'আমাৰ মৃত্যুৰ বাবে আমি দায়ী'! ১৩ মহলাৰ পৰা জঁপিয়াই মাতৃ-পুত্ৰৰ চৰম সিদ্ধান্ত

Rashmi September 15, 2025

ডিজিটেল ডেস্কঃ এহাল মাতৃ-পুত্ৰই ১৩ মহলাৰ পৰা জঁপিয়াই আত্মহত্যা কৰে। এই ঘটনাত ৩৭ বছৰীয়া সাক্ষী চাওলা আৰু তেওঁৰ ১১ বছৰীয়া পুত্ৰ দক্ষ চাওলাৰ থিতাতে মৃত্যু হয়। ছ'চাইটিৰ তলত তেজেৰে লুতুৰি-পুতুৰি হৈ থকা মাতৃ-পুত্ৰৰ মৃতদেহ দেখি মানুহ স্তম্ভিত হৈ পৰিল। তথ্য লাভ কৰাৰ লগে লগে আৰক্ষী সেই স্থানত উপস্থিত হৈ মৃতদেহ দুটা জিম্মাত লৈ মৰণোত্তৰ পৰীক্ষাৰ বাবে প্ৰেৰণ কৰে। গ্ৰেটাৰ নয়ডাত ঘটিছে এই কৰুণ ঘটনা।

স্থানীয় ৰাইজে জনোৱা মতে, শনিবাৰে পুৱা প্ৰায় ১০ বজাত হঠাতে এক প্ৰচণ্ড চিঞৰ শুনা যায়। সকলোৱে আতংকিত হৈ বেলকনি আৰু খিৰিকীৰ পৰা চাবলৈ ধৰিলে। তেতিয়া মানুহে দেখিলে যে মাটিত এগৰাকী মহিলা আৰু এটা ল'ৰা পৰি আছে। দুয়োৰে অৱস্থা অতি ভয়াৱহ আছিল আৰু কেইছেকেণ্ডমানৰ ভিতৰতে দুয়োৰে মৃত্যু হৈছিল। ইয়াৰ পাছত সমগ্ৰ অঞ্চলটোত হাহাকাৰ লাগে।

আৰক্ষীয়ে মৃতকৰ ঘৰত তালাচী চলাওঁতে তাৰ পৰা এখন ছুইছাইড নোট উদ্ধাৰ কৰে। সাক্ষীয়ে স্বামী দৰ্পণ চাওলাৰ নামত এই টোকাটো লিখিছিল। তাত লিখা আছিল, ‘আমি এই পৃথিৱীখন এৰি যাব বিচাৰিছোঁ... ক্ষমা কৰিব। আমি আপোনাক আৰু অশান্তি দিব নিবিচাৰোঁ। আমাৰ বাবে আপোনাৰ জীৱন নষ্ট হোৱা উচিত নহয়। আমাৰ মৃত্যুৰ বাবে কোনো দায়ী নহয়। এই মৃত্যুৰ বাবে আমি নিজে দায়ী। ' ছুইছাইড নোট লাভ কৰাৰ পিছত আৰক্ষীয়ে এই গোচৰটোক আত্মহত্যাৰ গোচৰ হিচাপে তদন্ত আৰম্ভ কৰিছে।

পৰিয়ালৰ ঘনিষ্ঠ লোকে জনোৱা মতে পুত্ৰ দক্ষ মানসিকভাৱে অসুস্থ আছিল। ইয়াৰ বাবেই তেওঁ দীৰ্ঘদিন ধৰি চিকিৎসাধীন হৈ আছিল। পৰিয়ালৰ লোকে বহু ডাক্তৰক দেখুৱালে। কিন্তু অৱস্থাৰ উন্নতি হোৱা নাছিল। শিশুটি স্কুললৈ যোৱা নাছিল আৰু প্ৰায়ে ঔষধৰ ওপৰত নিৰ্ভৰশীল আছিল। ইয়াৰ বাবেই তেওঁৰ মাতৃ সাক্ষী চাওলা দীৰ্ঘদিন ধৰি মানসিক চাপত আছিল। ওচৰ-চুবুৰীয়াই কয় যে তেওঁ বহুবাৰ কৈছিল যে মোৰ জীৱনটো বৰ কঠিন হৈ পৰিছে।

আৰক্ষীৰ তদন্তত দেখা গৈছে যে ঘটনাৰ দিনা ৰাতিপুৱা প্ৰায় ৯ বজাত সাৰ পাই দৰ্পণ চাওলাই পত্নীক পুত্ৰক ঔষধ দিবলৈ কয়। ইয়াৰ পিছত সাক্ষীয়ে শিশুটিক তুলি লৈ ঔষধ দি বেলকনিত খোজ কাঢ়িবলৈ ধৰিলে। স্বামীয়ে আন এটা কোঠালৈ গৈ জিৰণি লৈছিল। কিছু সময়ৰ পাছত হঠাৎ মহিলাগৰাকী আৰু শিশুটি ত্ৰয়োদশ মহলাৰ পৰা তললৈ জঁপিয়াই দিয়ে আৰু মৃত্যুক সাবটি লয়।

ইয়াৰ আঁৰত আন কিবা কাৰণ আছে নেকি জানিবলৈ আৰক্ষীয়ে মৃতকৰ আত্মীয় আৰু ছ'চাইটিৰ বাসিন্দাক জেৰা আৰম্ভ কৰিছে।

তথ্য অনুসৰি মৃত সাক্ষী চাওলা এগৰাকী গৃহিণী আৰু তেওঁৰ স্বামী দৰ্পণ চাওলা পেছাত চাৰ্টাৰ্ড একাউণ্টেণ্ট। মূলতঃ এই পৰিয়ালটো উত্তৰাখণ্ডৰ গাধি নেগী গাঁৱৰ আৰু বৰ্তমান গ্ৰেটাৰ নয়ডা পশ্চিমত অৱস্থিত এছ চিটি ছ’চাইটিৰ এটা ফ্লেটত বাস কৰিছিল। এই ঘটনাত সকলোৱে শোক প্ৰকাশ কৰিছে।

উৎস : প্ৰাগ নিউজ ডিজিটেল

পুৱা উঠাৰ পৰা নিশা শোৱালৈকে জনতাই পাব জি এছ টি সংস্কাৰৰ লাভ, কেন্দ্রীয় বিত্ত মন্ত্ৰী নিৰ্মলা সীতাৰমণে ক'লে