জলস্তৰ বৃদ্ধিঃ ৯খন গেটকেই খুলিবলৈ সাজু এন এইচ পি চি

dainik janambhumi June 02, 2025

ডিজিটেল ডেস্ক : নীপকো-সৃষ্ট বান্ধতকৈও ভয়ংকৰ পৰিৱেশৰ সূচনা হ'ব পাৰে ধেমাজি, লখিমপুৰ, মাজুলী জিলাত। নামনি সোৱণশিৰি জলবিদ্যুৎ প্রকল্পত সংঘটিত ভয়ংকৰ ঘটনাই সকলোকে সচকিত কৰি তুলিছে। উল্লেখযোগ্য যে যোৱা কেইবাদিনো ধৰি অৰুণাচল আৰু অসমত হৈ থকা প্ৰবল বৃষ্টিপাতৰ ফলত ফেনে-ফোটোকাৰে ওফন্দি উঠিছে সোৱণশিৰি নদী। ইতিমধ্যে এন এইচ পি চিয়ে সতর্কতা জাৰি কৰি বন্ধ ৰাখিছে নিৰ্মাণৰ কাম। গেৰুকামুখৰ অতি ঠুনুকা তথা চুণশিল পাহাৰত ২০০০ মেগাৱাট ১১৬ মিঃ সু-উচ্চ ক্ষমতা সম্পন্ন এই বৃহৎ নদী বান্ধক লৈ উত্তৰ অসমৰ জনতা এতিয়া আতংকিত হৈ পৰিছে। ভয়-শংকাৰ মাজতে জীৱন নিৰ্বাহ কৰিবলগীয়া পৰিস্থিতি সৃষ্টি হৈছে উত্তৰ অসমৰ জনতাই। কিয়নো জনতাক পণবন্দী কৰিবলৈ বিচাৰিছে এন এইচ পি চিয়ে। 

এন এইচ পি চিৰ এটা সূত্ৰৰ মতে, ইতিমধ্যে গেৰুকামুখ প্রকল্পত জলস্তৰ বৃদ্ধি পাইছে। ইতিমধ্যে তিনিখন গে'ট খুলি দিওঁতে নামনি অংশত ভয়ংকৰ বানৰ সৃষ্টি হোৱাৰ লগতে নামনিত ভয়াৱহ খহনীয়াও বৃদ্ধি পাইছে। মূল বান্ধত এন এইচ পি চিয়ে ৯খনকৈ গে'ট স্থাপন কৰি ৰাখিছে। ৩খন গে'ট খুলি থাকোঁতেই জলপৃষ্ঠ সর্বাধিক বৃদ্ধি পাইছে আৰু যদি ৯খনকৈ গে'ট খুলি দিয়ে তেতিয়া কি পৰিস্থিতিৰ সৃষ্টি হ'ব, সেয়া সহজে অনুমেয়। জানিব পৰা মতে, ৯খনকৈ গে'ট খুলি দিবলৈ সাজু হৈ আছে কর্তৃপক্ষ। উল্লেখযোগ্য যে চলিত মাহত ৭৫০ মেগাৱাট শক্তি উৎপাদনৰ লক্ষ্য আছিল এন এইচ পি চিৰ। শুকুৰবাৰে গেৰুকামুখ পাহাৰৰ সোঁপাৰে এটা বৃহৎ অংশ ভূমিস্খলনত খহি পৰাত প্রকল্পস্থলীত জলপ্ৰলয়ৰ সৃষ্টি হৈছে। দল-সংগঠনৰ প্রতিবাদক আওকাণ কৰা এন এইচ পি চিয়ে কিন্তু ৰুষ্ট প্ৰকৃতিৰ ওচৰত হাৰ মানিবলৈ বাধ্য হৈছে। বর্তমান এন এইচ পি চিৰ মূল বান্ধৰ পৰা হোৱাহোৰে নামি আহিছে পানীৰ ধল। ইফালে শুকুৰবাৰে ধেমাজি প্রশাসনে সতর্কতা জাননী জাৰি কৰিছে। 

ইফালে, নামনি সোৱণশিৰি জলবিদ্যুৎ প্রকল্পই নামনিবাসীৰ জীৱনলৈ বিপদ কঢ়িয়াই অনাটো নিশ্চিত। নামনিবাসীৰ বৃহৎ নদীবান্ধৰ বিৰুদ্ধে প্রতিবাদৰ প্রতি চৰকাৰৰ তিলমানো সম্মান নাই। ৪০৫ মেগাৱাট ক্ষমতাসম্পন্ন ৰঙানদী জলবিদ্যুৎ প্রকল্পই যেনে ধৰণৰ বিভীষিকাৰ সৃষ্টি কৰি আহিছে, অদূৰ ভৱিষ্যতে সোৱণশিৰিৰ নামনিত কেনে পৰিৱেশৰ সৃষ্টি হ'ব সেয়া স্পষ্ট। এতিয়া চৰকাৰে নিজৰ দায়বদ্ধতা প্ৰদৰ্শন কৰাৰ সময়। চৰকাৰৰ সৈতে হোৱা বৃহৎ নদীবান্ধ বিৰোধী ত্ৰিপাক্ষিক বৈঠকৰ সিদ্ধান্ত অনুসৰিয়েই বিষেশজ্ঞ সমিতিৰ পৰামৰ্শ সম্পূৰ্ণৰূপে কাৰ্যকৰী কৰাত চৰকাৰৰ সদিচ্ছাৰ অভাৱে নামনি অংশৰ ৰাইজৰ বিপদ নিশ্চিত কৰিছে। 

খিলঞ্জীয়াৰ পক্ষত থাকি জাতি, মাটি, ভেটিৰ ৰক্ষাৰ প্রতিশ্রুতি দিয়া চৰকাৰখনক সময় থাকোঁতেই বিষেশজ্ঞ সমিতিৰে আলোচনাৰ কৰি নামনিবাসীৰ জীৱন আৰু সম্পত্তিৰ নিৰাপত্তা নিশ্চিত কৰাৰ দাবী জনাইছে ধেমাজি জিলা ছাত্র সন্থাই। সন্থাৰ স্পষ্ট মত, 'আমি উন্নয়ন-বিৰোধী নহয়, কিন্তু নামনিলৈ বিপদ কঢ়িয়াই আনিব পৰা বৃহৎ নদী বান্ধৰ পক্ষত আমি কোনো দিনে নাই।' এন এইচ পি চিৰ দ্বাৰা নিৰ্মীয়মাণ বৃহৎ নদীবান্ধ বন্ধ কৰিবলৈও ধেমাজি জিলা ছাত্ৰ সন্থাৰ উপ-সভাপতি ঋতুপর্ণ কোচে দাবী জনায়।

Share This