টি-২০ প্রীতি শৃংখলা জয় নেপালৰ

dainik janambhumi September 02, 2025

ডিজিটেল ডেস্ক : অসমৰ বিৰুদ্ধে ছিনিয়ৰ পুৰুষৰ টি-২০ প্রীতি শৃংখলাত নেপালে ৩-২ ব্যৱধানত শ্রেষ্ঠতা প্রতিপন্ন কৰে। গুৱাহাটীৰ এ চি এ ষ্টেডিয়াম আৰু ফুলুঙৰ এ চি এ ক্রিকেট একাডেমি খেলপথাৰত হোৱা পাঁচখন খেলৰ ছিৰিজৰ পঞ্চম তথা অন্তিম খেলত অতিথি দলটো ৪৪ ৰানত জয়ী হয়। খেলখনত পোনতে বেটিং কৰা নেপালে ২০ অ'ভাৰত ৬ উইকেটত ২০৮ ৰান সংগ্ৰহ কৰে। সন্দীপ জোৰাৰ ৩৯টা বলত ৬৪ ৰান, শুভ কাঞ্চাকাৰৰ ২৬ বলত ৪১ ৰান আৰু ঈশান পাণ্ডেৰ ২০ বলত ৩২ ৰান উল্লেখযোগ্য আছিল। অসমৰ হৈ আয়ুষ্মান মালাকাৰে ৩৪ আৰু অভিনৱ চৌধুৰীয়ে ৪১ ৰানৰ বিনিময়ত দুটাকৈ উইকেট লাভ কৰে। প্রত্যুত্তৰত অসমে ৯ উইকেটত ১৬৪ ৰানহে কৰিবলৈ সক্ষম হয়। অৱদান আছিল ভার্গৱপ্ৰতিম লহকৰৰ ১৭টা বলত অপৰাজেয় ২৯, চাহিল জৈনৰ ২৫, সুমিত ঘাদিগাওকাৰৰ ২৫, হৃষিকেশ তামুলীৰ ১৭ আৰু সৌৰভ মৌচুম দিহিঙীয়াৰ ১৭। 

সামৰণী অনুষ্ঠানত ক্রীড়া মন্ত্রী নন্দিতা গর্লোছা আৰু বি চি চি আইৰ সচিব দেৱজিৎ শইকীয়াৰ লগতে এ চি এৰ সভাপতি তৰংগ গগৈ, সম্পাদক ত্রিদিৰ কোঁৱৰ আৰু এ চি এ এপেক্স কাউন্সিলৰ সদস্য উপস্থিত থাকে। ক্রীড়া মন্ত্রী ড° নন্দিতা গর্লোছাই কয় যে এনে ধৰণৰ শৃংখলাৰ আয়োজনে অসম আৰু নেপালৰ মাজত ক্রীড়া সম্পৰ্ক আৰু অধিক মজবুত কৰাৰ লগতে আমাৰ খেলুৱৈসকলকো উচ্চলক্ষ্যৰ বাবে অনুপ্রাণিত কৰিব। 

আনহাতে, বি চি চি আইৰ সচিব দেৱজিৎ শইকীয়াই কয় এই ছিৰিজত যি উচ্চ পৰ্যায়ৰ মনোভাব দেখা গ'ল, তাত ক্ৰিকেটৰ ক্রমবর্ধিত মান তথা প্রতিভাৰ গভীৰতাই প্রতিফলিত হয়। এ চি এৰ সভাপতি তৰংগ গগৈয়ে কয় যে এই ছিৰিজৰ সফল আয়োজন তথা পৰিচালনে অসম ক্ৰিকেটৰ বাবে আন এক মাইলৰ খুঁটি স্বৰূপ। টীম অসমক তেওঁলোকৰ উৎসাহী প্ৰদৰ্শনৰ বাবে অভিনন্দন জনোৱাৰ লগতে ক্রীড়া সুলভতাৰ বাবে তেওঁ নেপালৰ দলটোক প্রশংসা কৰে।

Share This