এইবাৰ এদিনীয়া ছুপাৰ লীগ

dainik janambhumi November 13, 2025

ডিজিটেল ডেস্ক : দুটা পৰ্যায়ত অনুষ্ঠিত নহয় বিশ্ব টেষ্ট চেম্পিয়নশ্বিপ। ২০২৭-২৯ বৰ্ষৰ টেষ্ট বিশ্ব কাপ ১২টা দলক লৈ অনুষ্ঠিত হ'ব পাৰে। এই সিদ্ধান্ত গ্রহণ কৰিছে আন্তঃৰাষ্ট্ৰীয় ক্রিকেট পৰিষদে (আই চি চি)। ইয়াৰ উপৰি, আই চি চিয়ে এদিনীয়া ক্রিকেট ছুপাৰ লীগ আৰম্ভ কৰাৰ পৰিকল্পনা কৰিছে। তদুপৰি, টি-২০ বিশ্ব কাপতো দলৰ সংখ্যা ৩২টালৈ বৃদ্ধিৰ চিন্তা-চৰ্চা কৰিছে আই চি চিয়ে। ইফালে, টেষ্ট ক্রিকেটৰ মান বজাই ৰাখিবলৈ বিশ্ব টেষ্ট চেম্পিয়নশ্বিপক দুটা বিভাগত ভাগ কৰাৰ প্রস্তাৱ আই চি চিৰ বৈঠকত নাকচ হয়। নিউজিলেণ্ডৰ প্ৰাক্তন ক্রিকেটাৰ ৰ'জাৰ টুজ নেতৃত্বাধীন আই চি চিৰ ৱৰ্কিং গ্রুপে যোৱা সপ্তাহত ডুবাইত অনুষ্ঠিত বিশ্ব ক্রিকেটৰ নিয়ামক সংস্থাৰ বৈঠকত এই প্রস্তাৱ নাকচ কৰিছিল। কাৰণ আই চি চিৰ পূৰ্ণকালীন সদস্য দেশসমূহে ইতিমধ্যেই দ্বিপাক্ষিক শৃংখলাৰ সম্পৰ্কত আলোচনা আৰম্ভ কৰিছে। উক্ত শৃংখলাসমূহ টেষ্ট বিশ্ব কাপৰ ২০২৭-২৯ চক্ৰৰ অন্তৰ্ভুক্ত হ'ব। 

ভাৰত, ইংলেণ্ড আৰু অষ্ট্ৰেলিয়াক লৈ টেষ্ট বিশ্ব কাপৰ এটা অংশ আৰু বাকী দেশসমূহক সামৰি আন এটা অংশ গঠনৰ প্ৰস্তাৱ দিয়া হৈছিল। উক্ত দুটা অংশৰ মাজত প্রমোছন আৰু অৱনমনৰ ব্যৱস্থা ৰখাৰ কথাও চৰ্চা হৈছিল। অৱশ্যে, পাকিস্তান, শ্রীলংকা আৰু ৱেষ্ট ইণ্ডিজে এই প্ৰস্তাৱৰ বিৰোধিতা কৰিছিল। ইংলেণ্ডেও ইয়াৰ বিৰোধিতা কৰে। আই চি চিৰ বৈঠকত সিদ্ধান্ত লোৱা হয় যে বিশ্ব টেষ্ট চেম্পিয়নশ্বিপ বর্তমানৰ দৰেই চলি থাকিব। আফগানিস্তান, আয়াৰলেণ্ড আৰু জিম্বাবুৱেৰ সৈতে ১২টা দলৰ প্রতিযোগিতা অনুষ্ঠিত হ'ব। কাৰণ আই চি চিৰ পূৰ্ণকালীন সকলো সদস্যই সমান সুযোগ লাভ কৰিব লাগে। সেয়ে, সকলো সদস্য ৰাষ্ট্ৰই নির্দিষ্ট সংখ্যক টেষ্ট খেলাৰ সুবিধা পাব। 

আনহাতে, এদিনীয়া ক্রিকেটৰ ছুপাৰ লীগ আৰম্ভ কৰাৰ সিদ্ধান্ত গ্ৰহণ কৰা হৈছে। যদিও ২০২৩ চনৰ বিশ্ব কাপৰ পাছত এই প্রস্তাৱ বাতিল কৰা হৈছিল। এদিনীয়া ক্রিকেটক জীয়াই ৰাখিবৰ বাবেই এই সিদ্ধান্ত লোৱা হৈছে। ২০২৮ চনৰ পৰা এই প্রতিযোগিতা আৰম্ভ হ'ব। পিছে প্রতিযোগিতাখনত জড়িত হ'বলগীয়া দেশৰ সংখ্যা চূড়ান্ত কৰা হোৱা নাই। ২০২৭ চনৰ পাছত সিদ্ধান্ত লোৱা হ'ব পাৰে। ইয়াৰ উপৰি ২০২৮ চনৰ টি-২০ বিশ্ব কাপত ২৪খন দেশ জড়িত হ'ব পাৰে।

Share This