২৪ জানুৱাৰীত কিয় পালন কৰা হয় ৰাষ্ট্ৰীয় কন্যা শিশু দিৱস?জানক ইয়াৰ ইতিহাস।

Kakali Deka January 24, 2025

ডিজিটেল ডেস্ক: শিশু হৈছে ঈশ্বৰৰ এক সুন্দৰ উপহাৰ। প্ৰতিটো শিশু একো একোটা অমূল্য সম্পদ,এক অমূল্য ৰত্ন।আজি ৰাষ্ট্ৰীয় কন্যা শিশু দিৱস।ৰাষ্ট্ৰীয় কন্যা শিশু দিৱস মহিলা সৱলীকৰণ আৰু তেওঁলোকৰ অধিকাৰৰ বিষয়ে সজাগতা বিয়পোৱাৰ এক গুৰুত্বপূৰ্ণ দিন।আজি সমগ্ৰ দেশজুৰি উদযাপন কৰা হৈছে ৰাষ্ট্ৰীয় কন্যা শিশু দিৱস ।

প্ৰতিবছৰে ২৪জানুৱাৰীত ভাৰতত ৰাষ্ট্ৰীয় কন্যা শিশু দিৱস উদযাপন কৰা হয় । ই হৈছে কন্যা সন্তানৰ অধিকাৰ, শিক্ষা আৰু তেওঁলোকৰ কল্যাণৰ ওপৰত আলোকপাত কৰাৰ বাবে উৎসৰ্গিত এক গুৰুত্বপূৰ্ণ দিৱস ।যিয়ে আমাক সোঁৱৰাই দিয়ে যে সমাজত লিংগ সমতা নিশ্চিত কৰিবলৈ আৰু মহিলাসকলক সমান সুযোগ দিবলৈ সকলোৱে একেলগে আগোৱাই যাব পাৰি।প্ৰতি বছৰে ৰাষ্ট্ৰীয় কন্যা শিশু দিৱসৰ বিষয়বস্তু নিৰ্ধাৰণ কৰা হয়।ৰাষ্ট্ৰীয় কন্যা শিশু দিৱস ২০২৫ৰ বিষয়বস্তু হৈছে ‘এক উজ্জ্বল ভৱিষ্যতৰ বাবে কন্যা শিশুক শক্তিশালী কৰা’।

জানো আহক ৰাষ্ট্ৰীয় কন্যা শিশু দিৱসৰ ইতিহাস

ভাৰত চৰকাৰে কন্যা সন্তানক দেশৰ প্ৰথম স্থানলৈ অনাৰ বাবে যৎপৰোনাস্তি চেষ্টা কৰি আহিছে। ইয়াৰ বাবেই আৰম্ভ হ’ল ৰাষ্ট্ৰীয় কন্যা শিশু দিৱস উদযাপন।উল্লেখযোগ্য যে নাৰী আৰু শিশু বিকাশ মন্ত্ৰণালয়ৰ দ্বাৰা ২০০৮ চনত পোন প্ৰথমে ৰাষ্ট্ৰীয় কন্যা শিশু দিৱসৰ আয়োজন কৰা হৈছিল ।এই দিনটোত আমাৰ কন্যা সন্তানসকলে সন্মুখীন হৈ অহা বিভিন্ন ধৰণৰ অসমতাৰ ওপৰত আলোকপাত কৰা হয় আৰু তেওঁলোকৰ বাবে শিক্ষাৰ প্ৰয়োজনীয়তাৰ দিশটো প্ৰচাৰ কৰা হয় । লগতে সমাজে যাতে কন্যা সন্তানসকলক ল'ৰাৰ দৰেই সমান মূল্য আৰু সন্মান প্ৰদান কৰে তাৰ প্ৰতিও উৎসাহিত কৰা হয় ।আনহাতে ২৪ জানুৱাৰীত কন্যা শিশু দিৱস উদযাপনৰ কাৰণ ইন্দিৰা গান্ধীৰ সৈতে সম্পৰ্কিত‌ আছে।কিয়নো ১৯৬৬ চনৰ ২৪ জানুৱাৰীত ইন্দিৰা গান্ধীয়ে দেশৰ প্ৰথমগৰাকী মহিলা প্ৰধানমন্ত্ৰী হিচাপে শপত গ্ৰহণ কৰে।  এগৰাকী কন্যা সন্তানে দেশৰ সৰ্বোচ্চ পদত অধিষ্ঠিত হোৱাৰ দিনটো দেশৰ কন্যাসকলৰ নামত উৎসৰ্গিত কৰি প্ৰতি বছৰে ২৪ জানুৱাৰীত ৰাষ্ট্ৰীয় কন্যা শিশু দিৱস পালন কৰা হয়।

Share This