প্ৰচণ্ড ভূমিকম্পত তচনচ ম্যানমাৰ-থাইলেণ্ড 

dainik janambhumi March 29, 2025

ডিজিটেল ডেস্ক : ম্যানমাৰ আৰু থাইলেণ্ডত শুকুৰবাৰে পুৱা ১১-৫০ বজাত অহা প্রলয়ংকৰী ভূমিকম্পই ব্যাপক ধ্বংসলীলাৰ সৃষ্টি কৰে। ম্যানমাৰত ভূমিকম্পত ১৪৪জন নিহত আৰু ৭৩২জন লোক আহত হয় বুলি চৰকাৰীভাৱে নিশ্চিত কৰা হৈছে। থাইলেণ্ডৰ ৰাজধানী বেংককত ৯জন নিহত আৰু প্রায় ৯০জন লোক সন্ধানহীন হৈ আছে। আমেৰিকাৰ ভূতাত্ত্বিক জৰীপ বিভাগে প্রকাশ কৰা মতে, শুকুৰবাৰে ম্যানমাৰত এটাৰ পাছত এটাকৈ ছটা জোকাৰণি অনুভূত হয়। ভূমিকম্পকেইটাৰ প্ৰাবল্য ৰিখটাৰ স্কেলত ৭.৭-৬.৪ৰ ভিতৰত বুলি কোৱা হৈছে। 

প্রথমটো ভূমিকম্পৰ জোকাৰণি পুৱা ১১-৫০ বজাত অনুভূত হয় আৰু প্রাবল্য ৭.৭ আছিল। ভূমিকম্পৰ অভিকেন্দ্ৰ মধ্য ম্যানমাৰৰ পৰা প্ৰায় ৫০ কিল'মিটাৰ পূবৰ মনীৱা চহৰত বুলি কোৱা হৈছে। ভূমিকম্পই থাইলেগুতো ব্যাপক ক্ষতিসাধন কৰে। ম্যানমাৰ, থাইলেণ্ডৰ উপৰি ভাৰত, বাংলাদেশ আৰু দক্ষিণ-পশ্চিম চীনকে ধৰি মুঠ পাঁচখন দেশত ভূমিকম্পৰ জোকাৰণি অনুভূত হয়। মেঘালয়ৰ শ্বিলঙতো জোকাৰণি অনুভূত হয়। ম্যানমাৰত ভালেমান লোক এতিয়া সন্ধানহীন হৈ আছে। এই লোকসকল ধ্বংসস্তূপৰ তলত আবদ্ধ হৈ থকাৰ আশংকা কৰা হৈছে। আনহাতে থাইলেণ্ডত ৭জন লোক নিহত হোৱা বুলি কোৱা হৈছে। দেশখনত প্রায় ৯০জন লোক সন্ধানহীন হৈ আছে। বিধ্বংসী ভূমিকম্পই ম্যানমাৰত ব্যাপক ধ্বংসলীলাৰ সৃষ্টি কৰাৰ ফলত চৌদিশে হাহাকাৰ লাগিছে। দেশখনৰ বিভিন্ন স্থানত ঘৰ-দুৱাৰ ভগাৰ লগতে পথসমূহো বিধ্বস্ত কৰে। ভূমিকম্পই ব্যাপক ধ্বংসলীলা সৃষ্টি কৰাৰ পৰিপ্ৰেক্ষিতত ম্যানমাৰত ক্ষমতাত থকা জুণ্টাই দেশখনত জৰুৰী অৱস্থা ঘোষণা কৰাৰ লগতে আন্তঃৰাষ্ট্ৰীয় সহায় বিচাৰি আৱেদন জনাইছে। উল্লেখযোগ্য যে ম্যানমাৰৰ জুণ্টাই আন্তঃৰাষ্ট্ৰীয় সাহায্য বিচৰাটো অতি দুর্লভ। 

