মহম্মদ ছামীৰ অবাঞ্ছিত অভিলেখ

Dainik janambhumi February 24, 2025

ডিজিটেল ডেস্ক: পাকিস্তানৰ বিৰুদ্ধে আই চি চি চেম্পিয়নছ ট্রফীৰ খেলত আজি এক অ'ভাৰ সম্পূর্ণ কৰিবলৈ ১১টা বল দি এক অবাঞ্ছিত অভিলেখ গঢ়ে ভাৰতৰ পেচবলাৰ মহম্মদ ছামীয়ে। এদিনীয়া আন্তঃৰাষ্ট্রীয় ক্রিকেটত এক অ'ভাৰত ১১টা বল দিয়া ভাৰতৰ তৃতীয়জন বলাৰ হিচাপে পৰিগণিত হয় ছামী। ২০০৩ চনৰ বিশ্ব কাপ ফাইনেলত জোহান্সবার্গৰ নিউ বাণ্ডাৰাৰ্ছ ষ্টেডিয়ামত অষ্ট্ৰেলিয়াৰ বিৰুদ্ধে জাহিৰ খানে প্রথম অ'ভাৰত ১১টা বল দিছিল। 

এদিনীয়া আন্তঃৰাষ্ট্ৰীয় ক্রিকেটত ভাৰতীয় বলাৰৰ এইটো দীর্ঘতম অ'ভাৰ। ইৰফান পাঠানে ২০০৬-ত জামাইকাৰ ছাবিনা পার্কত ৱেষ্ট ইণ্ডিজৰ বিৰুদ্ধে এটা অ'ভাৰত ১১ টা বল দি জাহিৰৰ সেই অবাঞ্ছিত অভিলেখ স্পর্শ কৰে। জাহিৰে ছবাৰ এক অ'ভাৰত ১০টা বল দিছে। ছামীয়ে আজি অ'ভাৰটোত পাঁচটা ৱাইড বল দিয়ে। এদিনীয়া আন্তঃৰাষ্ট্ৰীয় ক্ৰিকেটৰ ইতিহাসত এটা অ'ভাৰত পাঁচটা ৱাইড বল দিয়া প্রথম ভাৰতীয় বলাৰ হিচাপেও পৰিগণিত হয় ছামী। চেম্পিয়নছ ট্রফীত ছামীৰ পূর্বে ভাৰতৰ হৈ দীর্ঘতম অ'ভাৰটো দিছিল যশপ্রীত বুমৰাহে। অভেলত ২০১৭ চেম্পিয়নছ ট্রফীৰ ফাইনেলত পাকিস্তানৰ বিৰুদ্ধে বুমৰাহে নটা বলত অ'ভাৰ সম্পূর্ণ কৰিছিল। । আই চি চি চেম্পিয়নছ ট্ৰফীৰ ইতিহাসত ছামীৰ ১১টা বলৰ অ'ভাৰটো তৃতীয় দীর্ঘতম।

Share This