবলৈ আহিল গ্ৰাহক

Kakali Deka February 23, 2025

ডিজিটেল ডেস্কঃ বিদ্যালয়খনত পাঠদানৰ সলনি বহিল এখন বজাৰ। কোনোবাই বন্ধাকবি, কোনোবাই লাউ, কোনোবাই উৰহী, কোনোবাই আকৌ কাপোৰ, মণি-মুকুতা, ফল-মূল, জোতা-ছেণ্ডেল, মাছ আদিও বিক্ৰী কৰিবলৈ আহিল বিদ্যালয়খনত। মাথোঁ শাক পাচলিৰে ভৰি পৰিল বিদ্যালয়ৰখনৰ বাকৰি।

বজাৰখনত বিক্ৰেতাৰ ৰূপত দেখিবলৈ পোৱা গ’ল একাংশ ছাত্ৰ-ছাত্ৰীক আৰু ক্ৰেতাৰ ৰূপত দেখিবলৈ পোৱা গ’ল অভিভাৱক, শিক্ষকসকলক।

এই বিশেষ বিদ্যালয়খন মৰিগাঁও জিলা মায়ঙৰ ইকৰা একচেলেঞ্জ একাডেমি। বিদ্যালয়খনত কণ কণ ছাত্ৰ-ছাত্ৰীসকলক দেখিবলৈ পোৱা গ’ল এক ব্যতিক্ৰমী ৰূপত।

উল্লেখযোগ্য যে যোৱা বছৰ পোন প্ৰথমবাৰৰ বাবে একাডেমিৰ কৰ্তৃপক্ষই আয়োজন কৰা অকণিৰ বজাৰখনে ৰাইজৰ মাজত বিপুল সঁহাৰি লাভ কৰিছিল। শিক্ষাৰ লগতে ছাত্ৰ-ছাত্ৰীৰ গাণিতিক জ্ঞান আৰু ব্যাৱসায়িক মনোবল বৃদ্ধিৰ লক্ষ্যৰে অকণিৰ বজাৰ অনুষ্ঠিত কৰিছে বুলি জানিবলৈ দিয়ে একাডেমিৰ অধ্যক্ষ আব্দুৰ ৰহিমে। অকণিৰ বজাৰখন অনুষ্ঠিত কৰাত ছাত্ৰ-ছাত্ৰীৰ লগতে অভিভাৱক আৰু শিক্ষক-শিক্ষয়িত্ৰীসকলে পূৰ্ণ সহযোগিতা কৰাৰ বাবে সকলোকে ধন্যবাদ জ্ঞাপন কৰিছে একাডেমিৰ সভাপতি জিয়াবুৰ ৰহমানে।

উৎসঃ প্ৰাগ নিউজ ডিজিটেল

 

Share This