জুণ্টাৰ মুৰব্বী মিন আং লিয়াঙে ভূমিকম্পত আঘাতপ্রাপ্ত লোকৰ চিকিৎসা কৰি থকা এখন চিকিৎসালয় পৰিদৰ্শন কৰাৰ সময়ত জুণ্টাৰ মুখপাত্র জাও মিন টুনে সাংবাদিকৰ আগত কয়, 'আন্তঃৰাষ্ট্ৰীয় সম্প্রদায়ে যিমান পাৰি সোনকালে মানৱীয় সাহায্য আগবঢ়োৱাটো আমি বিচাৰিছোঁ। বি বি চিৰ এটা বাতৰিত কোৱা হৈছে যে ম্যানমাৰৰ দ্বিতীয় সৰ্ববৃহৎ মহানগৰ মাগুলেত ভূমিকম্পই আটাইতকৈ বেছি ক্ষতিসাধন কৰে। বাতৰি প্ৰতিষ্ঠানটোৱে উদ্ধাৰ কার্যত জড়িত কৰ্মীৰ উদ্ধৃতি দি কয় যে মহানগৰখনত ভূমিকম্পই যি ধৰণৰ ব্যাপক ধ্বংসলীলাৰ সৃষ্টি কৰিলে, তালৈ চাই নিহত হোৱা লোকৰ সংখ্যা কেইবাশতাধিক হোৱাৰ আশংকা কৰা হৈছে। ৰেড ক্ৰছে প্রকাশ কৰা মতে, প্ৰাৰম্ভিক তথ্যৰ পৰা জানিব পৰা মতে ভূমিকম্পই ব্যাপক ক্ষতিসাধন কৰে। ম্যানমাৰৰ ৰাজধানী নেই পি টৱাত শক্তিশালী ভূমিকম্পৰ ফলত বাট-পথসমূহত প্রকাণ্ড প্রকাণ্ড ফাটৰ সৃষ্টি হয়। ইয়াৰ ফলত যাতায়াত ব্যৱস্থাত বাধাৰ সৃষ্টি হৈছে। মাণ্ডালেত পৰ্যটকৰ বাবে অতি আকর্ষণীয় প্রায় ৯০ বছৰ পুৰণি আভা দলং বিধ্বংস্ত হৈ পৰে। মাণ্ডালেত এটা মছজিদ ভাগি পৰাৰ ফলত কমেও ২০জন লোক নিহত হোৱা বুলি স্থানীয় সংবাদ মাধ্যমে প্রকাশ কৰে। এজন প্রত্যক্ষদর্শীয়ে সংবাদ প্রতিষ্ঠানৰ আগত কয়, 'মোৰ সন্মুখতে এটা পাঁচ মহলীয়া ঘৰ ভাগি পৰে। মোৰ নগৰখনৰ সকলো লোক এতিয়া পথতে আছে। ঘৰলৈ সোমাবলৈ কোনেও সাহ কৰা নাই।' মাণ্ডালেত থকা মহামুনি পাগড়াৰ বিধ্বস্ত হয়। এই পাগড়া ২০১৬ চনত হোৱা প্ৰবল ভূমিকম্পত বিধ্বস্ত হৈছিল। ভাৰত চৰকাৰে ২০২০ চনত এই পাগড়া পুনৰ নিৰ্মাণ কৰে। উল্লেখযোগ্য যে মহামুনি বুদ্ধ মন্দিৰ নামেৰে খ্যাত এই শিৱালয় ম্যানমাৰৰ এক আগশাৰীৰ ধৰ্মীয় স্থান। 

মন কৰিবলগীয়া যে প্রদেশখনত কেইবা লাখ লোকে বাস কৰে। এই অঞ্চলটোত গৃহযুদ্ধ চলি থকাৰ কাৰণে ইণ্টাৰনেট সেৱা বন্ধ হৈ আছে। সেয়েহে ক্ষয়-ক্ষতিৰ বিষয়ে সঠিক তথ্য লাভত জটিলতাৰ সৃষ্টি হৈছে। ভূমিকম্পত দেশখনৰ পূৰ্বৰ ৰজাৰ ৰাজপ্রাসাদ, দেশখনৰ অন্যতম সৰ্ববৃহৎ মঠ মা ছু য়ানেৰ ক্ষতিসাধন হৈছে। ইয়াৰ উপৰি ৰাজধানীৰ ভালেমান চৰকাৰী ভৱন, দলং, পথৰ ব্যাপক ক্ষতি হোৱা বুলি জনা গৈছে। দেশখনৰ চিকিৎসালয়সমূহ হতাহত লোকেৰে ভৰ্তি হৈ পৰে আৰু এতিয়া তেজৰ ব্যাপক নাটনি হৈছে। ইফালে ভূমিকম্পত বিধ্বস্ত হৈ পৰাৰ পাছত থাইলেণ্ডৰ প্ৰধানমন্ত্ৰীয়ে দেশখনত জৰুৰী অৱস্থা ঘোষণা কৰে। ভূমিকম্পত ৰাজধানী বেংককৰ চাটুচাক পাৰ্কৰ কার্যত এটা ৩০ মহলীয়া নির্মীয়মাণ অট্টালিকা কেইছেকেণ্ডমানৰ ভিতৰত ধূলিসাৎ হৈ পৰে আৰু ইয়াৰ ফলত এজন লোক নিহত হোৱাৰ লগতে প্রায় ৮০জন সন্ধানহীন হৈ আছে। আহত প্রায় ৫০জন লোকক উদ্ধাৰ কৰা হৈছে। এই অট্টালিকাটোৰ নিৰ্মাণত প্রায় ৪০০জন লোকে কাম কৰি আছিল। আজি দুপৰীয়া ৰাজধানীখনক ৭.৭ প্রাবল্যৰ ভূমিকম্পই জোকাৰি যায়। ইয়াৰ ফলত ভালেমান ঘৰৰ ক্ষতিসাধন হৈছে। নেশ্যনেল চেণ্টাৰ ফৰ ছিছম'লজিৰ সঞ্চালক অ'পি মিশ্রই কয় যে ম্যানমাৰৰ বিধ্বংসী ভূমিকম্পৰ কাৰণ হ'ল ছাগাইং বিচ্যুতি। ইয়াৰ দৈৰ্ঘ্য প্রায় ১২০০ কিল'মিটাৰ। এই বিচ্যুতিৰ বাবে দেশখনত পূর্বতেও প্রবল ভূমিকম্প হৈছিল। তেওঁৰ মতে, এই বিচ্যুতি ভাৰতীয় প্লেট আৰু বাৰ্মা মাইক্ৰ'প্লেটৰ মাজৰ এক প্রধান টেকট'নিক সীমা। এই প্লেট দুখনৰ সংঘৰ্ষৰ ফলত এই সমগ্র অঞ্চলটোত ভূমিকম্প আহি থাকে।

Share This