মৰিগাঁৱৰ এটি ৫০ বছৰীয়া অট্টালিকাৰ ৰহস্য

Rashmi March 04, 2025

ডিজিটেল ডেস্ক: চন্দ্ৰযানৰ উৎক্ষেপণ, মহাসাগৰত মহানগৰ স্থাপন আদিৰে বিজ্ঞান-প্ৰযুক্তি বহু দূৰ বাঢ়ি যোৱাৰ পাছতো মানুহৰ মনৰ পৰা ভূত-প্ৰেত সম্পৰ্কীয় অন্ধবিশ্বাসসমূহ এতিয়াও দূৰ হোৱা নাই। মানৱ সমাজত যুগ যুগ ধৰি পৰম্পৰাগতভাৱে প্ৰচলিত হৈ অহা এনে অন্ধবিশ্বাসবোৰক লোকবিশ্বাস বুলি অভিহিত কৰিছে যদিও যুক্তিবাদী বা বিজ্ঞানমনস্ক মানুহে ভূত-প্ৰেত আদিক বিশ্বাস নকৰিলেও বা ইবোৰক অন্ধবিশ্বাস বুলি এৰাই চলিলেও সমাজৰ গৰিষ্ঠসংখ্যক মানুহেই ভূত-প্ৰেতক এক অলৌকিক আৰু ৰহস্যময় জীৱ বুলি বিশ্বাস কৰি আহিছে।

 মানুহৰ মাজত চলি থকা এনেবোৰ অন্ধবিশ্বাসৰ মাজতেই মৰিগাঁও চহৰৰ মাজমজিয়াত ভূত বাস কৰা ৫০ বছৰীয়া অট্টালিকাই সৃষ্টি কৰিছে ৰহস্য।ভূতৰ ভয়ত তিনিটাকৈ বৃহৎ অট্টালিকাত দিনৰ ভাগতো মানুহ যাবলৈ ভয়। মৰিগাঁও চহৰৰ ১ নং ৱাৰ্ডৰ ৰজাগাঁও চাটিয়ানতলীৰ তিনিটাকৈ বৃহৎ অট্টালিকা সৰ্বসাধাৰণৰ মাজত ভূত বাংলা গৃহ হিচাপে পৰিচিত।প্ৰায় ৫০ বছৰ পূৰ্বে নিৰ্মাণ কৰা এই বৃহৎ অট্টালিকাকেইটা জিলা প্ৰশাসন তথা বিভাগীয় কৰ্তৃপক্ষৰ অমনোযোগিতাৰ বাবেই কোটি টকাৰ ব্যয়ৰে নিৰ্মাণ কৰা এই বৃহৎ অট্টালিকা কেইটা জৰাজীৰ্ণ হৈ পৰাৰ লগতে সাপ, নেউল, শিয়াল আদিৰ বাসস্থানত পৰিণত হৈছে। 

