বংগোপসাগৰলৈ চীনক নিমন্ত্ৰণ ইউনুছৰ

dainik janambhumi April 01, 2025

ডিজিটেল ডেস্ক : চীনক বংগোপসাগৰলৈকে নিমন্ত্ৰণ কৰাৰ ঘটনাই তীব্র প্রতিক্ৰিয়াৰ সৃষ্টি কৰিছে। ইয়াৰ লগতে ইউনুছে চীন ভ্ৰমণৰ সময়ত উত্তৰ-পূর্বাঞ্চলক লৈও বিতর্কিত মন্তব্য দিয়ে। উল্লেখযোগ্য যে ইউনুছে ২৬-২৯ মার্চত চীন ভ্রমণ কৰিছিল। তেওঁ বেইজিং ভ্ৰমণৰ সময়ত নিজকে চীনৰ সহযোগী বুলি পৰিচয় দিয়াৰ চেষ্টাও কৰে। অন্তৱৰ্তী চৰকাৰৰ মুৰব্বীজনে বেইজিং ভ্ৰমণৰ সময়ত দিয়া ভাষণৰ ভিডিঅ' ছ'চিয়েল মিডিয়াতো প্রকাশ পাইছে। 

ইউনুছৰ এই ভাষণে তেওঁৰ ভাৰতৰ প্ৰতি থকা মনোভাবকো স্পষ্ট কৰে। ইউনুছে কয়, 'ভাৰতৰ উত্তৰ-পূৰ্বাঞ্চলৰ সাতখন ৰাজ্য, যাক সাতভনী বুলিও কোৱা হয়, এই ৰাজ্যকেইখন ভূমিৰে আৱৰি আছে। এই ৰাজ্যকেইখনৰ সমুদ্রলৈ যোৱাৰ কোনো পথ নাই। আমি এই এলেকাটোৰ সমুদ্ৰৰ একমাত্ৰ সংৰক্ষক। ইয়াৰ বৃহৎ সুযোগ লোৱাৰ সুবিধা আছে। ইয়াত চীনৰ অৰ্থনীতিৰ বিস্তাৰ কৰিব পাৰে। ইয়াত সামগ্রী তৈয়াৰ কৰিব পাৰে, ইয়াত উৎপাদন কৰিব পাৰে আৰু বিক্ৰী কৰিব পাৰে।'- এই মন্তব্য চিকেন নেকক উদ্দেশ্যি দিয়াটো স্পষ্ট হৈ পৰিছে। ইয়াৰ দ্বাৰা চীনে দীর্ঘদিন চকু ৰখা প্রায় ২২ কিল'মিটাৰ বহল শিলিগুৰি কৰিডৰৰ প্ৰতি মনোযোগ আকর্ষণ কৰে। 

উল্লেখযোগ্য যে ভাৰতৰ নিৰাপত্তাৰ ক্ষেত্ৰত শিলিগুৰি কৰিডৰ যথেষ্ট গুৰুত্বপূৰ্ণ। ই উত্তৰ-পূৰ্বাঞ্চলক ভাৰতৰ সৈতে সংযোজিত কৰিছে। ইফালে ইউনুছে ভাৰতৰ প্রতি বিদ্বেষ ভাব প্রকাশ কৰে তিষ্টা নদী অৱবাহিকা প্রকল্পক লৈ। পূৰ্বৰ শ্বেখ হাছিনা চৰকাৰে এই প্ৰকল্পৰ বাবে ভাৰতৰ সহায় বিচাৰিছিল। ইউনুছে এই প্রকল্পৰ বাবে এতিয়া চীনৰ কোম্পানীৰ সহায় বিচাৰিছে। ইউনুছ আৰু চীনৰ ৰাষ্ট্ৰপতি ঝি জিনপিঙে প্ৰকাশ কৰা এটা যুটীয়া বিবৃতিৰ পৰা এই কথা জনা গৈছে। ইউনুছৰ ভ্ৰমণৰ সময়ত দুয়োখন দেশে ৯খন চুক্তিত স্বাক্ষৰ কৰে।

Share This