এই বৃহৎ অট্টালিকাকেইটা কেনেকৈ আৰু কিয় ভূত বাংলাত পৰিণত হ'ল, এই সন্দৰ্ভত প্ৰতিবেদকে অনুসন্ধান কৰি জানিব পৰা মতে অসম আন্দোলনৰ পূৰ্বে ১৯৭৫ চনৰ আগে পিছে অসম ৰাজ্যিক গৃহ নিৰ্মাণ পৰিষদৰ (হাউছিং ব'ৰ্ড) দ্বাৰা এই বৃহৎ তিনিটাকৈ অট্ৰালিকা নিৰ্মাণ কৰাইছিল।বৰ্তমানে অট্ৰালিকা কেইটাৰ চাৰিওকাষে হাবি জংঘলে আৱৰি এক জয়াল পৰিবেশ সৃষ্টি কৰি ৰখা অট্টালিকা চৌহদত আছে ২০-২৫ বিঘা ভূমিৰে আৱৰা এক বৃহৎ পৰিসৰ। তদুপৰি অট্টালিকা কেইটাৰ পিছফালে আছে ৰজাগাঁও চাটিয়ানতলীৰ ৰাজহুৱা শ্মশান। অসম আন্দোলনৰ সময়ত অসম আন্দোলনৰ বিৰুদ্ধে মাত মতা বা অসম আন্দোলনক বিৰোধ কৰা কিছু লোকক আন্দোলনকাৰী সকলে আনি শ্মশানখনৰ জংঘলৰ মাজত বিভিন্ন ধৰণৰ শাস্তি প্ৰদান কৰিছিল। এই কথা অবিভক্ত নগাঁও জিলা প্ৰশাসন অৱগত হোৱাত ইয়াক প্ৰতিৰোধ কৰিবলৈ নৱ নিৰ্মিত হাউচিং ব'ডৰ অট্টালিকাকেইটাত চি আৰ পি এফৰ কেম্প স্থাপন কৰি দিয়ে। চি আৰ পি এফৰ কেম্পত পৰিণত হোৱা অট্টালিকা কেইটাত দুজন চি আৰ পি এফৰ জোৱান বিশেষ কাৰণবশত অট্টালিকাৰ ওপৰৰ পৰা পৰি মৃত্যু হয় বুলি সেই সময়ত প্ৰচাৰ লাভ কৰে। অসম আন্দোলনৰ পৰিৱেশ কিছু উন্নত হোৱাত চি আৰ পি এফৰ কেম্পটো প্ৰশাসনে তাৰ পৰা স্থানান্তৰিত কৰাত কেইবা বছৰ ধৰি অট্টালিকা পৰিত্যক্ত হৈ থাকে। সেই সময়ত চি আৰ পি এফৰ জোৱান কেইজনৰ মৃত্যুত ভূতৰ হাত আছে বুলি জনসাধাৰণৰ মাজত প্ৰচাৰ হৈ পৰাত তেতিয়াৰে পৰা সেই অট্টালিকা কেইটাই ভূত বাংলাৰ নাম লাভ কৰে।

কিছু বছৰ পৰিত্যক্ত হৈ পৰা অট্টালিকা কেইটাত অসম ৰাজ্যিক গৃহ নিৰ্মাণ পৰিষদৰ (হাউছিং ব'ৰ্ড) দ্বাৰা অলপ মেৰামতি কৰি এটা অট্টালিকা জিলা গৃহ নিৰ্মাণ বিষয়া কাৰ্যালয় (হাউছিং ব'ৰ্ড) স্থাপন কৰাৰ লগতে আন দুটা (হাউছিং ব'ৰ্ড) কৰ্মচাৰী সকলৰ আৱাসিক কৰি লয়। প্ৰায় ১২ বছৰমান এই কাৰ্যালয়টো চলি থকাৰ পিছত গৃহ নিৰ্মাণ পৰিষদৰ (হাউছিং ব'ৰ্ড) কাৰ্যালয়টো বন্ধ হৈ পৰে। আৰু তাৰ কৰ্মচাৰী সকলো সেই অট্টালিকাৰ পৰা স্থানান্তৰ ঘটি পুনৰ পৰিত্যক্ত হৈ পৰে অট্টালিকা কেইটা । সম্প্ৰতি ২০ বছৰতকৈ অধিক কাল এই অট্টালিকা কেইটা পৰিত্যক্ত হৈ থকাত হাবি জংঘলে আৱৰি ৰখাৰ লগতে এক জয়াল পৰিবেশে বিৰাজ কৰি তুলিছে। ইয়াৰ মাজতে অট্টালিকা কেইটা অসামাজিক কাৰ্যৰ ঘাটিত পৰিণত হৈ পৰিছিল যদিও বৰ্তমানে অট্টালিকা কেইটাত সাধাৰণ মানুহৰ প্ৰৱেশ নাই। এই ক্ষেত্রত বিভাগীয় কৰ্তৃপক্ষ তথা জিলা প্ৰশাসনে  জনসাধাৰণৰ মনৰ পৰা ভূতৰ অন্ধবিশ্বাস আতৰাই অট্টালিকা কেইটা ব্যৱহাৰৰ উপযোগী কৰি তোলাত গুৰুত্ব আৰোপ কৰিবলৈ সচেতন ব্যক্তি সকলে আহ্বান জনাইছে।

Share This